Baş sahypa
\
Jemgyýet
\
Türkmenistanyň ynsanperwer başlangyçlary — çagalaryň bagtyýar durmuşynyň bähbidine
Jemgyýet
Türkmenistanyň ynsanperwer başlangyçlary — çagalaryň bagtyýar durmuşynyň bähbidine
Çap edildi 03.04.2025
129

Şu gün Aşgabat şäher häkimliginiň “Mekan” köşgünde “Halkara parahatçylyk we ynanyşmak ýyly: agzybirligiň, parahatçylygyň, ynsanperwerligiň, dost-doganlyk gatnaşyklarynyň dünýä ýüzüne dabaralanmasy” atly maslahat geçirildi. Ol 29-njy martda Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahatyň üstünlikli geçirilmegine hoşallygyň beýany boldy. Maslahat Türkmenistanyň Halk Maslahaty, Mejlisi, Daşary işler, Bilim we Medeniýet ministrlikleri tarapyndan bilelikde guraldy.

Maslahat başlanmazdan ozal, “Mekan” köşgüniň eýwanynda medeniýet we sungat ussatlarynyň çykyşlary hem-de sergi ýaýbaňlandyryldy. Munuň özi Garaşsyz Türkmenistanda Gahryman Arkadagymyzyň, Arkadagly Gahryman Serdarymyzyň saýasynda çagalaryň sagdyn we bagtyýar durmuşyny üpjün etmek ugrunda durmuşa geçirilýän asylly işleriň, şol sanda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan işleriniň giň halkara jemgyýetçilik tarapyndan ykrar edilýändiginiň nobatdaky beýanyna öwrüldi.

Soňra köşgüň giň mejlisler zalyndaky sahnada “Çagalaryň saglygy — Watan baýlygy” atly edebi-sazly kompozisiýa görkezildi. Türkmenistanyň Beýik Saparmyrat Türkmenbaşy adyndaky Baş akademiki drama teatrynyň artistleriniň ýerine ýetirmegindäki bu döredijilik çykyşynda bagtyýar çagalygyň ýurdy bolan Watanymyzda durmuşymyzyň gül-gunçalary bolan çagalaryň döwlet tarapyndan aýratyn üns-alada bilen gurşalýandygy çeper beýan edildi. Soňra “Halkara parahatçylyk we ynanyşmak ýyly: agzybirligiň, parahatçylygyň, ynsanperwerligiň, dost-doganlyk gatnaşyklarynyň dünýä ýüzüne dabaralanmasy” atly maslahat öz işine başlady.

Onda çykyşlara giň orun berildi. Çykyş edenler Arkadag şäherinde Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň döredilmeginiň 4 ýyllygy mynasybetli, gaznanyň bejeriş işleri boýunça wise-prezidenti Oguljahan Atabaýewanyň başlyklyk etmeginde üstünlikli geçirilen “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahatyň netijelerine aýratyn ünsi çekdiler.

Maslahatda daşary ýurtlaryň Türkmenistanda işleýän diplomatik wekilhanalarynyň ýolbaşçylarydyr wekilleri hem çykyş etdiler. Olar çykyşlarynda gaznanyň döredilmeginiň 4 ýyllygy mynasybetli guralan halkara forumyň ähmiýetini bellediler hem-de bu giň gerimli çäräniň üstünlikli geçmegi bilen tüýs ýürekden gutladylar. Diplomatlar haýyr-sahawat gaznasynyň başlangyjy bilen Halkara parahatçylyk we ynanyşmak ýylynyň çäklerinde çagalara bagyşlanyp guralan bu maslahatyň Türkmenistanyň BMG-niň ýörelgelerine we maksatlaryna, 2030-njy ýyla çenli döwür üçin durnukly ösüş ulgamynda Gün tertibine, şeýle-de parahatçylyk söýüjilik, adalatlylyk, ynsanperwerlik ýaly umumadamzat gymmatlyklaryna ygrarlydygyny nobatdaky gezek tassyklandygyny bellediler. Şeýle-de olar bu ulgamda öz ýurtlarynyň Türkmenistan bilen hyzmatdaşlyk etmegi üçin uly mümkinçilikleriň bardygyny aýtdylar. “Biziň biri-biriniň üstüni ýetirýän maksatlarymyz hem-de ileri tutýan ugurlarymyz bilelikde hyzmatdaşlyk etmegimiz üçin esas bolup hyzmat edýär” diýip, çykyş edenler nygtadylar.

Çykyşlarda Gahryman Arkadagymyzyň başlangyjy bilen döredilen haýyr-sahawat gaznasynyň maksadynyň kömege mätäç çagalara mähirli garamakdan, olara hossarlyk gözi bilen seretmekden, näsag çagalaryň saglygyny dikeltmäge ýardam etmekden ybaratdygy bellenildi. Mälim bolşy ýaly, hormatly Prezidentimiz Serdar Berdimuhamedow ýurdumyzda her bir maşgalanyň, aýratyn-da, mukaddes ojaklarynyň synmaz sütüni bolan eneleriň, röwşen geljegimiz bolan çagalaryň eşretli durmuşda ýaşamaklary üçin ähli şertleri döretmek babatda yzygiderli tagalla edýär. Çagalaryň sagdyn ösüp kemala gelmegi barada edilýän bu aladalar ynsanperwerligiň belent nusgasydyr.

Maslahatyň dowamynda ýurdumyzyň tanymal zenan aýdymçylary mahmal owazlary bilen oňa gatnaşyjylaryň ruhubelentligini artdyrdylar. Olaryň çykyşlarynda Halkara parahatçylyk we ynanyşmak ýylynda giň gerim alýan asylly işler, Bitaraplyk ýoly bilen öňe barýan Garaşsyz Watanymyz, Arkadagly Gahryman Serdarymyzyň baştutanlygynda halkymyzyň agzybirlikde we jebislikde gazanýan üstünlikleri belent heňde wasp edildi.

Soňky habarlar
04.04
Türkmenistanyň Prezidenti Serdar Berdimuhamedow: «Sebitde üpjünçilik taslamalar toplumyna Ýewropa Bileleşiginiň maýa goýum taýdan täsirli gatnaşmagynyň örän wagtynda ädilen ädim boljakdygyna ynanýaryn»
04.04
Hormatly Prezidentimiz ykdysady ulgamlarda hyzmatdaşlygyň mümkinçiliklerine ýokary baha berýändigini aýtdy
04.04
Türkmenistanyň Prezidenti: «Garaýyşlaryň umumylygyndan ugur alyp, Merkezi Aziýany parahatçylykly, ykdysady taýdan özüne çekiji sebit hökmünde görýäris»
04.04
Hormatly Prezidentimiz Samarkant halkara klimat forumyna gatnaşdy
04.04
Türkmenistanyň Prezidenti «Merkezi Aziýa – Ýewropa Bileleşigi» görnüşindäki birinji sammite gatnaşdy
03.04
Türkmenistanyň Prezidentiniň Özbegistan Respublikasynyň Prezidenti bilen duşuşygy
03.04
Türkmenistanyň Prezidentiniň Özbegistan Respublikasyna iş sapary başlandy
03.04
Türkmenistanyň Prezidentiniň Ýewropanyň täzeleniş we ösüş bankynyň ýolbaşçysy bilen duşuşygy
03.04
Türkmenistanyň Prezidentiniň Ýewropa Geňeşiniň Başlygy bilen duşuşygy
03.04
Türkmenistanyň Prezidenti Ýewropa Komissiýasynyň Başlygy bilen duşuşdy
top-arrow