Şu gün ýurdumyzda Bütindünýä saglyk güni ýokary ruhubelentlikde bellenilip geçildi. Baýramçylyk mynasybetli geçirilen köpçülikleýin welosipedli ýörişe hormatly Prezidentimiz Serdar Berdimuhamedowyň gatnaşmagy Türkmenistanda parahatçylygyň we durnukly ösüşiň möhüm şertleriniň biri hökmünde sport diplomatiýasynyň yzygiderli ilerledilýändiginiň aýdyň güwäsi boldy.

Halkymyzyň abadan durmuşy baradaky hemmetaraplaýyn alada Gahryman Arkadagymyz tarapyndan başy başlanyp, Arkadagly Gahryman Serdarymyzyň baştutanlygynda yzygiderli durmuşa geçirilýän ýurdumyzyň döwlet syýasatynyň ileri tutulýan ugrudyr. Şunda ilatyň saglygyny goramaga, köpçülikleýin bedenterbiýe-sagaldyş hereketiniň ösdürilmegine, sportuň dürli görnüşleri bilen meşgullanmagy wagyz etmäge aýratyn üns berilýär. Milli Liderimiziň ýolbaşçylygynda işlenip taýýarlanan «Saglyk» Döwlet maksatnamasyna laýyklykda, ilatyň saglygyny berkitmek, ynsan ömrüniň dowamlylygyny uzaltmak, bedenterbiýäni, sporty ösdürmek, sagdyn durmuş ýörelgelerini ornaşdyrmak ugrunda giň möçberli işler amala aşyrylýar. Ýurdumyzda halkara standartlara laýyk gelýän saglygy goraýyş, bejeriş-şypahana, sport düzümleriniň desgalary guruldy we olaryň gurluşygy dowam edýär.

Hormatly Prezidentimiziň baştutanlygynda sport ulgamynda durmuşa geçirilýän özgertmeleriň netijesinde döwrebap stadionlar, sport toplumlary, ugurdaş desgalar gurlup ulanmaga berilýär. Muňa anyk mysal hökmünde paýtagtymyzdaky Olimpiýa şäherçesini görkezmek bolar. Onuň degişli desgalarynda 2017-nji ýylda Ýapyk binalarda we söweş sungaty boýunça V Aziýa oýunlary hem-de beýleki birnäçe iri halkara ýaryşlar üstünlikli geçirildi. Munuň özi ýurdumyzyň türgenleriniň kämilleşmeginde, Watanymyzyň abraýyny dünýäde dabaralandyrmakda möhüm ähmiýete eýedir. Köpetdagyň ajaýyp künjeginde bina edilen, sebitde deňi-taýy bolmadyk Arkadag şäherinde döwrebap sport desgalarynyň toplumynyň bolmagy ýurdumyzda ilatyň, aýratyn-da, ýaş nesliň beden we ruhy taýdan kämil ösmegi üçin döwletimiz tarapyndan giň mümkinçilikleriň döredilýändiginiň güwäsidir.

Diýarymyzda Bütindünýä saglyk güni mynasybetli köpçülikleýin sport çäreleriniň, şol sanda welosipedli ýörişleriň yzygiderli geçirilmegi diňe bir jemgyýetde sagdyn durmuş ýörelgelerini berkitmek bilen çäklenmän, eýsem, Türkmenistanyň sportuň bu görnüşini ösdürmek boýunça halkara başlangyçlarynyň üstünlikli durmuşa geçirilýändigini hem görkezýär. Hormatly Prezidentimiziň şeýle sport çärelerine gatnaşmagy bolsa onuň ähmiýetini has-da artdyrýar.

Häzirki zaman halkara gatnaşyklarynda Türkmenistanyň sport diplomatiýasy döwletimiziň daşary syýasatynyň strategik ugurlarynyň birine öwrüldi. Bu ugur sporty halkara derejede ösdürmegi, ýurtlaryň we halklaryň arasynda parahatçylyk söýüjilikli, dost-doganlyk gatnaşyklaryny pugtalandyrmagy maksat edinýär. Ýurdumyz iri halkara ýaryşlary, köpçülikleýin sport çärelerini geçirmek başlangyçlaryny öňe sürmek bilen, sebitde we dünýäde durnuklylygy saklamakda sportuň diplomatik mümkinçiliklerini netijeli ulanýan döwlet hökmünde ykrar edilýär.

Türkmenistanyň başlangyjy bilen BMG-niň Baş Assambleýasy tarapyndan 2018-nji ýylda Bütindünýä welosiped gününiň esaslandyrylmagy milli sport diplomatiýasynyň halkara derejedäki esasy üstünlikleriniň biridir. 2022-nji ýylda ýurdumyzyň başlangyjy boýunça BMG-niň Baş Assambleýasy tarapyndan «Durnukly ösüşi gazanmak üçin köpçülikleýin welosiped sürmegi jemgyýetçilik ulag ulgamlaryna girizmek» atly Kararnamanyň biragyzdan kabul edilendigini hem bellemek gerek. Bu başlangyçlar sportuň diňe bir beden sagdynlygy däl, eýsem, durnukly ösüş, ekologik howpsuzlyk, ählumumy parahatçylyk üçin hem möhüm gural bolup durýandygyny subut edýär. Ýurdumyzda geçirilýän ýaryşlara daşary ýurtly wekilleriň işjeň gatnaşmagy “Sport arkaly parahatçylyk” ýörelgesiniň aýdyň beýanydyr. Bu bolsa döwletleriň arasynda medeni-ynsanperwer hyzmatdaşlygyň täze mazmun bilen baýlaşmagyna ýardam edýär.

...Irden sport çäresine gatnaşyjylar welosipedli ýörişiň badalga alýan ýeri bolan Çandybil şaýolunyň we Bekrewe köçesiniň çatrygynda ýerleşýän «Welosiped» binasynyň ýanynda ýygnandylar. Şolaryň hatarynda Mejlisiň Başlygy, Ministrler Kabinetiniň Başlygynyň orunbasarlary, ministrlikleriň, pudaklaýyn dolandyryş edaralarynyň, Aşgabat şäheriniň häkimliginiň, jemgyýetçilik guramalarynyň, köpçülikleýin habar beriş serişdeleriniň ýolbaşçylary, ýokary okuw mekdepleriniň rektorlary bar. Şanly sene mynasybetli guralýan köpçülikleýin welosipedli ýörişe daşary döwletleriň we halkara guramalaryň ýurdumyzdaky diplomatik wekilhanalarynyň ýolbaşçylarydyr wekilleri hem gatnaşýarlar. Ýygnananlaryň arasynda welosport boýunça Türkmenistanyň ýygyndy toparynyň türgenleri, talyplar, Ýaş olimpiýaçylary taýýarlaýyş mekdebiniň, umumybilim berýän mekdepleriň okuwçylary, Döwletliler köşgünde terbiýelenýänler, jemgyýetçilik wekilleri bar.

Hemmeler hormatly Prezidentimiz Serdar Berdimuhamedowy mähirli mübärekleýärler. Ýurdumyzyň sungat ussatlary aýdym-sazly, tansly çykyşlary uly ruhubelentlik bilen ýerine ýetirýärler.

Döwlet Baştutanymyz köpçülikleýin welosipedli ýörişe badalga berip, oňa gatnaşyjylaryň kerweniniň öňüni çekdi. Arkadagly Gahryman Serdarymyzyň göreldesine eýerip, hemmeler Çandybil we Bitarap Türkmenistan şaýollarynyň ugry bilen sazlaşykly herekete başladylar. Welosipedli ýörişiň geçýän ugrunda döredijilik toparlarynyň ýerine ýetirmeginde ajaýyp kompozisiýalar ýaýbaňlandyryldy. Olaryň döwlet Baştutanymyzyň beýik işlerini wasp edýän şowhunly çykyşlary ýörişe gatnaşyjylaryň baýramçylyk ruhuny has-da belende göterdi.

Mälim bolşy ýaly, welosipedli ýörişler dünýä ýurtlarynda durmuş we ekologik taslamalary goldamak maksady bilen guralýan jemgyýetçilik ähmiýetli çäreleriň giňden ýaýran görnüşleriniň biridir. Türkmenistanda-da her ýylda guralýan şeýle ýörişlere gatnaşýan raýatlaryň sany barha artýar. Welosport fiziki işjeňligi arassa howada dynç almak bilen utgaşdyrmaga mümkinçilik berýär. Sportuň bu görnüşi ähli ýaşdaky adamlar üçin elýeterlidir. Welosport bilen yzygiderli meşgullanmak ýürek we gan aýlanyş ulgamyny, bedeniň umumy çydamlylygyny berkitmäge ýardam berýär. Mundan başga-da, welosport Durnukly ösüş maksatlaryna ýetmekde möhüm orny eýeleýär. Munuň özi Türkmenistanyň «ýaşyl» gün tertibini ilerletmek bilen bagly öňe sürýän başlangyçlary, hususan-da, howanyň üýtgemegine garşy göreşmek boýunça ählumumy tagallalar bilen sazlaşykly utgaşýar. Welosipedli ýörişler ekologik diplomatiýanyň we sportuň jebisleşdiriji güýjüniň özboluşly nusgasyny emele getirýär.

Sportuň jemgyýetçilik durmuşyndaky orny barha artyp, ol täze nesliň dünýägaraýşynyň kemala gelmegine täsir edýär. Welosipedde gezelenç etmek çagalaryň sagdyn ösüşine oňyn täsirini ýetirýär. Türkmenistanda çagalaryň saglygyny berkitmek meselesine uly ähmiýet berilýär. Hususan-da, döwlet goldawyna mätäç ýaşajyk raýatlarymyz üns-alada bilen gurşalýar. Gahryman Arkadagymyzyň başlangyjy esasynda döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bu babatda giň gerimli işleri alyp barýandygy bellenilmäge mynasypdyr.

Jemgyýetde sagdyn durmuş ýörelgelerini berkitmegi döwlet syýasatynyň strategik ugurlarynyň biri hökmünde kesgitlän Gahryman Arkadagymyz we hormatly Prezidentimiz sportuň dürli görnüşleri bilen yzygiderli meşgullanyp, ildeşlerimize görelde bolýarlar. Munuň özi türgenleri halkara ýaryşlarda ýeňiş gazanmaga ruhlandyrýar. Olaryň üstünlikleri ýurdumyzda bu ugurda durmuşa geçirilýän çäreleriň netijeli häsiýete eýedigini tassyklaýar hem-de Türkmenistanyň halkara sport giňişligindäki abraýyny pugtalandyrýar.

Döwlet Baştutanymyz ýurdumyzda Olimpiýa hereketiniň ösdürilmegine möhüm ähmiýet berýär. Häzirki wagtda Türkmenistan diňe bir sebit däl, eýsem, bütin dünýäde sportuň parahatçylyk döredijilik ukybyny işjeň ulanýan döwlet hökmünde ykrar edilýär. Ýurdumyz halkara sport hyzmatdaşlygynyň çäklerinde Halkara Olimpiýa Komiteti, BMG-niň Ösüşiň we parahatçylygyň bähbidine sport boýunça halkara býurosy, ÝUNESKO-nyň Bedenterbiýe we sport boýunça hökümetara komiteti, Aziýanyň Olimpiýa Geňeşi bilen gatnaşyklary işjeň ösdürýär. Türkmenistanyň 2023 — 2027-nji ýyllar üçin ÝUNESKO-nyň Bedenterbiýe we sport boýunça hökümetara komitetiniň agzalygyna biragyzdan saýlanylmagy ýurdumyzyň sport diplomatiýasynyň üstünliklere beslenýändiginiň aýdyň güwäsi boldy. Paýtagtymyz Aşgabadyň «Arkalaşygyň täze sport mümkinçilikleriniň şäheri» diýlip yglan edilmegi Türkmenistanyň sebitde sport hyzmatdaşlygyny ösdürmäge goşýan goşandynyň nobatdaky ykrarnamasydyr.

Bütindünýä saglyk gününiň giň gerimde bellenilmegi ýurdumyzyň halkara sport giňişligine goşulyşmagynyň täze tapgyryna geçendigini görkezýär. Bu syýasat sportuň üsti bilen ynanyşmak dialogyny pugtalandyrmaga we medeniýetleriň arasynda özara düşünişmegi berkitmäge gönükdirilendir. Bitarap Türkmenistanyň durmuşa geçirýän sport diplomatiýasyny häzirki döwrüň Olimpiýa hereketini esaslandyryjy Pýer de Kuberteniň “Sporta waspnamasyndaky” meşhur sözleriniň aýdyň beýany hökmünde häsiýetlendirmek bolar. Bu senada parahatçylygyň, döredijiligiň, ösüşiň, şatlygyň we sagdyn durmuş ýörelgeleriniň maksatlary, ýaşlygyň, ýeňşe bolan ymtylmanyň ruhy “Sport! Sen — parahatçylyk!” diýen sözler bilen wasp edilýär. Olimpiýa oýunlarynyň “Bilelikde has çalt, has ýokary, has güýçli” diýen şygary sportuň adamlaryň arasynda raýdaşlygy, dostlugy pugtalandyrmakda möhüm ähmiýete eýedigini tassyklaýar.

Mälim bolşy ýaly, welosport hem sportuň Olimpiýa görnüşleriniň biri bolmak bilen, ulagyň ekologik taýdan iň arassa görnüşidir. Şonuň üçin-de hereket etmegiň, gezelenç etmegiň, sport bilen meşgullanmagyň serişdesi hökmünde welosipedi saýlap alyp, adam diňe bir öz saglygyny berkitmän, eýsem, daşky gurşawy aýawly saklamaga-da goşant goşýar. Türkmen halky asyrlaryň dowamynda tebigata aýawly çemeleşmegiň, onuň bilen sazlaşykly ýaşamagyň özboluşly ýörelgelerini kemala getiripdir. Bu ýörelgeler Berkarar döwletiň täze eýýamynyň Galkynyşy döwründe mynasyp dowam etdirilýär. Gahryman Arkadagymyzyň ýurdumyzda ekologik abadançylygy üpjün etmek boýunça asylly başlangyçlarynyň häzirki wagtda Arkadagly Gahryman Serdarymyzyň baştutanlygynda üstünlikli durmuşa geçirilmegi esasynda Watanymyzyň tebigatyny we onuň gözelligini aýawly saklamak, daşky gurşawy, ilatyň ýaşaýyş-durmuş şertlerini has-da gowulandyrmak döwlet syýasatynyň ileri tutulýan ugurlarynyň biri bolup durýar.

Milli hem-de ählumumy derejede ekologik abadançylygy üpjün etmek maksady bilen, ýurdumyzda Milli tokaý maksatnamasy üstünlikli amala aşyrylýar. Soňky ýyllarda Diýarymyzyň dürli künjeklerinde, şol sanda paýtagtymyzyň töwereginde köpçülikleýin bag nahallaryny ekmek asylly däbe öwrüldi. Halk köpçüliginiň işjeň gatnaşmagynda ýaz hem-de güýz pasyllarynda geçirilýän ählihalk bag ekmek dabaralarynyň dowamynda her ýylda millionlarça düýp bag nahaly ekilýär. Türkmenistan ekologiýa ulgamynda halkara hyzmatdaşlygy hem işjeň ösdürýär. Birleşen Milletler Guramasynyň daşky gurşaw boýunça konwensiýalarynyň onlarçasyna goşulan ýurdumyz durnukly ösüş babatda dünýä jemgyýetçiliginiň öňünde durýan meseleleri çözmäge jogapkärçilikli çemeleşýär.

...Welosipedli ýörişiň dowamynda hormatly Prezidentimiz Serdar Berdimuhamedow sagdyn durmuş ýörelgelerine eýermekde ildeşlerimize görelde bolmak bilen, hemişe bolşy ýaly, ýokary beden we sport taýýarlygyny görkezdi. Bütindünýä saglyk güni mynasybetli guralan köpçülikleýin welosipedli ýöriş şäheriň merkezi böleginde — Ruhyýet köşgüniň ýanynda tamamlandy.

Döwlet Baştutanymyz bu ýerde welosipedli ýörişe gatnaşyjylara ýüzlenip, halk köpçüligini, aýratyn-da, ýaşlary mundan beýläk-de bedenterbiýe, sport bilen yzygiderli meşgullanmaga çekmek, jemgyýetde sagdyn durmuş ýörelgelerini berkitmek boýunça toplumlaýyn işleri dowam etdirmegiň zerurdygyny nygtady.

Ministrler Kabinetiniň agzalary ýurdumyzda giňden bellenilýän Bütindünýä saglyk güni bilen hormatly Prezidentimiz Serdar Berdimuhamedowy hem-de türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzy tüýs ýürekden gutladylar.

Soňra hormatly Prezidentimiz sport-sagaldyş çäresine gatnaşanlara berk jan saglyk, üstünlik arzuw edip, hemmeler bilen mähirli hoşlaşdy hem-de bu ýerden ugrady.

Şeýlelikde, paýtagtymyzda geçirilen köpçülikleýin welosipedli ýöriş halkymyzyň agzybirliginiň we jebisliginiň, Garaşsyz, baky Bitarap Watanymyzyň ynsanperwer gymmatlyklara, saýlap alan döredijilik ýoluna ygrarlydygynyň aýdyň güwäsi bolmak bilen, ýurdumyzda her bir raýatyň saglygynyň döwletiň iň ýokary gymmatlygy bolup durýandygyny nobatdaky gezek tassyklady.

***

Şu gün Bütindünýä saglyk güni mynasybetli diňe bir paýtagtymyzda däl, eýsem, Arkadag şäherinde, ýurdumyzyň ähli welaýatlarynda hem köpçülikleýin welosipedli ýörişler guraldy. «Tegelek stol» duşuşyklary, maslahatlar, ylmy-amaly maslahatlar, sportuň dürli görnüşleri boýunça ýaryşlar we görkezme çykyşlary, wagyz-nesihat, bedenterbiýe-sagaldyş, medeni çäreler geçirildi. Bu çäreler bilim alýan ýaşlary, edara-kärhanalaryň işgärlerini, türgenleri bir ýere jemledi.