Hormatly Prezidentimiz Gurbanguly Berdimuhamedow ýurdumyzyň halkynyň we Hökümetiniň adyndan hem-de hut öz adyndan Bahreýniň Patyşasy Hamad Bin Isa Al Halife we dognalyk bahreýn halkyna Bahreýn Patyşalygynyň Milli güni mynasybetli tüýs ýürekden çykýan gutlaglaryny hem-de arzuwlaryny iberdi. Döwlet Baştutanymyz gutlagynda ähli ugurlarda ylalaşykly özara gatnaşyklary, deňhukuklylyk, birek-birege hormat goýmak we iki halkyň bähbidini nazara almak arkaly ýola goýulýan döwletara gatnaşyklarynyň möhüm maksatlara ýetmekde ýardam berjekdigine ynam bildirdi. Şu ýylyň 15-nji dekabrynda Türkmenistan bilen Bahreýn Patyşalygynyň arasynda diplomatik gatnaşyklaryň ýola goýulmagyna 25 ýylyň dolýandygyny kanagatlanma bilen belläp, hormatly Prezidentimiz Gurbanguly Berdimuhamedow çärýek asyr döwrüň dowamynda doganlyk gatnaşyklaryň işjeňleşendigini we onuň özara bähbitli ikitaraplaýyn hyzmatdaşlygyň hil taýdan täze derejesine çykandygyny aýratyn belledi. “Biz ýurtlarymyzyň arasyndaky syýasy, söwda-ykdysady we medeni-ynsanperwer gatnaşyklary mundan beýläk-de giňeltmegi maksat edinýäris. Däbe öwrülen türkmen-bahreýn hyzmatdaşlygynyň geljekde hem pugtalandyryljakdygyna ynanýaryn” diýip, milli Liderimiz belledi. Hormatly Prezidentimiz özüniň gadyrly dogany-- Bahreýniň Patyşasy Hamad Bin Isa Al Halifa Türkmenistan bilen Bahreýn Patyşalygynyň arasynda hyzmatdaşlygyň ösdürilmegine yzygiderli üns berýändigi üçin minnetdarlyk bildirdi we onuň Alyhezretine berk jan saglyk, abadançylyk, Bahreýniň doganlyk halkyna bolsa parahatçylyk, gülläp ösüş hem-de rowaçlyk arzuw etdi.