Türkmenistanyň Prezidenti Berkarar döwletiň täze eýýamynyň Galkynyşy döwründe ýurdumyzda her ýylyň oktýabr aýynda Türkmen alabaýynyň baýramy mynasybetli türkmen alabaý itleriniň arasynda geçirilýän “Ýylyň türkmen edermen alabaýy” atly halkara bäsleşigiň ýeňijisini höweslendirmek maksady bilen, Buýruga gol çekdi. Resminama laýyklykda, 2025-nji ýylyň 26-njy oktýabrynda Aşgabat atçylyk sport toplumynyň açyk manežinde türkmen alabaý itleriniň arasynda geçirilen “Ýylyň türkmen edermen alabaýy” atly halkara bäsleşikde 1-nji orny eýeläp, ýeňiji bolan türkmen alabaý itiniň eýesini 2023-nji ýylda öndürilen, ak reňkli “Toyota Camry V6” kysymly ýeňil awtoulag bilen sylaglamak bellenildi.

* * *

Berkarar döwletiň täze eýýamynyň Galkynyşy döwründe ýurdumyzda amala aşyrylýan durmuş-ykdysady özgertmeleri giňden ýaýmak, Türkmenistanyň daşary ýurtlar bilen köpugurly gatnaşyklaryny ösdürmek, häzirki zaman tehnologiýalaryny önümçilige giňden ornaşdyrmak, öňdebaryjy tejribäni alyşmak we ykdysadyýetiň pudaklaryna maýa goýumlary çekmek maksady bilen, Türkmenistanyň Prezidenti Karara gol çekdi. Resminama laýyklykda, ministrlikler we pudaklaýyn dolandyryş edaralary tarapyndan 2026-njy ýylda geçiriljek sergileriň, ýarmarkalaryň, maslahatlaryň we festiwallaryň sanawy hem-de olary geçirmek boýunça guramaçylyk toparynyň düzümi tassyklanyldy.

Ministrliklere we pudaklaýyn dolandyryş edaralaryna degişli çäreleriň ýokary derejede we guramaçylykly geçirilmegini üpjün etmek tabşyryldy.