Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow ýurdumyza sapar bilen gelen Ýewropada Howpsuzlyk we Hyzmatdaşlyk Guramasynyň Baş sekretary Feridun Sinirlioglu bilen duşuşdy.

Myhman duşuşmaga döredilen mümkinçilik üçin hoşallyk bildirip, Türkmenistanyň Bitaraplygynyň şanly 30 ýyllygy mynasybetli çärelere gatnaşmagyň özi üçin uly hormatdygyny belledi. Şeýle hem ÝHHG-niň Baş sekretary Gahryman Arkadagymyzy bu şanly sene bilen tüýs ýürekden gutlap, Bitaraplyk ýyllaryndan Türkmenistan tarapyndan parahatçylygy ilerletmek boýunça uly işleriň bitirilendigini belledi.

Gahryman Arkadagymyz ÝHHG-niň Baş sekretaryny mähirli mübärekläp, Halkara parahatçylyk we ynanyşmak ýyly, Halkara Bitaraplyk güni we Türkmenistanyň hemişelik Bitaraplygynyň 30 ýyllygy mynasybetli geçirilýän halkara foruma ählumumy parahatçylygy, durnukly ösüşi üpjün etmek hem-de ynsanperwerlik ýaly ugurlarda hyzmatdaşlygy ara alyp maslahatlaşmak üçin ýokary derejeli möhüm syýasy esas hökmünde garalýandygyny aýtdy.

Duşuşygyň dowamynda bellenilişi ýaly, Türkmenistan sebitde we dünýäde parahatçylygy hem-de durnukly ösüşi üpjün etmek üçin halkara giňişliginde işjeň hyzmatdaşlygyň tarapdary bolup çykyş edýär. Bu ugurda ýurdumyz Ýewropada Howpsuzlyk we Hyzmatdaşlyk Guramasynyň çäklerinde tagallalary utgaşdyrmaga aýratyn üns berýär. Şunuň bilen baglylykda, häzirki wagtda Türkmenistan bilen bu Guramanyň arasyndaky gatnaşyklaryň netijeli häsiýeti bellenildi.

Gahryman Arkadagymyz energiýa serişdeleriniň baý gorlaryna eýe bolan ýurdumyzyň halkara energetika howpsuzlygyny üpjün etmekde anyk işleri durmuşa geçirýändigini belläp, Türkmenistanyň sebitde parahatçylygy we durnukly ösüşi pugtalandyrmak üçin ÝHHG bilen hyzmatdaşlygy anyk ugurlar boýunça giňeltmäge taýýardygyny tassyklady.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz hem-de Ýewropada Howpsuzlyk we Hyzmatdaşlyk Guramasynyň Baş sekretary Feridun Sinirlioglu birek-birege iň gowy arzuwlaryny beýan etdiler.