Wise-premýer, Türkmenistanyň daşary işler ministri Reşit Meredowyň Müsür Arap Respublikasynyň daşary işler ministri Sameh Şukri bilen telefon arkaly söhbetdeşligi boldy. Taraplar türkmen-müsür hyzmatdaşlygynyň esasy meseleleriniň birnäçesini ara alyp maslahatlaşdylar. Gepleşikleriň dowamynda syýasy-diplomatik gatnaşyklaryň ýokary derejesi we halkara guramalarynyň, şol sanda BMG-nyň meýdançasynda özara gatnaşyklaryň oňyn häsiýeti nygtaldy. COVID-19 pandemiýasynyň ýetiren durmuş-ykdysady zelelini ýeňip geçmekde tagallalary utgaşdyrmak ara alnyp maslahatlaşylan temalaryň biri boldy. Şu jähtden kemala gelen ýagdaýdan çykmak üçin ylmy, maliýe we beýleki serişdeleri işe girizmegiň möhümligi bellenildi. Iki ýurduň daşary syýasat edaralarynyň ýolbaşçylary söwda-ykdysady gatnaşyklary giňeltmegiň mümkinçilikleri we özara haryt dolanşygynyň oňyn ösüşini saklap galmak barada pikir alyşdylar. Şeýle hem ylym, bilim, medeniýet ulgamlarynda gatnaşyklaryň ugurlary ara alnyp maslahatlaşyldy.