Şu gün türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Milletler Guramasynyň Baş sekretarynyň orunbasary, BMG-niň Ženewadaky edarasynyň Baş direktory Tatýana Walowaýa bilen duşuşdy.

Myhman duşuşmaga döredilen mümkinçilik üçin hoşallyk bildirip, Türkmenistanyň hemişelik Bitaraplygynyň 30 ýyllygy mynasybetli çärelere gatnaşmagynyň özi üçin uly hormatdygyny belledi hem-de pursatdan peýdalanyp, BMG-niň Baş sekretary Antoniu Guterrişiň Gahryman Arkadagymyza we hormatly Prezidentimize iberen mähirli salamyny ýetirdi.

Gahryman Arkadagymyz myhmany mähirli mübärekläp, Halkara parahatçylyk we ynanyşmak ýylyna, Halkara Bitaraplyk gününe hem-de Türkmenistanyň hemişelik Bitaraplygynyň 30 ýyllygyna bagyşlanan halkara forumyna gatnaşýandygy üçin minnetdarlyk bildirdi, şeýle hem BMG-niň Baş sekretaryna mähirli salamyny we iň gowy arzuwlaryny beýan etdi.

Duşuşygyň dowamynda bellenilişi ýaly, Türkmenistan BMG tarapyndan ykrar edilen we parahatçylygy hem-de ynanyşmagy pugtalandyrmagyň möhüm guraly bolup hyzmat edýän hemişelik Bitaraplyk syýasatyny yzygiderli durmuşa geçirýär.

Halkara parahatçylyk we ynanyşmak ýyly diýlip yglan edilen şu ýylda bolsa, ýurdumyzyň hemişelik Bitaraplygynyň 30 ýyllygy giňden bellenilýär. Şunuň bilen baglylykda, bu waka mynasybetli geçiriljek forumyň halkara gün tertibiniň, durnukly ösüşiň we ynsanperwer hyzmatdaşlygyň möhüm meselelerini ara alyp maslahatlaşmak üçin netijeli meýdança boljakdygy bellenildi.

Tatýana Walowaýa Türkmenistanyň sebitde parahatçylygy we durnukly ösüşi pugtalandyrmaga goşýan goşandyny belläp, BMG-niň wekili hökmünde bu halkara forumyň ýokary guramaçylyk derejesinde geçirilmegi üçin ähli tagallalary etjekdigini aýtdy.

Gahryman Arkadagymyz BMG bilen köpugurly hyzmatdaşlygyň ösdürilmeginiň Türkmenistanyň daşary syýasatynyň esasy ugurlarynyň biri bolup çykyş edýändigini aýdyp, ýurdumyzyň bitarap döwlet hökmünde parahatçylygy we howpsuzlygy üpjün etmekde, Durnukly ösüş maksatlaryny gazanmakda başlangyçly orun eýeleýändigini belledi.

Duşuşygyň dowamynda Gahryman Arkadagymyz Türkmenistanyň BMG-niň işine, şeýle hem sebitde syýasy-diplomatik dialogy we ynanyşmagy pugtalandyrmak boýunça tagallalaryna mundan beýläk-de hemmetaraplaýyn goldaw berjekdigini tassyklady.

Duşuşygyň ahyrynda türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz hem-de BMG-niň Baş sekretarynyň orunbasary, Birleşen Milletler Guramasynyň Ženewadaky edarasynyň Baş direktory Tatýana Walowaýa Türkmenistan bilen BMG-niň arasyndaky hyzmatdaşlygyň mundan beýläk-de pugtalandyryljakdygyna ynam bildirip, birek-birege iň gowy arzuwlaryny beýan etdiler.