Ýurdumyzyň Ministrler Kabinetiniň mejlisinde 10-njy iýun – 10-njy sentýabr aralygynda Gazagystan Respublikasynyň Astana şäherinde geçiriljek “EKSPO-2017” ýöriteleşdirilen halkara sergisinde türkmen ekspozisiýasyny taýýarlamak meseleleri ara alnyp maslahatlaşyldy. Türkmen Lideri mejlisde milli ekspozisiýanyň şygary hökmünde hödürlenen birnäçe görnüşlere garap, “Tebigat-energiýanyň tükeniksiz çeşmesi” diýen şygary hem-de nyşanlaryň görnüşleriniň birini makullady. Döwlet Baştutanymyz Türkmenistanyň halkara sergisine gatnaşmagynyň esasy maksadynyň diňe forumyň esasy mowzugy -- “Geljegiň energiýasy” diýen mowzugy şöhlelendirmek däl-de, eýsem, “EKSPO-2017”-de Türkmenistanyň aýdyň, täsirli keşbini döretmekden ybaratdygyny belledi. 29-njy iýunda «EKSPO-2017»-de çäklerinde Türkmenistanyň Milli gününi geçirmek göz öňünde tutulýar.