Şu gün Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa Belarus Respublikasynyň Türkmenistandaky Adatdan daşary we Doly ygtyýarly ilçisi Stanislaw Çepurnoý bilen duşuşdy.

Diplomat duşuşygyň öňüsyrasynda Belarusuň Çagalar gaznasynyň müdiriýetiniň başlygy Lýudmila Kondraşowanyň Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa iberen minnetdarlyk hatyny gowşurdy. Munuň özi iki dostlukly ýurduň arasynda çagalaryň saglygyny goramak boýunça hyzmatdaşlygyň ösdürilýändiginiň aýdyň mysalydyr.

Ilçi duşuşmaga döredilen mümkinçilik üçin hoşallyk bildirip, haýyr-sahawat gaznasynyň alyp barýan ynsanperwer işiniň uly ähmiýetini belledi. Bellenilişi ýaly, çagalaryň saglygy, bagtyýar geljegi baradaky alada häzirki zaman jemgyýetiniň möhüm wezipeleriniň biri bolup durýar. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň durmuşa geçirýän işleri çagalary zerur serişdeler bilen üpjün etmek bilen bir hatarda, olar üçin has gowy geljegi döretmäge hem ýardam berýär.

O.Atabaýewa Belarus Respublikasynyň doly ygtyýarly wekilini mähirli mübärekläp, oňa türkmen-belarus gatnaşyklaryny mundan beýläk-de pugtalandyrmak babatda alyp barýan işinde üstünlikleri arzuw etdi.

Duşuşygyň dowamynda bellenilişi ýaly, Türkmenistan bilen Belarus Respublikasy ugurlaryň giň gerimi boýunça netijeli hyzmatdaşlyk edýärler. Şunda medeni-ynsanperwer ulgamdaky gatnaşyklaryň ýokary derejesi aýratyn nygtalmaga mynasypdyr. O.Atabaýewa gaznanyň alyp barýan işi barada aýdyp, şu ýyl bu düzümiň döredilmegine dört ýyl dolandygyny hem-de şu geçen döwürde gaznanyň serişdeleriniň hasabyna köp sanly ynsanperwer işleriň amala aşyrylandygyny belledi. Hususan-da, dürli kesellerden ejir çekýän çagalaryň ýüzlerçesine kardiohirurgik, neýrohirurgik, ortopedik we beýleki operasiýalar geçirildi. 2023-nji ýylda Gurbanguly Berdimuhamedow adyndaky çagalar sagaldyş-dikeldiş merkezi açyldy. Şeýle hem onuň çäginde inklýuziw çagalar bagy hereket edýär.

Diplomat şu ýylyň martynda gaznanyň döredilmeginiň dört ýyllygy mynasybetli Arkadag şäherinde geçirilen “Parahatçylyk we ynanyşmak ýyly: çagalaryň hatyrasyna halkara işiniň ösüşi” atly halkara maslahatyň halkara jemgyýetçiligiň ynsanperwer işlere ünsüni çekmekde möhüm ähmiýete eýe bolandygyny aýtdy. Gaznanyň bejeriş işleri boýunça wise-prezidenti O.Atabaýewa bu foruma daşary ýurtlardan köp sanly myhmanlaryň gatnaşandygyny hem-de onuň dowamynda netijeli pikir alyşmalaryň bolandygyny belläp, Belarusuň Çagalar gaznasynyň müdiriýetiniň başlygy L.Kondraşowanyň hem maslahata gatnaşmagynyň ähmiýetine ünsi çekdi. L.Kondraşowa forumdaky çykyşynda çagalary goldamak boýunça durmuşa geçirilýän işler barada möhüm we peýdaly maglumatlary paýlaşdy. Şunuň bilen baglylykda, Türkmenistanda we Belarus Respublikasynda çagalaryň saglygyny goramak, olary durmuş taýdan goldamak meselelerinde çemeleşmeleriň gabat gelýändigi bellenildi.

Diplomat Howandarlyga mätäç çagalara hemaýat bermek boýunça haýyr-sahawat gaznasynyň diňe bir Türkmenistanda däl, eýsem, daşary ýurtlardaky çagalara hem ynsanperwer kömegini berýändigini, onuň alyp barýan işiniň adamlary haýyr-sahawat işine ruhlandyrýandygyny, ynsanperwer jemgyýeti döretmäge ýardam edýändigini belledi.

Duşuşygyň ahyrynda Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bejeriş işleri boýunça wise-prezidenti Oguljahan Atabaýewa hem-de Belarus Respublikasynyň Türkmenistandaky Adatdan daşary we Doly ygtyýarly ilçisi Stanislaw Çepurnoý ösüp gelýän ýaş nesliň saglygy hem-de abadan durmuşy baradaky aladanyň durnukly, röwşen geljegiň kepilidigine ynam bildirip, birek-birege iň gowy arzuwlaryny beýan etdiler.