1894
Eziz watandaşlar!
Hormatly adamlar!
Hormatly «Arkadag» futbol toparynyň tälimçileri, türgenleri hem-de janköýerleri!
Sizi Halkara parahatçylyk we ynanyşmak ýylynda «Arkadag» futbol toparynyň Aziýanyň Futbol konfederasiýasynyň Çagyryş ligasynyň çempiony bolmagy bilen tüýs ýürekden gutlaýaryn. Gazanylan bu uly üstünlik hemişelik Bitaraplygymyzyň şanly 30 ýyllygyna mynasyp sowgat boldy. Siziň gazanan nobatdaky ýeňşiňiz bilen ýurdumyzyň halkara sport abraýy has hem belent derejelere çykýar.
Gadyrly sportsöýüjiler!
Berkarar döwletiň täze eýýamynyň Galkynyşy döwründe hormatly Prezidentimiz Arkadagly Gahryman Serdarymyzyň baştutanlygynda sagdyn durmuş ýörelgeleri giňden ornaşdyrylýar. Ýokary netijeli sporty, köpçülikleýin bedenterbiýäni ösdürmäge möhüm ähmiýet berilýär. Türkmen sportunyň dünýädäki abraýynyň belende galmagy ugrunda hemmetaraplaýyn mümkinçilikler döredilýär. 2023-nji ýylda döredilen «Arkadag» futbol topary hem yzygiderli ýeňiş gazanmak bilen, ýurdumyzyň Ýokary ligasyna üstünlikli gatnaşýar. Arkadag şäherinde ýerleşýän döwrebap stadionda bolsa toparyň ýokary derejede çykyş etmegi üçin ähli şertler üpjün edildi.
2023-nji ýylda «Arkadag» futbol topary Türkmenistanyň çempiony bolmagy başardy. Ýurdumyzyň Kubogyny almak ugrundaky ýaryşda hem ýeňiş gazanyp, ýokary ussatlygyny görkezdi. «Arkadag» topary abraýly halkara ýaryşlarda-da yzygiderli ýeňiş gazanýar.
Gadyrly futbolçylar!
Halkara parahatçylyk we ynanyşmak ýylynda «Sport — parahatçylygyň ilçisi» şygarymyz dünýäde giňden dabaralanýar. Sport halklaryň arasynda dost-doganlygy, ynanyşmagy we parahatçylygy berkidýär. Siz halkara derejede geçen ýaryşda hem üstünlikli çykyş edip, parahatçylyk söýüji ýurdumyzyň abraýyny ýene-de belende galdyrdyňyz. Çekeleşikli geçen final duşuşygynda aýratyn yhlaslylyk, maksada okgunlylyk, ussatlyk görkezdiňiz. Ýeňiş gazanyp, Aziýanyň Futbol konfederasiýasynyň Çagyryş ligasynyň Kubogyna mynasyp bolduňyz. Siziň gazanan bu ýeňşiňiz ýaşlaryň sporta bolan söýgüsini has-da artdyrýar.
Gadyrly sportsöýüjiler!
«Arkadag» futbol toparynyň abraýly halkara ýaryşda gazanan pul baýragyny Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasyna geçirmek hakynda haýyşyňyzy göz öňünde tutup, bu serişdäni Bazar Amanow adyndaky Döwlet çagalar kitaphanasynyň täze binasynyň gurluşygyna gönükdirmek barada karara geldik. Bu döwrebap kitaphana ýaş nesliň sanly ulgam arkaly kämil bilim almagyna oňyn täsirini ýetirer. «Bilimli il ozar» diýlişi ýaly, çagalaryň okamagy, öwrenmegi, sport, sungat bilen meşgullanmagy üçin bu ýerde ähli şertler dörediler. Kämil bilimli, berk bedenli, sagdyn ruhly çagalar biziň geljegimizdir, bagtyýar ertirimizdir.
Hormatly «Arkadag» futbol toparynyň tälimçileri, türgenleri hem-de janköýerleri!
Sizi halkara ýaryşda gazanan ýeňşiňiz bilen ýene-de bir gezek tüýs ýürekden gutlaýaryn. Size berk jan saglyk, maşgala abadançylygyny, uly üstünlikleri arzuw edýärin.
Hormatly adamlar!
Eziz watandaşlar!
Türkmenistanyň Prezidentiniň taglymaty: «Watan diňe halky bilen Watandyr! Döwlet diňe halky bilen döwletdir!».
Gadyrly sportsmenler!
Ýeňiş gazanmak siz bilen, alkyşlamak biz bilen! Şonuň esasynda “Öňe, öňe, diňe öňe, jan Watanym Türkmenistan!”.
