Türkmenistanyň we Eýranyň söwda-ykdysady gatnaşyklarynda iki ýurduň ylmy we senagat kuwwatlyklarynyň ulanylmagynyň möhümdigi barada hormatly Prezidentimiz Gurbanguly Berdimuhamedowyň Eýran Yslam Respublikasynyň ertir, 28-nji fewralda Aşgabatda açylýan XIII ýöriteleşdirilen sergisine gatnaşyjylara iberen gutlagynda aýdylýar. Türkmenistanyň söwda-senagat edarasynyň sergi merkezinde guralýan gözden geçirilişiň çäklerinde ikitarpalaýyn işewürlik maslahaty geçiriler. Onuň gün tertibine hyzmatdaşlygyň meseleleriniň giň ugurlary, şol sanda ýakyn geljek üçin bilelikdäki taslamalar girizildi. 2-nji marta çenli dowam etjek sergä Eýranyň iri kompaniýlarynyň we guramalarynyň 40-a golaýy, Eýranyň Senagat, magdan we söwda ministrliginiň wekilleri gatnaşarlar. Eýran Türkmenistanyň esasy daşary söwda hyzmatdaşlarynyň biri bolup durýar. Türkmenistanyň harytlary eksport edýän ýurtlarynyň hatarynda eýran 2016-njy ýylyň jemleri boýunça ikinji orna düşdi. Türkmenistanyň import gatnaşygynda bolsa Eýran 7-nji orny eýeleýär.