Baş sahypa
\
Syýasy habarlar
\
Parlamentara dialog boýunça netijeli hyzmatdaşlyk ilerledilýär
Syýasy habarlar
Parlamentara dialog boýunça netijeli hyzmatdaşlyk ilerledilýär
Çap edildi 17.11.2026
19

Şu gün paýtagtymyzdaky “Ýyldyz” myhmanhanasynda ÝHHG-niň Parlament Assambleýasynyň bitaraplyk syýasatyna we parlament diplomatiýasyna bagyşlanan ýokary derejeli üçünji Aşgabat maslahatynyň açylyş dabarasy hem-de birinji mejlisi geçirildi. Maslahat Türkmenistanyň Mejlisiniň, Ýewropada Howpsuzlyk we Hyzmatdaşlyk Guramasynyň bilelikde guramagynda geçirilýär. Foruma Türkmenistanyň Mejlisiniň wekilleri, gurama agza döwletleriň parlament ýolbaşçylary, halkara guramalaryň wekilleri, şol sanda ÝHHG-niň Parlament Assambleýasynyň prezidenti Mykyta Poturaýew hem-de Baş sekretary Roberto Montella gatnaşdylar.

Maslahata gatnaşyjylaryň wekilçilikli düzümi dünýäde parahatçylygy, howpsuzlygy, durnuklylygy, ählumumy ösüşi üpjün etmegiň möhüm şerti hökmünde Türkmenistanyň Bitaraplyk hukuk derejesine halkara jemgyýetçilik tarapyndan uly ähmiýet berilýändiginiň aýdyň güwäsidir.

Çykyşlarda Türkmenistanyň hemişelik Bitaraplygy dünýäde BMG-niň Kararnamalary bilen üç gezek ykrar edilen ýeke-täk ýurtdugy aýratyn nygtaldy. Häzirki döwürde bu hukuk derejesinden gelip çykýan esasy ýörelgeler — ählumumy parahatçylygyň we howpsuzlygyň pugtalandyrylmagy, gyzyklanma bildirýän ýurtlardyr hyzmatdaşlar bilen dostlukly gatnaşyklaryň giňeldilmegi Türkmenistanyň alyp barýan parahatçylyk söýüjilikli daşary syýasatynyň esasyny düzýär.

Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň “Dialog — parahatçylygyň kepili” atly ählumumy başlangyjy dünýä halklarynyň parahatçylykda we ynanyşmakda ýaşamak däplerini pugtalandyrmak, parahatçylyk, ynanyşmak medeniýetini halkara gatnaşyklaryň aýrylmaz şerti hökmünde kesgitlemek işinde dünýä jemgyýetçiliginiň tagallalaryny birleşdirmäge gönükdirilendir. Halkara gatnaşyklaryň täze filosofiýasy hökmünde kabul edilýän bu başlangyç BMG-niň Tertipnamasynda göz öňünde tutulan wezipeler bilen sazlaşykly utgaşýar.

Türkmenistan oňyn Bitaraplyk ýörelgelerine esaslanýan daşary syýasaty yzygiderli durmuşa geçirmek bilen, döwletleriň we halklaryň arasyndaky dostlukly gatnaşyklaryň, ählumumy abadançylygyň bähbitlerine laýyk gelýän netijeli halkara hem-de sebit hyzmatdaşlygyny berkitmekde wajyp ähmiýete eýe bolan parlamentara gatnaşyklaryň ösdürilmegine uly üns berýär. Çykyşlarda nygtalyşy ýaly, parlamentara dialog döwletleriň arasynda ynanyşmagy berkitmegiň, diplomatiýany ösdürmegiň netijeli guralydyr. Parlamentariler halklara wekilçilik etmek bilen, parahatçylyga, durmuş bitewüligine, durnukly ösüşe täsir edýän syýasy gurşawy kemala getirmäge hem-de ony has-da ösdürmäge ukyplydyrlar. Parlamentara hyzmatdaşlyk bolsa bu ugurdaky wezipeleri durmuşa geçirmegiň iň amatly nusgasyna, ýurdumyzyň daşary syýasatynyň mazmunynyň has sazlaşykly häsiýete eýe bolýan görnüşine öwrüldi. Parlamentara gatnaşyklar ýurtlaryň we halklaryň arasynda dostlugy berkitmegiň, umumy abadançylygyň bähbitlerine laýyk gelýän netijeli hyzmatdaşlygy giňeltmegiň wajyp şerti bolup çykyş edýär. Türkmenistanyň öňe sürýän parlament diplomatiýasy parahatçylygyň, hyzmatdaşlygyň, özara düşünişmegiň netijeli guralyny döretmäge gönükdirilendir.

Maslahatyň «Özygtyýarlylygyň deňligi we umumy ýörelgeler. Halkara hukugy goldamakda parlament diplomatiýasy» atly birinji mejlisinde ählumumy gün tertibindäki möhüm meseleler, ynanyşmak we birek-birege hormat goýmak diplomatiýasyny işjeň ilerletmek boýunça ýurdumyzyň öňe sürýän başlangyçlarynyň ähmiýeti bellenildi.

Türkmenistan halkara hukugyň berkidilmegi, halkara kadalaşdyryş binýadynyň kämilleşdirilmegi, BMG-niň konwensiýalarynyň, şertnamalarynyň, ylalaşyklarynyň, beýleki köptaraplaýyn resminamalarynyň durmuşa geçirilişiniň netijeliliginiň ýokarlandyrylmagy ugrunda çykyş edýär. Şunuň bilen baglylykda, Türkmenistanyň başlangyjy esasynda 2028-nji ýyly “Halkara hukuk ýyly” diýip yglan etmek hakynda Birleşen Milletler Guramasynyň Baş Assambleýasynyň Kararnamasynyň kabul edilmeginiň parahatçylygyň we hyzmatdaşlygyň halkara hukuk binýatlaryny pugtalandyrmakda täze tapgyry açjakdygyna üns çekildi. Bu başlangyç BMG-niň Tertipnamasynyň ýörelgelerini, wezipelerini amala aşyrmaga, hukuk sowatlylygyny ýokarlandyrmaga, gapma-garşylyklary parahatçylykly ýollar bilen çözmek baradaky borçnamalary berkitmäge mümkinçilik berer. Çykyş edenler ýurdumyzyň bu ugurda alyp barýan anyk işleriniň ähmiýetine ýokary baha bermek bilen, Türkmenistanyň köp ýyllaryň dowamynda sebit we halkara dialogy ösdürmek meselelerinde işjeň orun eýeläp, ÝHHG-niň, beýleki halkara guramalaryň ygtybarly hyzmatdaşy hökmünde çykyş edýändigini nygtadylar.

Çykyşlarda ÝHHG-niň Parlament Assambleýasynyň bitaraplyk syýasatyna we parlament diplomatiýasyna bagyşlanan ýokary derejeli üçünji Aşgabat maslahatynyň ähmiýeti bellenildi. 2023-nji ýylda howpsuzlygy we dialogy öňe sürmekde bitarap döwletleriň orny baradaky pikir alyşma hökmünde binýady goýlan bu başlangyç sebitiň öňünde duran meseleleri çözmek üçin parlamentarileri, bilermenleri, halkara guramalaryň wekillerini birleşdirýän meýdança öwrüldi. Maslahata gatnaşyjylar şu gezekki forumyň ýokary derejede guralandygy üçin türkmen tarapyna hoşallyk bildirdiler. Bu forumyň geçirilmegi Türkmenistanyň dünýä jemgyýetçiliginiň işjeň agzasy hökmünde diňe bir özara gyzyklanma bildirilýän hyzmatdaşlygyň ösdürilmegine gönükdirilen ähmiýetli başlangyçlary öňe sürmek bilen çäklenmän, eýsem, olaryň durmuşa geçirilmegi ugrunda hem tagalla edýändiginiň aýdyň mysalydyr.

18-nji noýabrda maslahat öz işini «Daşky gurşawyň howpsuzlygy, howanyň durnuklylygy we tebigy betbagtçylyklaryň öňüni almak: halkara hukugy we parlament işi», «Tehnologiýalaryň ösüşini öňünden çaklamak: howpsuz, ynsanperwer we demokratik geljek üçin halkara hukugy we parlament dolandyryşy» atly mejlislerde dowam eder. Günüň ikinji ýarymynda ÝHHG-niň Parlament Assambleýasynyň bitaraplyk syýasatyna we parlament diplomatiýasyna bagyşlanan ýokary derejeli üçünji Aşgabat maslahatynyň ýapylyş dabarasy geçiriler.

Soňky habarlar
18.11
Türkmenistanyň Prezidenti Latwiýa Respublikasynyň Prezidentini gutlady
17.11
Türkmenistanyň ulag diplomatiýasy: durnukly ösüşiň bähbidine sebitleri birleşdirip
17.11
Parlamentara dialog boýunça netijeli hyzmatdaşlyk ilerledilýär
16.11
Hökümetara türkmen-gyrgyz toparynyň türkmen böleginiň düzümi tassyklanyldy
16.11
Ýaşlar — Watanyň daýanjy
16.11
TDHÇMB-nyň söwdalarynda geleşikleriň jemi bahasy ABŞ-nyň 2 million 428 müň dollaryndan gowrak boldy
16.11
Türkmenistanyň Magtymguly adyndaky Ýaşlar guramasynyň agzalaryna hem-de Ýaşlar baýragynyň eýelerine
15.11
Türkmenistan parahatçylygyň, abadançylygyň we ösüşiň ýoly bilen täze sepgitleri nazarlaýar
14.11
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz paýtagtymyz boýunça iş saparyny amala aşyrdy
13.11
Türkmenistanyň Ministrler Kabinetiniň mejlisi
top-arrow