Onuň Alyhezreti, 
Türkmenistanyň Prezidenti 
jenap Serdar BERDIMUHAMEDOWA

Jenap Prezident!

Döwletlerimiziň arasyndaky dostlukly gatnaşyklary pugtalandyrmak maksady bilen, biz jenap Mişel Pitermansy — Leopold II ordeniniň kawalerini Belgiýa Patyşalygynyň Türkmenistandaky Adatdan daşary we Doly ygtyýarly ilçisi wezipesine bellemek kararyna geldik. Jenap Pitermansyň ýokary şahsy häsiýetleri, wepadarlygy, ozalky eýelän wezipelerinde görkezen erjelligi we ukyp-başarnyklary öz üstüne ýüklenen wezipesini Siziň Alyhezretiňiziň makullamagyna mynasyp derejede ýerine ýetirjekdigine ynam döredýär.

Ony hoşniýetli kabul etmegiňizi we Size biziň adymyzdan ähli beýan etjeklerine, hususan-da, Siziň Alyhezretiňize belent sarpa goýýandygymyz baradaky ynandyrmalarymyzy ýetirende ynanmagyňyzy haýyş edýäris.

FILIPP,
Belgiýanyň Patyşasy.

***

Şu gün hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Belgiýa Patyşalygynyň Türkmenistandaky Adatdan daşary we Doly ygtyýarly ilçisi Mişel Pitermansdan ynanç hatyny kabul etdi.

Milli parlamentiň ýolbaşçysy döwlet Baştutanymyzyň adyndan ilçini jogapkärli wezipä bellenilmegi bilen gutlap, dostlukly döwletara dialogy pugtalandyrmak işinde oňa üstünlikleri arzuw etdi. Döwletlerimiziň arasyndaky gatnaşyklar ikitaraplaýyn we köptaraplaýyn esasda, ilkinji nobatda, iri halkara guramalaryň hem-de düzümleriň ugurlary boýunça işjeň ösdürilýär.

Diplomat türkmen topragynda bildirilen myhmansöýerlik üçin hoşallygyny beýan edip, öz gezeginde, Belgiýanyň Patyşasynyň hoşniýetli arzuwlaryny we mähirli salamyny ýetirdi. Ilçi özüniň hemişelik Bitaraplyk hukuk ýagdaýyna esaslanýan döredijilikli daşary syýasaty netijesinde belent halkara abraýa eýe bolan döwletde Belgiýa Patyşalygyna wekilçilik etmegiň özi üçin uly hormatdygyny nygtady.

Duşuşygyň çäklerinde dostlukly ýurduň doly ygtyýarly wekili Garaşsyz, hemişelik Bitarap Türkmenistanyň içeri we daşary syýasatynyň esasy ugurlary, döwlet Baştutanymyzyň başyny başlan giň gerimli özgertmeleri, parahatçylygyň, durnuklylygyň, ählumumy abadançylygyň pugtalandyrylmagyna gönükdirilen iri halkara taslamalar bilen tanyşdyryldy. Hormatly Prezidentimiz Serdar Berdimuhamedowyň baştutanlygynda durmuşa geçirilýän we milli ykdysadyýetimiziň innowasion esasda diwersifikasiýalaşdyrylmagyna, döwrebap infrastrukturalaryň döredilmegine, halkymyzyň ýaşaýyş-durmuş derejesiniň yzygiderli ýokarlandyrylmagyna gönükdirilen durmuş-ykdysady maksatnamalara aýratyn üns çekildi.

Şeýle hem diplomat türkmen parlamentiniň düzümi we amala aşyrylýan giň möçberli özgertmeler bilen baglylykda, onuň köpugurly işi bilen tanyşdyryldy. Şunuň bilen baglylykda, kanun çykaryjylyk ulgamynda parlamentara gatnaşyklary işjeňleşdirmäge, halkara guramalaryň hem-de düzümleriň ugry boýunça hyzmatdaşlygy ösdürmäge özara gyzyklanma bildirildi.

Duşuşygyň ahyrynda Belgiýa Patyşalygynyň Adatdan daşary we Doly ygtyýarly ilçisi durmuş-ykdysady ösüşiň ileri tutulýan ugurlaryny, iki döwletiň we olaryň dostlukly halklarynyň milli bähbitlerini nazara almak esasynda ýola goýulýan köpugurly dialogy mundan beýläk-de pugtalandyrmak üçin ähli tagallalary etjekdigine ynandyrdy.