Baş sahypa
\
Syýasat habarlary
\
Türkmenistanyň Prezidenti halkara sport guramalarynyň ýolbaşçylaryny kabul etdi
Syýasat habarlary
Türkmenistanyň Prezidenti halkara sport guramalarynyň ýolbaşçylaryny kabul etdi
Çap edildi 02.04.2025
141

Şu gün hormatly Prezidentimiz Serdar Berdimuhamedow Aziýanyň Olimpiýa Geňeşiniň Baş direktory Huseýn Al-Musallamy hem-de Milli Olimpiýa Komitetleriniň Assosiasiýasynyň birinji wise-prezidenti, Katar Döwletiniň Olimpiýa Komitetiniň prezidenti Şeýh Joaan bin Hamad Al Tanini kabul etdi.

Myhmanlar wagt tapyp kabul edendigi üçin döwlet Baştutanymyza hoşallyk bildirip, Türkmenistanda bedenterbiýäni we sporty ösdürmek, halkara derejeli türgenleri taýýarlamak boýunça alnyp barylýan giň gerimli işlere ýokary baha berdiler.

Döwlet Baştutanymyz myhmanlary mähirli mübärekläp, olaryň şu gezekki saparynyň dowamynda Türkmenistan bilen Aziýanyň Olimpiýa Geňeşiniň hem-de Katar Döwletiniň Olimpiýa Komitetiniň arasyndaky hyzmatdaşlygy ösdürmegiň möhüm ugurlaryny ara alyp maslahatlaşmaga mümkinçilik boljakdygyna ynam bildirdi.

Duşuşygyň dowamynda bellenilişi ýaly, Türkmenistan bedenterbiýäni we sporty ösdürmäge aýratyn ähmiýet berýär. Ýurdumyzda sagdyn durmuş ýörelgelerini wagyz etmek, ýaşlary bedenterbiýe, sport bilen meşgullanmaga höweslendirmek boýunça maksada gönükdirilen işler alnyp barylýar. Döwlet derejesinde sporty ösdürmek üçin möhüm çözgütler kabul edilip, halkara sport hyzmatdaşlygyny giňeltmek ugrunda tagallalar edilýär.

Myhmanlar Türkmenistanyň Olimpiýa hereketiniň işjeň gatnaşyjysy bolup durýandygyny bellediler. 2017-nji ýylda Aşgabatda üstünlikli geçirilen Ýapyk binalarda we söweş sungaty boýunça V Aziýa oýunlary munuň aýdyň mysalydyr. Bu sport çäresi türkmen sportunyň ösüşine itergi berip, Aziýa yklymynda sport hyzmatdaşlygyny has-da pugtalandyrmaga goşant goşdy. Şunuň bilen birlikde, Türkmenistan halkara sport guramalary bilen hyzmatdaşlyga aýratyn üns berýär. Sport desgalaryny döwrebaplaşdyrmak, türgenler üçin amatly şertleri döretmek, halkara ýaryşlary geçirmek ýurdumyzyň sport syýasatynyň möhüm ugurlarydyr. Şu günki duşuşyk hem sport hyzmatdaşlygyny täze derejä çykarmak we Olimpiýa hereketini ösdürmäge goşant goşmak babatda wajyp ädimdir.

Hormatly Prezidentimiz Aziýanyň Olimpiýa Geňeşiniň we Milli Olimpiýa Komitetleriniň Assosiasiýasynyň alyp barýan işleriniň bütin dünýäde sporty ösdürmäge, Olimpiýa gymmatlyklaryny dabaralandyrmaga ýardam berýändigini belläp, bu guramalaryň ýolbaşçylarynyň ýurdumyza amala aşyrýan saparynyň sport babatda hyzmatdaşlygy has-da giňeltmäge, bilelikdäki taslamalary durmuşa geçirmäge, täze başlangyçlary öňe sürmäge itergi berjekdigine ynam bildirdi.

Duşuşygyň ahyrynda hormatly Prezidentimiz Serdar Berdimuhamedow Türkmenistan bilen Aziýanyň Olimpiýa Geňeşiniň arasyndaky hyzmatdaşlygy has-da ösdürmäge goşýan uly şahsy goşantlary we bu ugurda ýurdumyzyň başlangyçlaryna hemişe goldaw berýändikleri üçin Huseýn Al-Musallama hem-de Şeýh Joaan bin Hamad Al Tanä tüýs ýürekden minnetdarlyk bildirip, Aziýada Olimpiýa hereketini ösdürmek ugrunda alyp barýan işlerinde üstünlikleri arzuw etdi.

Soňky habarlar
03.04
Türkmenistanyň Prezidenti Ýewropa Komissiýasynyň Başlygy bilen duşuşdy
03.04
Türkmenistanyň Prezidenti Ýewropa Geňeşiniň Başlygy bilen duşuşdy
03.04
Türkmenistanyň Prezidenti Özbegistan Respublikasynyň Prezidenti bilen duşuşdy
03.04
Türkmenistanyň Prezidenti Ýewropanyň Täzeleniş we ösüş bankynyň ýolbaşçysy bilen duşuşdy
03.04
Türkmenistanyň Prezidentiniň Özbegistan Respublikasyna iş sapary başlandy
02.04
Türkmenistanyň Döwlet howpsuzlyk geňeşiniň mejlisi
02.04
Türkmenistanyň Prezidenti Saud Arabystany Patyşalygynyň döwlet ministrini kabul etdi
02.04
Türkmenistanyň Prezidenti halkara sport guramalarynyň ýolbaşçylaryny kabul etdi
02.04
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Saud Arabystany Patyşalygynyň döwlet ministri bilen duşuşdy
02.04
Türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyz Katar Döwletiniň Olimpiýa Komitetiniň prezidenti bilen duşuşdy
top-arrow