Medeniýet hepdeliginiň çäklerinde çäreler dowam edýär. Şu günüň meýilnamasy sungat ussatlarynyň, ýaş artistleriň aýdym-sazly we folklor çykyşlary bilen utgaşdy.

Şu gün ir bilen Maýa Kulyýewa adyndaky Türkmen milli konserwatoriýasynyň ýanyndaky Ýörite sazçylyk mekdep-internaty körpeleriň «Bagtyýar çagalyk» atly çykyşyna tomaşa etmäge bu iri döredijilik çäresine gatnaşyjylary çagyrdy. Bu baýram däp-dessurlarymyzyň üýtgewsiz dowamatlylygyny açyp görkezýär, şunuň netijesinde milli medeniýetimiz saklanyp galdy.

Ýaş ýerine ýetirijiler myhmanlary aýdym-sazly, horeografik we folklor çykyşlary bilen begendirdiler. Olar zehinlerini, ýerine ýetirijilik ussatlyklaryny görkezdiler we saz gurallaryna ussatlarça erk edip tomaşaçylarda uly täsir galdyrdylar. Medeni toparlaryň agzalary çykyşlarynda Watanymyzy, ülkämiziň ajaýyp tebigatyny, milli däp-dessurlarymyzy, bagtyýar çagalygy wasp etdiler. Tomaşaçylar ýaş artistleri el çarpyşmalar bilen goldadylar.

Giň gerimli döredijilik forumynyň çäklerinde Türkmenistanyň Döwlet medeniýet merkeziniň Döwlet kitaphanasynda Magtymguly Pyraga bagyşlanan goşgularyň çeper okaýyşlary hem-de ýaş şahyrlaryň we žurnalistleriň «Ylham joşguny» atly döredijilik maslahaty geçirildi.

Bu çärelere Magtymgulynyň döredijiliginiň sarpa goýýanlaryň köpsanlysy, ylym we medeniýet işgärleri, ýazyjylar we žurnalistler, halk aýdym-sazlaryny ýerine ýetirijiler gatnaşdylar. Ol Türkmenistanda eýýäm meşhur bolan söz ussatlaryny, şeýle hem şygryýet älemine ýaňy gadam basan şahyrlary bir ýerde jemledi. Foruma ýurdumyzyň ähli künjeklerinden döredijilik işgärleriniň gatnaşmagy giňden tejribe alyşmaga, olaryň hünär derejesini ýokarlandyrmaga ýardam berýär.

Agşam aşgabatlylar we paýtagtymyzyň myhmanlary Türkmenistanyň Döwlet sirkinde guralan baýramçylyk dabaralaryna – «Galkynyş» Milli at üstündäki oýunlar toparynyň, howa akrobatlarynyň, darbazlaryň, masgarabazlaryň çykyşlaryna tomaşa etdiler.

Döredijilik forumynyň üçünji güni «Türkmengaz» döwlet konserniniň Medeni-işewürlik merkezinde Lebap we Mary welaýatlarynyň sungat ussatlarynyň konserti bilen jemlendi.