Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň parasatly başlangyçlary, taýsyz tagallalary we bimöçber goldawlary esasynda Türkmenistanda ynsanperwer ugurda ägirt uly işler amala aşyrylýar. Bu ugurda eneligi we çagalygy goramagyň netijeli ulgamy döredilip, ýaş nesliň sazlaşykly ösüşini üpjün etmek, saglygyny berkitmek boýunça döwlet maksatnamalary üstünlikli durmuşa geçirilýär. Bu asylly ýörelgeden ugur alyp, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň alyp barýan ynsanperwer işlerini hem-de döwletimizde amala aşyrylýan ynsanperwer häsiýetli çäreleri Halkara parahatçylyk we ynanyşmak ýylynda has-da dabaralandyrmak, Türkmenistanyň bu şanly ýylyň dowamyndaky ynsanperwer ugurly hem-de eneligi we çagalygy goramak barada amala aşyrýan işlerini dünýä jemgyýetçiligine wagyz etmek, bu ugurdaky netijeli hyzmatdaşlygy ösdürmek we pugtalandyrmak barada alnyp barylýan işleri mundan beýläk-de dowam etdirmek maksady bilen, Türkmenistanyň Prezidenti Karara gol çekdi. Resminama laýyklykda, Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna Daşary işler ministrligi, Arkadag şäheriniň häkimligi bilen bilelikde Arkadag şäherinde 2025-nji ýylyň 29-njy martynda «Parahatçylyk we ynanyşmak ýyly: çagalaryň hatyrasyna halkara işiniň ösüşi» atly halkara maslahatyň ýokary derejede we guramaçylykly geçirilmegini üpjün etmek tabşyryldy.