Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Koreýa Respublikasynyň Bütindünýä innowasiýalary öwreniş institutynyň başlygy Kim Jin Pýo bilen duşuşdy.

Myhman duşuşmaga döredilen mümkinçilik hem-de Türkmenistanyň hemişelik Bitaraplygynyň 30 ýyllygy mynasybetli geçirilýän halkara foruma gatnaşmaga çakylyk üçin hoşallyk bildirip, Gahryman Arkadagymyzy, hormatly Prezidentimizi we ähli türkmen halkyny bu şanly sene mynasybetli tüýs ýürekden gutlady.

Gahryman Arkadagymyz myhmany gadymy we myhmansöýer türkmen topragynda kabul etmäge şatdygyny aýdyp, paýtagtymyzda geçiriljek halkara forumyň pikirleri we garaýyşlary giňden ara alyp maslahatlaşmaga, häzirki döwrüň meseleleriniň çözgütlerini we usullaryny işläp taýýarlamaga gönükdirilen bilelikdäki strategik kararlary kabul etmäge mümkinçilik döretjekdigine ynam bildirdi.

Duşuşygyň dowamynda bellenilişi ýaly, Türkmenistan Koreýa Respublikasy bilen ýola goýlan gatnaşyklary ösdürmäge uly ähmiýet berýär. Soňky ýyllarda ikitaraplaýyn döwletara gatnaşyklar deňhukuklylyk, özara hormat goýmak we ynanyşmak ýörelgeleri esasynda işjeň ösdürildi.

Ýurtlarymyz ikitaraplaýyn derejede, şeýle hem BMG ýaly abraýly halkara guramalaryň we “Merkezi Aziýa — Koreýa Respublikasy” hyzmatdaşlyk forumynyň çäklerinde ýakyn hyzmatdaşlygy alyp barýarlar.

Şeýle hem köpugurly gatnaşyklaryň hatarynda parlament diplomatiýasynyň ornunyň barha artýandygy we yzygiderli häsiýete eýe bolýandygy kanagatlanma bilen bellenildi.

Gahryman Arkadagymyz Kim Jin Pýo Koreýa Respublikasynyň parlamentiniň ýolbaşçysy bolup işlän döwründe Türkmenistan bilen hyzmatdaşlygy ösdürmäge uly goşant goşandygyny belläp, türkmen-koreý gatnaşyklaryny pugtalandyrmak ugrunda edýän ähli işleri üçin minnetdarlyk bildirdi.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz we Koreýa Respublikasynyň Bütindünýä innowasiýalary öwreniş institutynyň başlygy Kim Jin Pýo şu günki duşuşygyň ýurtlarymyzyň arasyndaky ikitaraplaýyn gatnaşyklary türkmen we koreý halklarynyň bähbidine mundan beýläk-de ösdürmäge ýardam berjekdigine ynam bildirip, birek-birege iň gowy arzuwlaryny beýan etdiler.