Çuňňur hormatlanylýan Türkmenistanyň Prezidenti!

Sizi ynsanperwerligiň, rehimdarlygyň, sahawatlylygyň, ahlak tämizliginiň we ruhy kämilligiň baýramy bolan mukaddes Oraza baýramy mynasybetli Türkmenistanyň Halk Maslahatynyň adyndan tüýs ýürekden gutlaýaryn. Siziň janyňyzyň sag, ömrüňiziň uzak bolmagyny, ata Watanymyzyň mundan beýläk-de gülläp ösmegi, halkymyzyň röwşen geljegini üpjün etmek ugrunda alyp barýan tutumly işleriňiziň hemişe rowaçlyklara beslenmegini arzuw edýärin.

Hormatly Prezidentimiz!

Müňýyllyklardan gözbaş alýan mukaddes Oraza baýramy şükranalygy, ruhy päkligi, dostlugy, belent adamkärçiligi dabaralandyrýar. Halkymyzyň ruhy dünýäsiniň we medeniýetiniň kemala gelmeginde bu gadymy baýramyň möhüm orny bardyr. Oraza aýynyň her bir gününde halkymyz dini däp-dessurlary berjaý edip, ruhy we beden tämizligine, ahlak arassalygyna aýratyn üns berip, bu baýramy ýagşy dilegler bilen garşy alýar. Siziň parasatly baştutanlygyňyzda Halkara parahatçylyk we ynanyşmak ýylynda asyrlardan-asyrlara, nesillerden-nesillere geçirilip, kämil derejä ýetirilen, haýyr-sahawatlylygy dabaralandyrýan Oraza baýramy täze many-mazmun, milli öwüşginler bilen has-da baýlaşdyrylyp, döwürleri, nesilleri we halklary jebisleşdirýän, agzybirligimizi, jebisligimizi pugtalandyrýan baýram hökmünde giňden bellenilýär.

Belent mertebeli Prezidentimiz!

Siziň baştutanlygyňyzda Berkarar döwletiň täze eýýamynyň Galkynyşy döwründe bagtyýar, eşretli durmuşda ýaşaýan raýatlarymyzyň milli däp-dessurlary, tagat-ybadatlary berjaý etmekleri üçin ähli mümkinçilikler döredilýär. Halkymyz ata-babalarymyzdan miras galan milli gymmatlyklara hormat goýýar, bu bolsa türkmeniň öz köklerine ygrarlydygyna şaýatlyk edýär. Ruhy-ahlak gymmatlyklarynyň, dini we dünýewi dessurlaryň täze mazmun bilen baýlaşdyrylmagy netijesinde jemgyýetimiz hemmetaraplaýyn sazlaşykly ösýär. Milli medeniýetimiz, däp-dessurlarymyz, zähmetsöýerlik, hoşniýetlilik, sahylyk, myhmansöýerlik, watansöýüjilik, ynsanperwerlik, arassa ahlaklylyk ýaly asylly häsiýetler jemgyýetimiziň ösüşini üpjün edip, halkymyzy beýik işlere ruhlandyrýar. Häzirki döwürde özboluşly, gaýtalanmajak medeni mirasymyz dünýäde parahatçylygy pugtalandyrmaga, halklaryň dostlugyny berkitmäge, adamzadyň röwşen geljegini üpjün etmäge, her bir şahsyýetiň sazlaşykly ösmegine, ýokary ahlak häsiýetleriniň kemala gelmegine ýardam berýär.

Sarpasy belent Prezidentimiz!

Oraza aýynyň sahawata baý Gadyr gijesi bu ýyl hem eziz Diýarymyza özüniň sansyz sogaby bilen geldi. Halkymyz Gadyr gijesinde il-ulsumyzyň agzybirligini, ýurdumyzyň parahatçylygyny, Zeminiň asudalygyny hem-de öten-geçenlerini ýatlap, aýat-töwir okaýar, doga-dileg edýär. Siziň bu mukaddes aýda ak ýürekden toba gelen raýatlarymyzyň günäsini geçmek barada Permana gol çekmegiňiz belent adamkärçiligiň, rehimdarlygyň aýdyň beýanydyr. Bu adalatlylygyň, rehim-şepagatlylygyň, toba edeni bagyşlamagyň, nesillere adamkärçilik babatda terbiýe bermegiň türkmen nusgasydyr. Mukaddes Remezan aýynyň mübärek Gadyr gijesi mynasybetli paýtagtymyzda, ýurdumyzyň welaýatlarynda täze gurlan metjitlerde berlen agzaçar sadakalarynda okalan aýat-töwirlerde, tarawa we baýram namazlarynda pederlerimizden gelýän gymmatlyklarymyzyň mertebesini has-da beýgeldip, täze taryhy döwrümizde metjit gurmak ýaly sogaply işleri mynasyp dowam etdirýän, Arkadagly Gahryman Serdarymyz, Siziň adyňyza ýagşy doga-dilegler edilip, ata Watanymyzyň mundan beýläk-de gülläp ösmegi, halkymyzyň agzybirligi, jebisligi barada ýagşy arzuwlar edilýär.

Hormatly Prezidentimiz!

Sizi mukaddes Oraza baýramy mynasybetli Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli döwletli başlangyçlaryňyz mundan beýläk hem rowaç bolsun! Aýlaryň serweri mübärek Oraza aýynda amal edilen tagat-ybadatlar, öten-geçenlerimiziň ruhuny ýatlap berlen agzaçar sadakalary, ilimiziň asudalygy, eziz Watanymyzyň dünýädäki abraýynyň, şan-şöhratynyň has-da belende galmagy, ýurt abadançylygy üçin edilen doga-dilegler Gudraty Güýçli Beýik Biribaryň dergähinde kabul bolsun!

Sizi hormatlamak bilen,

Türkmen halkynyň Milli Lideri, 
Türkmenistanyň Halk Maslahatynyň Başlygy, Gahryman Arkadag 
Gurbanguly BERDIMUHAMEDOW.