Şu gün hormatly Prezidentimiz Serdar Berdimuhamedow giň gerimli baýramçylyk dabaralaryna gatnaşmak üçin ýurdumyza sapar bilen gelen Ermenistan Respublikasynyň Prezidenti Waagn Haçaturýan bilen duşuşdy.

Döwlet Baştutanymyz dostlukly ýurduň Prezidentini mähirli mübärekläp, Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli geçirilýän Halkara foruma gatnaşmak baradaky çakylygy kabul edip, ýurdumyza gelendigi üçin minnetdarlyk bildirdi. Şeýle hem hormatly Prezidentimiz bu Forumyň işine Prezident Waagn Haçaturýanyň gatnaşmagynyň onuň ýurdumyzyň bitaraplyk syýasatyny goldaýandygynyň, parahatçylygy we özara düşünişmegi pugtalandyrmaga, dünýä derejesinde ynanyşmaga esaslanýan gatnaşyklary ýola goýmaga ygrarlydygynyň subutnamasydygyny aýtdy.

Dostlukly ýurduň Baştutany türkmen topragynda mähirli kabul edilendigi we Halkara foruma gatnaşmaga çakylyk üçin hoşallyk bildirip, bu forumyň sebit we dünýä derejesinde gatnaşyklary pugtalandyrmakda möhüm ähmiýete eýe boljakdygyny aýtdy hem-de pursatdan peýdalanyp, hormatly Prezidentimizi Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli tüýs ýürekden gutlady.

Şeýle hem Prezident Waagn Haçaturýan Türkmenistanyň gözel tebigatynyň özünde ýakymly täsir galdyrandygyny belläp, ýurdumyzyň ekologiýa we daşky gurşawy goramak babatda durmuşa geçirýän başlangyçlaryna ýokary baha berdi hem-de ermeni tarapynyň bu ugurda hyzmatdaşlyga taýýardygyny tassyklady.

Hormatly Prezidentimiz hoşniýetli sözler üçin minnetdarlyk bildirip, Halkara parahatçylyk we ynanyşmak ýylynda Birleşen Milletler Guramasynyň döredilmeginiň 80 ýyllygynyň bellenilýändigini, şeýle hem bu ýylyň Garaşsyz Türkmenistanyň ösüş taryhynyň möhüm senesi – BMG tarapyndan ýurdumyzyň hemişelik Bitaraplyk hukuk derejesiniň ykrar edilmeginiň 30 ýyllygy bilen gabat gelýändigini belledi.

Şunuň bilen baglylykda, döwlet Baştutanymyz şanly sene mynasybetli guralýan Forumyň pikir alyşmak, häzirki döwrüň möhüm meselelerini çözmek üçin netijeli çemeleşmeleri işläp taýýarlamaga gönükdirilen bilelikdäki strategik çözgütleri kabul etmek, bu ugurda hyzmatdaşlygyň anyk ugurlaryny kesgitlemek üçin giň mümkinçilikleri döretjekdigine ynam bildirdi.

Bellenilişi ýaly, Türkmenistan Ermenistan Respublikasy bilen deňhukuklylyk, özara hormat goýmak we ynanyşmak ýörelgelerine esaslanýan gatnaşyklary ösdürmäge uly ähmiýet berýär. Soňky ýyllarda iki ýurduň arasyndaky gatnaşyklar pugtalandyryldy we täze, has ýokary derejä çykaryldy.

Hormatly Prezidentimiz Prezident Waagn Haçaturýanyň ýurdumyza saparlarynyň hem-de Türkmenistanda geçirilýän möhüm çärelere gatnaşmagynyň Ermenistanyň açyk, özara hormat goýmaga esaslanýan we netijeli hyzmatdaşlyga ygrarlydygynyň subutnamasy bolup durýandygyny belledi hem-de Awazada geçirilen Birleşen Milletler Guramasynyň Deňze çykalgasy bolmadyk ösüp barýan döwletler boýunça üçünji maslahatynyň çäklerinde Dostlukly ýurduň Baştutany bilen geçiren netijeli gepleşiklerini ýatlady. Bu gepleşikler özara düşünişmegi çuňlaşdyrmaga we hyzmatdaşlygyň möhüm meselelerini ara alyp maslahatlaşmaga mümkinçilik berdi.

Döwlet Baştutanymyz häzirki wagtda iki ýurduň arasyndaky söwda-ykdysady gatnaşyklary giňeltmek üçin täze mümkinçilikleriň açylýandygyna ünsi çekip, ýurdumyzyň geljegi uly taslamalary işläp taýýarlamak we eksport-import amallaryny diwersifikasiýalaşdyrmak boýunça işjeň hyzmatdaşlyga taýýardygyny tassyklady.

Duşuşygyň ahyrynda hormatly Prezidentimiz Serdar Berdimuhamedow hem-de Ermenistan Respublikasynyň Prezidenti Waagn Haçaturýan birek-birege iň gowy arzuwlaryny beýan edip, özara hormat goýmak we ynanyşmak ýörelgelerine esaslanýan döwletara hyzmatdaşlygyň iki ýurduň halklarynyň bähbidine mundan beýläk-de üstünlikli ösdüriljekdigine ynam bildirdiler.