Türkmenistanyň Prezidenti Karara gol çekdi. Resminama laýyklykda, Aşgabat şäherinde 2020-nji ýylyň 12-nji dekabrynda “Bitaraplyk syýasaty we onuň halkara parahatçylygy, howpsuzlygy we durnukly ösüşi üpjün etmekdäki ähmiýeti” atly halkara maslahatyny ýokary guramaçylyk derejesinde geçirmegi üpjün etmek tabşyryldy.

* * * Berkarar döwletimiziň bagtyýarlyk döwründe türkmen halkynyň milli buýsanjy we baýlygy bolan behişdi bedewlerimiziň dünýädäki şan-şöhratyny has-da belende galdyrmak hem-de Türkmen bedewiniň milli baýramy mynasybetli çäreleri ýokary derejede geçirmek maksady bilen, Türkmenistanyň Prezidenti Karara gol çekdi. Resminama bilen, “Türkmen atlary” döwlet birleşigine Mary atçylyk sport toplumynyň çapuw ýodasynyň durkuny täzelemek we oňa döwrebap örtügi düşemek boýunça işleri ýerine ýetirmek barada “Berk ýol” hojalyk jemgyýeti bilen şertnamany baglaşmaga ygtyýar berildi. Durkuny täzelemek işlerine 2020-nji ýylyň noýabr aýynda başlamak we çapuw ýodasyny 2021-nji ýylyň mart aýynda ulanmaga doly taýýar edip tabşyrmak bellenildi. * * * Türkmenistanyň Prezidenti Karara gol çekdi. Resminama laýyklykda, Türkmenistanyň Söwda-senagat edarasyna degişli ministrlikler we pudaklaýyn dolandyryş edaralary bilen bilelikde, 2020-nji ýylyň 1-12-nji dekabry aralygynda Türkmenistanyň hemişelik Bitaraplygynyň şanly 25 ýyllygy mynasybetli Halkara sergisini we onuň çäklerindäki çäreleri ýokary derejede guramaçylykly geçirmegi üpjün etmek tabşyryldy.