Her ýyl aprel aýynyň soňky ýekşenbesinde bellenilýän Türkmen bedewiniň baýramyna taýýarlyk işleri ýaýbaňlandy. Baýramçylyk çäreleriniň maksatnamasy sergileri, maslahatlary, at çapyşyklary – päsgelçiliklerden böküp geçmek boýunça ýaryşlary, atly ýörişleri, ýetginjek çapuksuwarlaryň bäsleşiklerini öz içine alýar. Halkara ahalteke atçylyk assosiasiýasynyň paýtagtymyzda geçiriljek VII mejlisine hem-de sergi-ýarmarka we “Türkmen bedewi we dünýä seýisçilik sungaty” atly ylmy maslahata dünýäniň onlarça ýurtlaryndan wekiller gatnaşar. Şeýle hem baýramçylyk maksatnamasynda ahalteke bedewleriniň halkara gözellik bäsleşiginiň jemleýji tapgyry, döredijilik işgärleriniň arasynda sungat eserlerinde bedewiň keşbini janlandyrmak boýunça geçiriläýn bäsleşigiň ýeňijilerini sylaglamak dabarasy girizildi. Türkmen bedewiniň baýramy mynasybetli dabaraly çäreler ýurdumyzyň ähli şäherlerinde we obalarynda guralar. Olaryň çäklerinde konsertler, sergiler, edebi-sazly we şygryýet agşamlary, köpçülikleýin gezelençler, şeýle hem ýurdumyzyň atşynaslaryny we seýislerini sarpalamak çäreleri göz öňünde tutulýar. Aprel aýynda Ahal welaýatynyň Ak bugdaý etrabynda bedewler üçin gurlan Halkara karantin merkeziniň açylyşy meýilleşdirilýär.