Şu gün Arkadag şäheriniň köpugurly hassahanasynda geçirilen “Türkmenistanyň lukmanlarynyň jemgyýetçilik guramasy” atly halkara ylmy maslahat bu täsin “akylly” şäheriň birinji tapgyrynyň ulanmaga berilmegi mynasybetli geçirilýän dabaraly çäreleriň dowamyna öwrüldi.

Türkmenistanyň Saglygy goraýyş we derman senagaty ministrligi tarapyndan guralan foruma ýurdumyzyň saglygy goraýyş ulgamynyň edaralarynyň ýolbaşçylary we işgärleri, daşary ýurtly myhmanlar — kompaniýalaryň wekilleri, Germaniýanyň, Russiýanyň, Belarusuň, Türkiýäniň, Eýranyň we beýleki ýurtlaryň öňdebaryjy hassahanalarynyň, institutlarynyň professorlary we hünärmenleri gatnaşdylar.

Umumy pikire görä, durmuşyň ähli ulgamlarynda innowasion sanly tehnologiýalar ornaşdyrylan Merkezi Aziýa sebitinde ýeke-täk täze “akylly” şäheriň açylmagy Garaşsyz, hemişelik Bitarap Türkmenistanyň ýyl ýazgysyna taryhy ähmiýetli waka hökmünde altyn harplar bilen ýazylar.

Türkmenistanyň Konstitusiýasy tarapyndan jemgyýetiň we döwletiň iň ýokary gymmatlygy diýlip yglan edilen adamyň bagtyýar hem-de abadan durmuşynyň üpjün edilmegi hormatly Prezidentimiz Serdar Berdimuhamedowyň, türkmen halkynyň Milli Lideri, Halk Maslahatynyň Başlygy Gurbanguly Berdimuhamedowyň esasy aladasydyr. Şu maksat bilen, Berkarar döwletiň täze eýýamynyň Galkynyşy döwründe ilatyň ýaşaýyş-durmuş derejesini dünýä ölçeglerine laýyk getirmäge gönükdirilen syýasy, ykdysady, medeni-durmuş özgertmeler üstünlikli amala aşyrylýar. Türkmen halkynyň Milli Lideri Gurbanguly Berdimuhamedowyň başlangyjy esasynda, häzirki zaman binagärliginiň, şäher gurluşygynyň we ylmynyň öňdebaryjy çözgütleri esasynda gurlan Arkadag şäheri munuň aýdyň mysalydyr.

Ýurdumyzyň taryhynda ilkinji gezek döwlet ähmiýetli şäher diýen aýratyn hukuk derejesine kanun esasynda eýe bolan “akylly” şäheriň peýda bolmagy häzirki döwrüň talaplaryna laýyk gelýän nusgalyk şäherleri we şäherçeleri gurmagyň ýolundaky möhüm ädim boldy. “Geljegiň şäheri” diýlip ykrar edilen Arkadag şäheri jemgyýetçilik saglygyny goramak, öňdebaryjy usullary we tehnologiýalary, şol sanda sanly lukmançylygy üstünlikli ornaşdyrmak babatda görülýän düýpli çäreleriň hem aýdyň görkezijisi boldy. Arkadag şäheriniň köpugurly hassahanasyna Germaniýa Federatiw Respublikasynyň “KTQ International GmbH” kompaniýasynyň şahadatnamasynyň, şeýle hem “Philips” enjamlary bilen üpjün edilen sebitiň ýokary tehnologiýaly hassahanasy” atly güwänamanyň berilmegi munuň subutnamasydyr. Çykyşlarda täze şäheriň durmuş düzüminde halkara ölçeglere laýyk gelýän lukmançylyk edaralarynyň bardygy bellenildi. Şolaryň hatarynda 350 orunlyk köpugurly hassahana, 150 orunlyk onkologiýa merkezi, 150 orunlyk Enäniň we çaganyň saglygyny goraýyş merkezi, “Tiz kömek” merkezi, saglyk öýi, şeýle hem ýöriteleşdirilen awtoulag serişdeleriniň dürli görnüşleri bilen üpjün edilen Awtoulaglar kärhanasy bar. Dünýäniň öňdebaryjy kompaniýalarynyň döwrebap lukmançylyk enjamlary bilen üpjün edilen bu desgalaryň ählisi Arkadag şäheriniň Saglygy goraýyş müdirliginiň garamagyndadyr. Müdirlik geçirilýän öňüni alyş we bejeriş çäreleriniň hilini we netijeliligini ýokarlandyrmaga, ýokarda ady agzalan edaralaryň sazlaşykly işini üpjün etmäge gönükdirilen guramaçylyk-gözegçilik işini amala aşyrýar.

Täze şäherde bilim ugruna hem uly üns berlipdir. Saçly Dursunowa adyndaky lukmançylyk orta hünär okuw mekdebi ýaşlara saýlap alan hünärini öwrenmäge we ele almaga giň mümkinçilikleri döreder. Şunuň bilen birlikde, ilatyň saglygyny pugtalandyrmak boýunça alnyp barylýan işler köpçülikleýin bedenterbiýe-sagaldyş, sport hereketini giňden wagyz etmek hem-de ösdürmek, bu herekete ilaty, ilkinji nobatda, ýaşlary giňden çekmek boýunça görülýän çäreler bilen berk baglanyşyklydyr.

Şu maksatlar bilen, Arkadag şäheriniň Bedenterbiýe we sport baradaky baş müdirligi döredildi, degişli enjamlar bilen üpjün edilen köpugurly sport toplumy we sport merkezi, 10 müň orunlyk stadion guruldy. Bularda sportuň başa-baş görnüşleri, futbol, woleýbol, basketbol, tennis, agyr we ýeňil atletika, gimnastika, küşt, şaşka, sportuň suwdaky görnüşleri bilen meşgullanmak üçin ähli şertler döredilipdir.

“Akylly” şäherde mümkinçilikleri çäkli adamlar üçin hem ähli zerur şertleriň göz öňünde tutulandygyny bellemek möhümdir. Durmuş ugurly syýasaty alyp barýan döwletimiz olara hemmetaraplaýyn goldaw berýär. Türkmen halkynyň Milli Lideriniň başlangyjy bilen döredilen Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasy ene-atasyndan jyda düşen we aýratyn durmuş goldawyna mätäç bolan ýaşajyk raýatlarymyz baradaky aladany baş maksat edinýän uly işleri amala aşyrýar. Onuň ştab-kwartirasy Arkadag şäheriniň çagalar sagaldyş-dikeldiş merkeziniň edara binasynda ýerleşýär.

Gaznanyň bank hasabyna gelip gowuşýan serişdeler çagalara lukmançylyk we bilim hyzmatlaryny amala aşyrmaga, olaryň doly derejeli dynç almaklary üçin mümkinçilikleri döretmäge, beýleki zerurlyklara gönükdirilýär. Munuň özi Türkmenistanda halkyň saglygy we rowaçlygy baradaky aladanyň “Döwlet adam üçindir!” diýen ýörelgäni baş şygar edinýän döwlet syýasatynyň ileri tutulýan ugrudygyna şaýatlyk edýär.

Forumdaky çykyşlarda bellenilişi ýaly, soňky ýyllarda Türkmenistanda adamyň saglygyny goramak we milli saglygy goraýyş ulgamyny yzygiderli kämilleşdirmek babatda uly işler amala aşyryldy. Türkmen halkynyň Milli Lideri Gurbanguly Berdimuhamedowyň ýolbaşçylygynda işlenip taýýarlanylan “Saglyk” Döwlet maksatnamasynda göz öňünde tutulan çäreleriň üstünlikli durmuşa geçirilmegi netijesinde, Berkarar döwletiň täze eýýamynyň Galkynyşy döwründe ýurdumyzda ilatyň ortaça ömür dowamlylygy yzygiderli ýokarlanýar, pudagyň düzümleri döwrebaplaşdyrylýar, innowasion tehnologiýalar, lukmançylyk ulgamyndaky öňdebaryjy dünýä tejribesi işjeň ornaşdyrylýar.

Ýokary derejeli hünärmenleriň ýetişdirilmegi hem-de daşary ýurtly önüm öndürijileriň öňdebaryjy enjamlarynyň giňden ornaşdyrylmagy netijesinde, türkmenistanlylara lukmançylyk hyzmatlarynyň dürli görnüşleri elýeterli boldy. Ýurdumyzyň şäherleriniň we obalarynyň depginli ösdürilmegini göz öňünde tutýan özgertmeler maksatnamalaryna laýyklykda, Watanymyzyň ähli künjeklerinde häzirki zaman saglygy goraýyş desgalary, lukmançylyk merkezleri, şypahanalar gurulýar. Iri halkara guramalar, şol sanda BMG we onuň düzüm birlikleri — Bütindünýä Saglygy Goraýyş Guramasy, Çagalar gaznasy, Ilat gaznasy, şeýle hem iri lukmançylyk edaralary, ylmy-barlag merkezleri bilen hyzmatdaşlyk ýylsaýyn pugtalandyrylýar.

Türkmenistanyň lukmanlarynyň jemgyýetçilik guramasynyň işi hem milli saglygy goraýyş ulgamyny mundan beýläk-de kämilleşdirmäge, ilata hödürlenilýän lukmançylyk hyzmatlarynyň görnüşlerini giňeltmäge we dünýä ölçeglerine laýyklykda olaryň hilini ýokarlandyrmaga, ýokary hünär derejeli işgärleri taýýarlamaga ýardam bermäge gönükdirilendir. Bu düzüm “Jemgyýetçilik birleşikleri hakynda” Türkmenistanyň Kanuny esasynda hem-de raýatlaryň saglygynyň goralmagyny üpjün etmek, dünýä we milli lukmançylygyň toplanan oňyn tejribesini giňden ulanmak, bu ulgamda kabul edilen döwlet maksatnamalaryny durmuşa geçirmek maksady bilen, geçen ýylyň ahyrynda döredildi.

Maslahatyň dowamynda ýurdumyzyň saglygy goraýyş ulgamynyň gazanan üstünlikleri, onuň öňünde durýan ilkinji nobatdaky wezipeler, ähli gyzyklanma bildirýän hyzmatdaşlar bilen tejribe alyşmak we halkara hyzmatdaşlygy mundan beýläk-de pugtalandyrmak üçin bar bolan mümkinçilikler beýan edildi. Bellenilişi ýaly, anyklaýyş we bejeriş işi yzygiderli kämilleşdirilýär. Şoňa görä-de, ýurdumyzyň lukmanlarynyň ulanylýan täze, öňdebaryjy usullar barada hemişe habardar bolmaklary zerurdyr. Şunuň bilen baglylykda, Türkmenistanda yzygiderli esasda geçirilýän ylmy-amaly geňeşmelere hem-de tejribe alyşmak boýunça duşuşyklara işjeň gatnaşýan görnükli daşary ýurt alymlaryna we lukmanlara aýratyn hoşallyk bildirildi.

Şu günki şanly waka mynasybetli tapawutlanan saglygy goraýyş işgärlerine ýadygärlik sowgatlar hem-de Gahryman Arkadagymyzyň “Ömrümiň manysynyň dowamaty” atly kitaby gowşuryldy.

Halkara ylmy maslahatyň ahyrynda oňa gatnaşyjylar hormatly Prezidentimiz Serdar Berdimuhamedowyň we türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň adyna Ýüzlenme kabul etdiler.