Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Şanhaý Hyzmatdaşlyk Guramasynyň Baş sekretary Nurlan Ýermekbaýew bilen duşuşdy.

Myhman duşuşmaga döredilen mümkinçilik üçin hoşallygyny beýan edip, Halkara parahatçylyk we ynanyşmak ýylyna, Halkara Bitaraplyk gününe we Türkmenistanyň hemişelik Bitaraplygynyň 30 ýyllygyna bagyşlanan Halkara foruma gatnaşmagyň özi üçin uly hormatdygyny aýtdy.

Bellenilişi ýaly, ŞHG Türkmenistanyň BMG-niň Baş Assambleýasynyň kararnamalary bilen berkidilen Bitaraplyk hukuk derejesine sebitde parahatçylygy we howpsuzlygy üpjün etmegiň möhüm şerti hökmünde ýokary baha berýär.

Gahryman Arkadagymyz myhmany mähirli mübärekläp, ýurdumyzda geçirilen halkara foruma gatnaşýandygy üçin minnetdarlyk bildirdi hem-de Türkmenistanyň parahatçylygy we ynanyşmagy pugtalandyrmagyň möhüm guraly bolup hyzmat edýän hemişelik Bitaraplyk syýasatyny yzygiderli durmuşa geçirýändigini belledi.

Nygtalyşy ýaly, hemişelik Bitarap döwlet hökmünde Türkmenistan ähli hyzmatdaş ýurtlar we abraýly halkara guramalar bilen netijeli hyzmatdaşlygy ösdürmegi maskat edinýär. ŞHG bilen hyzmatdaşlyk Türkmenistanyň daşary syýasatynyň möhüm bölegi bolup durýar. Ýurdumyzyň hormatly myhman hökmünde ŞHG-niň sammitlerine yzygiderli gatnaşmagy munuň aýdyň mysalydyr.

– Biz Şanhaý Hyzmatdaşlyk Guramasyna agza döwletleriň ählisi bilen däp bolan dostluk, hoşniýetli goňşuçylyk we özara bähbitli hyzmatdaşlyk gatnaşyklaryna ýokary baha berýäris. Türkmenistan anyk netijeleri gazanmaga gönükdirilen köptaraplaýyn hyzmatdaşlygy ösdürmäge ýardam bermek bilen, bu gatnaşyklary mundan beýläk-de hemmetaraplaýyn pugtalandyrmagy maksat edinýär diýip, Gahryman Arkadagymyz aýtdy we Türkmenistan bilen ŞHG-niň arasynda ýola goýlan netijeli hyzmatdaşlygyň deňhukuklylyk, özara hormat goýmak we ynanyşmak ýörelgeleri esasynda mundan beýläk-de ösdüriljekdigine ynam bildirdi.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz we Şanhaý Hyzmatdaşlyk Guramasynyň Baş sekretary Nurlan Ýermekbaýew üstünlikli hyzmatdaşlyk etmek üçin ähli amatly şertleriň bardygyny belläp, birek-birege berk jan saglyk we rowaçlyk baradaky iň gowy arzuwlaryny beýan etdiler.