Şu gün ýurdumyzyň Mejlisinde Pakistan Yslam Respublikasynyň Senatynyň başlygy Muhammad Sadyk Sanjrani bilen onlaýn duşuşyk geçirildi. Onda parlamentleriň derejesindäki hyzmatdaşlygyň esasy ugurlary ara alnyp maslahatlaşyldy. Bellenilişi ýaly, hormatly Prezidentimiz Gurbanguly Berdimuhamedow Pakistan bilen dost-doganlyk gatnaşyklarynyň ösdürilmegine uly ähmiýet berýär. Söhbetdeşler netijeli hyzmatdaşlygy ösdürmek üçin ägirt uly mümkinçilikleriň we uly geljegiň bardygyny belläp, iki ýurduň kanunçykaryjy edaralarynyň derejesindäki aragatnaşyklaryň ösdürilmeginiň türkmen-pakistan hyzmatdaşlygynyň möhüm ugrudygyny nygtadylar. Türkmenistanyň milli parlamentiniň täze iki palataly düzümini döretmek bilen baglylykda, biziň ýurdumyzyň daşary syýasat strategiýasyny durmuşa geçirmegiň çäklerinde, tejribe we amaly bilimleri alyşmagyň, olary parlamentara gatnaşyklary berkitmek maksady bilen iş ýüzünde ulanmagyň zerurdygyna üns berildi. Muhammad Sadyk Sanjrani Türkmenistanyň hem-de Pakistanyň parlamentleriniň hyzmatdaşlygynyň häzirki zamanyň sebitde gapma-garşylygy kadalaşdyrmak, ekstremizme we terrorçylyga garşy göreşmek ýaly möhüm meselelerini, howanyň üýtgemegi bilen bagly wezipeleri çözmekde hyzmatdaşlyk edip biljekdiklerine ünsi çekdi. Şeýle hem taraplar halkara derejede, şol sanda Parlamentara birleşigiň çäklerinde özara gatnaşyklaryň meseleleri boýunça pikir alyşdylar. Türkmenistan Watanymyzyň Garaşsyzlygyny ykrar eden we ýurdumyza hemişelik Bitaraplyk derejesiniň berilmegi üçin ses beren ilkinji döwletleriň biri bolan Pakistanyň milli Liderimiz Gurbanguly Berdimuhamedowyň BMG-niň belent münberinden öňe süren başlangyçlaryny işjeň goldaýandygyna ýokary baha berýär. Söhbetdeşler türkmen-pakistan hyzmatdaşlygyny ösdürmek maksady bilen, onuň möhüm ugry bolan parlamentara gatnaşyklary yzygiderli dowam etmek barada ylalaşdylar.