Şu gün Hazar deňzi institutynda göni wideoaragatnaşyk arkaly Türkmenistanyň Halkara ummanlar instituty bilen (IOI) hyzmatdaşlygynyň geljegine bagyşlanan «tegelek stoluň» başyndaky duşuşyk geçirildi. Türkmenistanyň baky Bitaraplygynyň 25 ýyllygyna gabatlanyp guralan onlaýn duşuşyga IOI-niň we Hazar deňzi institutynyň ýolbaşçylary, ýurdumyzyň Daşary işler ministrliginiň Halkara gatnaşyklary institutynyň, «Türkmendeňizderýaýollary» agentliginiň wekilleri gatnaşdylar. Hormatly Prezidentimiz Gurbanguly Berdimuhamedowyň durmuşa geçirýän syýasatyna laýyklykda, Türkmenistanyň Hazaryň ekologiýa ulgamyny goramakda, aýawly saklamak boýunça geljegi uly taslamalary durmuşa geçirmekde giň hyzmatdaşlygy ýola goýmak hem-de tagallalary birleşdirmek ugrunda çykyş edýändigi nygtaldy. Hazar deňzi sebitinde parahatçylygy, durnuklylygy hem-de ösüşi üpjün etmek şol syýasatyň esasy ugurlarynyň biridir. Duşuşygyň barşynda Hazar deňzini dolandyrmak meselelerine üns berildi, hususan-da, bu täsin deňiz babatda halkara deňiz konwensiýalaryny ulanmak, halkara deňiz hukugy hem-de Türkmenistanyň ýokary okuw mekdepleriniň maksatnamalarynyň çäklerinde ony öwrenmegiň meselelerine garaldy. Halkara ummanlar institutynyň okuw maksatnamalary, guraýan okuwlary hem-de uçurymlaryň hünär okuwynyň dowam etdirilmeginiň mümkinçilikleri ara alnyp maslahatlaşyldy.

*** BMG-niň Ösüş maksatnamasynyň hem-de «Türkmenistanyň gurak sebitlerinde oba hojalyk birleşikleriniň howa babatda durnukly ykdysady işini goldamak» atly bilelikdäki maksatnamasynyň çäklerinde taslamanyň iş toparynyň jemleýji mejlisi geçirildi. Onlaýn görnüşde geçirilen duşuşykda ýurdumyzyň suw we ýer serişdelerini rejeli ulanmak maksady bilen, pudaklaýyn hem-de hukuk guralyny kämilleşdirmek boýunça taslamanyň çäklerinde geçirilen işiň netijeleri ara alnyp maslahatlaşyldy. Mejlise Oba hojalyk we daşky gurşawy goramak ministrliginiň, Suw hojalygy baradaky döwlet komitetiniň hukukçylary we degişli hünärmenleri, Mejlisiň deputatlary, welaýatlaryň häkimlikleriniň hem-de Senagatçylar we telekeçiler birleşmesiniň wekilleri gatnaşdylar. Bellenilişi ýaly, 2017 — 2020-nji ýyllarda iş topary tarapyndan Suw kodeksinden, «Meliorasiýa hakyndaky» Kanundan gelip çykýan kanunçylyk namalarynyň taslamalarynyň birnäçesini taýýarlamak boýunça işler geçirildi hem-de birnäçe resminamalaryň hukuk seljermesini geçirmek we maslahatlary bermek babatda ýardam berildi. Duşuşyga gatnaşyjylar hormatly Prezidentimiz Gurbanguly Berdimuhamedowyň durmuşa geçirýän giň gerimli özgertmeleri bilen baglylykda, milli kanunçylygy kämilleşdirmek boýunça amala aşyrylýan işleriň wajyplygyny nygtap, hyzmatdaşlygy mundan beýläk-de pugtalandyrmaga hem-de täze bilelikdäki taslamalary durmuşa geçirmäge gyzyklanma bildirdiler. *** Ýurdumyzyň birnäçe ministrlikleriniň hem-de pudaklaýyn dolandyryş edaralarynyň işgärleri BMG-niň Ilat gaznasynyň Türkmenistandaky wekilhanasy tarapyndan Türkmenistanyň Prezidentiniň ýanyndaky Döwlet gullugy akademiýasynyň bilelikdäki iş meýilnamasynyň çäklerinde guralan «Demografik çaklama” atly okuw maslahatlarynyň tapgyrlaryna gatnaşdylar. Okuw maslahaty Moskwanyň M.W.Lomonosow adyndaky Döwlet uniwersitetiniň hem-de Ýokary ykdysadyýet mekdebiniň (Russiýa Federasiýasy) esasy hünärmenleriniň çykyşlaryny hem-de tejribe sapaklaryny öz içine aldy. Bu çärä gatnaşmak üçin Türkmenistanyň Prezidentiniň ýanyndaky Döwlet gullugy akademiýasynyň mugallymlary, Statistika baradaky döwlet komitetiniň, Maliýe we ykdysadyýet, Zähmet we ilaty durmuş taýdan goramak, Saglygy goraýyş we derman senagaty ministrlikleriniň wekilleri çagyryldy. Bellenilişi ýaly, BMG-niň iri guramalary hem-de düzümleri bilen hyzmatdaşlyk hormatly Prezidentimiz Gurbanguly Berdimuhamedowyň amala aşyrýan durmuş ugurly syýasatynyň esasy ugurlarynyň biri bolup durýar. Türkmenistanlylaryň bagtyýar durmuşy hem-de abadançylygy, hal-ýagdaýynyň has-da gowulandyrylmagy baradaky hemmetaraplaýyn alada şol syýasatyň esasyny düzýär. Şu babatda web-okuw maslahatlary Diýarymyzyň hünärmenleriniň demografik we durmuş görkezijilerini öwrenmek boýunça geçirýän möhüm işlerinde olaryň hünärini ýokarlandyrmaga ýardam etmelidir. Munuň özi ykdysadyýeti, döwlet we jemgyýetçilik durmuşynyň ähli ulgamlaryny ösdürmek babatda çaklamalary hem-de uzak möhletli maksatnamalary işläp taýýarlamakda göz öňünde tutulýar.