Şu gün hormatly Prezidentimiz Serdar Berdimuhamedow GDA-nyň Hökümet Baştutanlarynyň Geňeşiniň nobatdaky mejlisine gatnaşmak üçin ýurdumyza gelen Azerbaýjan Respublikasynyň Premýer-ministri Ali Asadowy kabul etdi.

Myhman Türkmenistana ýene-de gelmäge we özara hyzmatdaşlygyň geljekki ugurlaryny ara alyp maslahatlaşmaga döredilen mümkinçilik üçin hoşallyk bildirip, Azerbaýjanda ýurdumyzyň hormatly Prezidentimiziň baştutanlygynda durmuş-ykdysady ösüşde gazanýan üstünliklerine ýokary baha berilýändigini belledi hem-de pursatdan peýdalanyp, Azerbaýjan Respublikasynyň Prezidenti Ilham Aliýewiň döwlet Baştutanymyza hem-de Gahryman Arkadagymyza iberen mähirli salamyny, iň gowy arzuwlaryny ýetirdi.

Hormatly Prezidentimiz Prezident Ilham Aliýewe iň gowy arzuwlaryny beýan edip, Türkmenistana sapar bilen gelmek baradaky çakylygy kabul edendigi üçin myhmana minnetdarlyk bildirdi hem-de Ali Asadowyň bu mejlisiň işine gatnaşmagynyň Azerbaýjan Respublikasynyň GDA-nyň çäklerindäki köptaraply hyzmatdaşlygy mundan beýläk-de pugtalandyrmaga ygrarlydygynyň subutnamasy bolup durýandygyny nygtady.

Döwlet Baştutanymyz mejlisiň jemleri boýunça kabul ediljek çözgütleriň Arkalaşyga agza ýurtlaryň arasyndaky gatnaşyklary pugtalandyrmaga, Ali Asadowyň şu gezekki saparynyň bolsa iki dostlukly döwletiň arasyndaky hyzmatdaşlygy täze sepgitlere çykarmaga kuwwatly itergi berjekdigine ynam bildirdi.

Söhbetdeşligiň dowamynda hormatly Prezidentimiz ýurtlarymyzy we doganlyk halklarymyzy köpasyrlyk dostluk, hoşniýetli goňşuçylyk gatnaşyklarynyň baglanyşdyrýandygyny, munuň bolsa özara bähbitli hyzmatdaşlygy mundan beýläk-de giňeltmek üçin berk binýat bolup hyzmat edýändigini belledi. Ägirt uly mümkinçilikleriň we iki ýurduň ýolbaşçylarynyň berk syýasy erkiniň netijesinde Türkmenistan bilen Azerbaýjan Respublikasynyň arasyndaky gatnaşyklaryň ýokary depginde ösdürilýändigi kanagatlanma bilen bellenildi. Türkmenistan we Azerbaýjan abraýly halkara guramalaryň, şol sanda Birleşen Milletler Guramasynyň, Türki Döwletleriň Guramasynyň, Goşulyşmazlyk Hereketiniň, Garaşsyz Döwletleriň Arkalaşygynyň çäklerinde işjeň hyzmatdaşlyk edýärler.

Döwlet Baştutanymyz ikitaraplaýyn hyzmatdaşlygy çuňlaşdyrmakda Ykdysady hyzmatdaşlyk boýunça hökümetara türkmen-azerbaýjan toparynyň alyp barýan işiniň aýratyn ähmiýetini belledi. Şunuň bilen baglylykda, ýurtlarymyzyň Aziýanyň we Ýewropanyň çatrygynda geografik taýdan amatly ýerleşmegini nazara almak bilen, ilkinji nobatda, energetika, logistika, ulag ulgamlarynda bar bolan mümkinçilikleri doly ulanmagyň zerurdygyna üns çekildi. Hormatly Prezidentimiz medeni-ynsanperwer gatnaşyklary mundan beýläk-de pugtalandyrmagyň möhümdigini aýdyp, ýurdumyzyň Azerbaýjan Respublikasy bilen hemmetaraplaýyn hyzmatdaşlygy ösdürmäge ygrarlydygyny tassyklady.

Dostlukly ýurduň Premýer-ministri ýokary döwlet derejesindäki yzygiderli dialogyň ähmiýetini belläp, hormatly Prezidentimizi özi üçin amatly wagtda sapar bilen Azerbaýjana gelmäge çagyrdy.

Duşuşygyň ahyrynda hormatly Prezidentimiz Serdar Berdimuhamedow hem-de Azerbaýjan Respublikasynyň Premýer-ministri Ali Asadow netijeli döwletara hyzmatdaşlygyň iki ýurduň doganlyk halklarynyň bähbidine mundan beýläk-de ugurlaryň giň gerimi boýunça ösdüriljekdigine ynam bildirip, birek-birege iň gowy arzuwlaryny beýan etdiler.