Onuň Alyhezreti,
Türkmenistanyň Prezidenti
jenap Gurbanguly Berdimuhamedowa

Hormatly jenap Prezident, gadyrly doganym!

Siziň Alyhezretiňizi Türkmenistanyň Garaşsyzlygyny ilkinji bolup ykrar eden hem-de döwletiňizde ilçihanasyny ilkinji açan ýurduň Prezidenti hökmünde diplomatik gatnaşyklarymyzyň ýola goýulmagynyň 30 ýyllygy mynasybetli tüýs ýürekden gutlaýaryn!

Ata Watanymyz Türkmenistanyň Garaşsyzlygyny gazanandan bäri geçen 30 ýylyň dowamynda özara hormat goýmaga, umumy bähbitlere we deňhukukly hyzmatdaşlyga esaslanýan gatnaşyklarymyz ähli ugurlarda pugtalandyryldy. Türkmenistanyň Türki Döwletleriň Guramasyna synçy derejesinde goşulmagy ikitaraplaýyn hem-de sebit hyzmatdaşlygymyza täze, kuwwatly itergi berdi. Dilimiziň, gadymyýete uzaýan köklerimiziň umumylygy hem-de mähirli gatnaşyklar bizi özara bähbitlerden has wajyp bolan ruhy baglanyşyk bilen jebisleşdirýär.

Türkmenistan 30 ýylyň içinde biziň ýurdumyzyň, şeýle hem halkara jemgyýetçiligiň giň goldawyna eýe bolan hemişelik Bitaraplyk syýasaty hem-de öz Arkadagynyň baştutanlygynda durmuşa geçirýän netijeli we jogapkärli işleri bilen sebitde durnuklylygyň we rowaçlygyň pugtalandyrylmagynda uly orun eýeledi.

Siziň parasatly baştutanlygyňyzda taryhy özgertmelere hem-de rowaçlyga beslenýän Türkmenistana geçen ýyl bolan saparymyň hem-de Siziň Alyhezretiňiziň Türki Döwletleriň Guramasynyň sammitine gatnaşmak üçin Türkiýä saparyňyzyň netijesinde täze, depginli ösüşe eýe bolan türk-türkmen gatnaşyklarynyň mundan beýläk-de ähli ugurlar bilen ösdüriljekdigine doly ynanýaryn. Doganlar dek egin-egne berip duranymyzda, ýetilmejek hiç bir sepgit bolmaz hem-de gadymdan gelýän doganlyk gatnaşyklarymyzy mundan beýläk-de pugtalandyrmagy we ösdürmegi dowam ederis.

Diplomatik gatnaşyklarymyzyň ýola goýulmagynyň 30 ýyllygy bilen ýene-de bir gezek gutlap, Siziň Alyhezretiňize hem-de Siziň maşgalaňyza berk jan saglyk we bagtyýarlyk, doganlyk türkmen halkyna bolsa abadançylyk we rowaçlyk arzuw edýärin!

Rejep Taýyp Ärdogan,
Türkiýe Respublikasynyň Prezidenti.