Şu gün Türkmenistanyň Daşary işler ministrliginiň Halkara gatnaşyklary institutynda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň «Hakyda göwheri» atly kitabynyň azerbaýjan dilindäki neşiriniň tanyşdyrylyş dabarasy boldy. Oňa ýurdumyzyň daşary syýasat edarasynyň ýolbaşçy düzümi, Türkmenistanyň Azerbaýjan Respublikasyndaky we Azerbaýjan Respublikasynyň Türkmenistandaky Adatdan daşary we Doly ygtyýarly ilçileri, Türkmen-azerbaýjan parlamentara dostluk toparynyň türkmen böleginiň ýolbaşçylary, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň alymlary, agzalan ýokary okuw mekdebiniň professor-mugallymlary, talyplar gatnaşdylar.

Dabaranyň öňüsyrasynda oňa gatnaşyjylar institutyň eýwanynda ýaýbaňlandyrylan sergini synladylar.

Mälim bolşy ýaly, Milli Liderimiziň “Hakyda göwheri” atly kitabynda türkmen halkynyň dünýä medeniýetine goşan ägirt uly goşandy we dünýä taryhyndaky uly orny barada ylmy taýdan delillendirilen baý maglumatlar beýan edilýär. Gahryman Arkadagymyz eserinde türkmen topragynda ýaşap, yklymlaryň ösüşine goşant goşan meşhur serkerdeler, soltanlardyr akyldarlar barada öz pikir-garaýyşlaryny okyjylara ýetirýär.

Dabarada Azerbaýjan Respublikasynyň Türkmenistandaky Adatdan daşary we Doly ygtyýarly ilçisi Gismat Gozalow çykyş etdi. Çykyşda bellenilişi ýaly, bu eser diňe bir türkmen halkynyň däl, eýsem, bütin türki dünýäniň ruhy hazynasyna öwrülen paýhas nusgalaryny özünde jemleýär. Şeýle eseriň tanyşdyrylmagy onuň diňe bir edebi we ylmy ugurlarda däl, eýsem, Azerbaýjanyň hem-de Türkmenistanyň halklarynyň arasynda asyrlaryň dowamynda berk taryhy we medeni baglanyşygyň ähmiýetini hem aýdyň ýüze çykarýar. Ilçi şeýle baý mirasy gorap saklamakda, ony geljek nesillere ýetirmekde Milli Liderimiziň taýsyz tagallalarynyň hem-de başlangyçlarynyň aýratyn ähmiýete eýedigini nygtady.

“Hakyda göwheri” atly kitabyň azerbaýjanly okyjylara ýetirilmegi halklarymyzyň arasyndaky medeni-ynsanperwer gatnaşyklaryň has-da pugtalandyrylmagyna goşant goşar. Kitapda Altyndepe, Marguş, Beýik Seljuk, Horezmşalar döwletleriniň ýakyn goňşulary bilen alyp baran syýasy, söwda gatnaşyklary barada gymmatly ylmy maglumatlar berilýär. Bu çeşmeler türkmen halkynyň gadymy döwürlerden bäri parahatçylyk ýörelgelerine ygrarlydygyny, özara düşünişmek, öňüni alyş diplomatiýasynyň däplerini ýokary derejede saklap gelendigini görkezýär diýip, diplomat çykyşynda belledi. Kitap okyjylara türkmen halkynyň şöhratly geçmişi, ahlak gymmatlyklary, Türkmenistanda ylmyň, bilimiň, medeniýetiň ösüşi barada giň düşünje almaga mümkinçilik berýär.

Türkmen halkynyň şöhratly ösüş ýoly, ýurtda goralyp saklanýan taryhy-medeni ýadygärlikler barada möhüm maglumatlary özünde jemleýän eser iki bapdan ybarat bolup, onda awtoryň ylmy çemeleşmeleri we öz çuňňur oýlanmalary beýan edilýär. Diplomat sözüni dowam edip, Azerbaýjan bilen Türkmenistanyň arasyndaky dostluk, strategik hyzmatdaşlyk gatnaşyklarynyň taryhy taýdan umumy köklere, medeniýetleriň ýakynlygyna esaslanýandygyna ünsi çekdi. Türkmen halkynyň Milli Lideri Gurbanguly Berdimuhamedowyň tagallalary, hormatly Prezidentimiz Serdar Berdimuhamedowyň we Azerbaýjan Respublikasynyň Prezidenti Ilham Aliýewiň öňdengörüjilikli syýasaty netijesinde iki doganlyk ýurt bu gün ähli ugurlarda üstünlikli hyzmatdaşlyk edýär.

Şu ýyl iki ýurduň gatnaşyklarynyň taryhynda täze tapgyr açyldy. 2025-nji ýylyň iýulynda türkmen halkynyň Milli Lideriniň Azerbaýjan Respublikasyna amala aşyran sapary syýasy, ykdysady, ynsanperwer ulgamlarda hyzmatdaşlygy has-da çuňlaşdyrmak babatda aýratyn ähmiýete eýe boldy. Oktýabr aýynda Türki Döwletleriň Guramasynyň döwlet Baştutanlarynyň Gabalada geçirilen XII sammitiniň çäklerinde Gahryman Arkadagymyz bilen Prezident Ilham Aliýewiň arasynda bolan duşuşykda ikitaraplaýyn gatnaşyklary pugtalandyrmak, türki dünýäde raýdaşlygy berkitmek meseleleri barada pikir alşyldy.

Doganlyk ýurtlaryň arasyndaky berk binýada daýanýan dostlukly gatnaşyklar Gahryman Arkadagymyzyň ynsanperwer başlangyçlary bilen has-da çuňlaşdyrylýar. Ilçi şular barada aýdyp, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň ynsanperwerlik, sahawatlylyk ýaly iň ýokary ahlak gymmatlyklaryny ösdürmek bilen birlikde, türkmen halkynyň asylly däpleriniň dowamy hökmünde doganlyk halklaryň arasynda ruhy köprini pugtalandyrmak wezipesini hem üstünlikli amala aşyrýandygyny belledi. Türkmen halkynyň Milli Lideriniň başlangyjy esasynda Fizuli şäherinde metjidiň gurluşygyna başlanmagy bu asylly işiň ajaýyp mysalydyr. Şu mynasybetli, Fizuli şäheriniň ýaşaýjylary türkmen halkynyň Milli Lideriniň adyna minnetdarlyk hatyny iberdiler.

10-njy dekabrda “Awaza” milli syýahatçylyk zolagynda geçirilen “Häzirki zaman jemgyýetinde zenanlaryň orny: Durnukly ösüş maksatlaryna ýetmek ugrunda halkara hyzmatdaşlygy ösdürmek” atly halkara maslahat hem aýratyn ähmiýete eýedir. Onuň çäklerinde Geýdar Aliýew gaznasynyň wise-prezidenti Leýla Aliýewanyň we Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň wise-prezidenti Oguljahan Atabaýewanyň arasynda duşuşyk geçirildi. Duşuşygyň netijesinde agzalan iki gaznanyň arasynda özara düşünişmek hakynda Ähtnama gol çekilmegi iki ýurduň arasyndaky ynsanperwer hyzmatdaşlygyň has-da berkidilmeginde möhüm ädim boldy.

Çykyşlaryň dowamynda iki ýurduň ýolbaşçylarynyň tagallalary netijesinde türkmen-azerbaýjan gatnaşyklarynyň hil taýdan täze derejä çykarylýandygy barada anyk maglumatlar esasynda gürrüň edildi. Gahryman Arkadagymyzyň “Hakyda göwheri” atly kitabynyň azerbaýjan diline terjime edilmegi hem iki dostlukly ýurduň arasynda medeni-ynsanperwer gatnaşyklaryň ýygjam häsiýete eýe bolýandygynyň aýdyň güwäsidir. Indi Milli Liderimiziň gymmatly pikirlere baý bu eseri azerbaýjanly okyjylara hem elýeterli boldy. Doganlyk ýurduň kitap söýüjileri bu eser arkaly halkymyzyň dünýä medeniýetine goşan ägirt uly goşandy barada ylmy taýdan delillendirilen maglumatlar bilen öz ene dilinde tanşyp bilerler.

Çykyşlarda “Hakyda göwheri” atly kitabyň azerbaýjan dilinde neşir edilmegi ugrunda tagalla edenleriň ählisine tüýs ýürekden hoşallyk sözleri beýan edildi.