Ýakynda ýurdumyza jemagat hojalygynyň düzümlerine niýetlenen köp sanly täze tehnikalar gelip gowuşdy. Gahryman Arkadagymyzyň ýola goýan işlerini döwlet Baştutanymyzyň üstünlikli dowam etdirmegi netijesinde satyn alnan döwrebap tehnikalaryň ýurdumyza gelip gowuşmagy «Garaşsyz, baky Bitarap Türkmenistan — bedew batly at-myradyň mekany» ýylynyň ilkinji günlerinde Aşgabat şäheriniň we ýurdumyzyň welaýatlarynyň häkimlikleriniň Jemagat hojalygy birleşikleriniň işgärleri üçin ýatdan çykmajak waka öwrüldi.

Ajaýyp waka mynasybetli Aşgabatda hem-de Ahal, Balkan, Daşoguz, Lebap we Mary welaýatlarynyň häkimlikleriniň Jemagat hojalygy birleşiklerinde geçirilen dabaralarda çykyş edenler Arkadagly Gahryman Serdarymyz tarapyndan ýurdumyzyň jemagat hojalygy pudagyna niýetlenip satyn alnan täze, ýöriteleşdirilen awtoulaglaryň, tehnikalaryň we enjamlaryň täze ýylyň ilkinji günlerinde pudagyň işgärleri üçin ajaýyp sowgada öwrülendigini nygtadylar. Olar häzirki zaman tehnikalaryny tüýs ýürekden hoşallyk bilen kabul edip, hormatly Prezidentimize we Gahryman Arkadagymyza alkyşlaryny beýan etdiler.

Dabaralaryň dowamynda ýurdumyza gelip gowşan döwrebap tehnikalaryň aýratynlyklaryna üns çekilip, häzirki zaman ulaglary, tehnikalary we enjamlar bilen içgin tanşyldy. Pudak üçin şeýle döwrebap tehnikalaryň satyn alnyp berilmegi ýurdumyzda hormatly Prezidentimiziň baştutanlygynda amala aşyrylýan işleriň Garaşsyz Türkmenistany ählitaraplaýyn ösdürmek meselesine jogapkärçilikli çemeleşilýändigini aýdyň görkezýär. Munuň özi pudaklaryň häzirki zaman tehnikalarydyr enjamlar bilen yzygiderli üpjün edilmegine aýratyn ähmiýet berilýändiginiň güwäsidir.

Döwlet Baştutanymyzyň tagallalary netijesinde jemagat hojalygynyň düzümleri üçin ýurdumyza getirilen täze, döwrebap tehnikalaryň hatarynda zeý suwuny sorujy we ýokary basyşda lagym ulgamlaryny arassalaýjy awtoulaglar, süpüriji-ýuwujy, gapdalyndan zir-zibil ýükleýän, konteýnerli zir-zibil daşaýan, ýol germew we barýer ýuwýan ýöriteleşdirilen awtoulaglar, ýol ýuwujy-süpüriji kiçi maşynlar, agaç owradyjy, şeýle-de 25 tonnalyk ýük göterijiler, suw daşaýjy, ýol ýuwujy, gidrogaldyryjylar, göteriji enjamly kiçi ýol ýuwujy awtoulaglar, hereketdäki ussahana awtoulaglary, ýörite agyr awtoulaglar tirkewi, ýükleýji ekskawator, öňtaraplaýyn uly ýükleýjiler, tekerli ekskawatorlar, zir-zibil daşaýjy ulag üçin açyk görnüşli konteýnerler, baglary göçürmek üçin enjamlar, aýratyn dakylýan enjamlar bar. Şeýle hem pudagyň işgärleri üçin 24 adamlyk awtobuslar satyn alyndy.

Täze tehnikalar halkymyzyň milli däp-dessurlaryna laýyklykda, ak un sepilip kabul edildi hem-de önümçilikde, hyzmat ediş işlerinde howpsuz we uzak wagtlap ulanylmagy arzuwlanyp, olara alajalar daňyldy. Il sylagly ýaşulular doga-dileg edip, olaryň işine ak ýol arzuw etdiler.

Soňra jemagat hojalygy pudagynyň ýöriteleşdirilen awtoulaglary ýollarda hereket edip başladylar. Şeýle döwrebap tehnikalaryň satyn alynmagy ýerine ýetirilýän işleriň hiliniň we medeniýetiniň ýokary bolmagyny üpjün edýär. Türkmenistanda işletmek üçin daşary ýurtlardan satyn alynýan tehnikalar ýurdumyzyň toprak-howa şertleri göz öňünde tutulyp, ýörite gurnalýar. Satyn alynýan tehnikalara bildirilýän şeýle talap olaryň uzak wagtlap, ýokary hilli hyzmat etmegini gazanmakdan ybaratdyr. Jemagat hojalygynyň we beýleki degişli gulluklaryň işiniň talabalaýyk ýola goýulmagy, ilatly ýerlerde ýokary hilli arassaçylyk we abadanlaşdyryş işleriniň geçirilmegi, pudagyň düzüminde kuwwatly tehnikalaryň netijeli peýdalanylmagy häzirki döwrüň möhüm talaby bolup, şunda şäherleriň sagdyn ekologik ýagdaýynyň üpjün edilmegi ileri tutulýar.

Täze tehnikalara erk etmek pudakda köp ýyllardan bäri üstünlikli zähmet çekýän işgärlere ynanyldy. Olar öz iş tejribelerini ulanyp, tehnikalary dolandyrmak arkaly gündeki wezipelerini ýerine ýetirmäge girişdiler. Satyn alnan kuwwatly tehnikalar jemagat hojalygy pudagynyň tehniki-enjamlaýyn binýadyny has-da pugtalandyryp, öňde goýlan wezipeleri ýokary hilli ýerine ýetirmäge mümkinçilik berer.

Pudagyň işgärleri Watanymyzyň Garaşsyzlygynyň şanly 35 ýyllygy belleniljek “Garaşsyz, baky Bitarap Türkmenistan — bedew batly at-myradyň mekany” ýylynda Arkadagly Gahryman Serdarymyzyň jemagat hojalygy pudagyna berýän yzygiderli goldawlaryndan ruhlanyp, öndürijilikli zähmet çekmek arkaly şanly senäni dabaralandyrmaga öz mynasyp goşantlaryny goşjakdyklaryna ynandyrdylar.