Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Yslam dünýäsiniň Bilim, ylym we medeniýet meseleleri boýunça guramasynyň Baş direktory Salim Al Malik bilen duşuşdy.

Salim Al Malik türkmen topragynda bildirilen myhmansöýerlik hem-de Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli halkara foruma gatnaşmaga çakylyk üçin hoşallyk bildirdi.

Şeýle hem myhman Türkmenistanda milli taryhy we medeni gymmatlyklary gorap saklamak hem-de wagyz etmek boýunça durmuşa geçirilýän giň gerimli işlere ýokary baha berdi.

Gahryman Arkadagymyz myhmany mähirli mübärekläp, onuň saparynyň dowamynda ikitaraplaýyn hyzmatdaşlygyň häzirki ýagdaýy we geljekki ugurlary boýunça pikir alyşmaga, şeýle hem Türkmenistan bilen Guramanyň arasyndaky gatnaşyklary mundan beýläk-de ösdürmegiň meselelerini ara alyp maslahatlaşmaga gowy mümkinçiligiň boljakdygyna ynam bildirdi.

Halkara giňişliginde köpugurly hyzmatdaşlygy ösdürmek Bitarap Türkmenistanyň daşary syýasatynyň möhüm ugurlarynyň biri bolup durýar. Şunuň bilen baglylykda, abraýly halkara guramalar bilen ylym-bilim medeni-ynsanperwer ulgamlarda hyzmatdaşlygyň giňeldilmegine möhüm ähmiýet berilýär.

Gahryman Arkadagymyz türkmen halkynyň baý taryhynyň, yslam dini bilen bagly mirasynyň we ruhy-medeni gymmatlyklarynyň bardygyny belläp, halklarymyzy ýakynlaşdyrmakda köpri hökmünde hyzmat etjek Yslam dünýäsiniň Bilim, ylym we medeniýet meseleleri boýunça guramasy bilen ýurdumyzyň hyzmatdaşlygy anyk ugurlar boýunça giňeltmäge taýýardygyny belledi.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Halkara wekilçilikli foruma we baýramçylyk çärelerine gatnaşmak maksady bilen ýurdumyza sapar bilen gelendigi üçin Yslam dünýäsiniň Bilim, ylym we medeniýet meseleleri boýunça guramasynyň Baş direktory Salim Al Malige minnetdarlyk bildirip, oňa alyp barýan işinde üstünlikleri arzuw etdi.