Geçen hepdede Türkmenistanyň Döwlet haryt-çig mal biržasynyň söwdalarynda geleşikleriň 36-sy hasaba alyndy.

Daşary ýurt puluna Birleşen Arap Emirlikleriniň, Owganystanyň, Ukrainanyň işewür toparlarynyň wekilleri “Türkmennebit” döwlet konserniniň kärhanasynda öndürilen nebit ýol bitumyny, şeýle hem “Türkmenhimiýa” döwlet konserniniň kärhanasynda öndürilen hlorly natrini we karbamidi satyn aldylar.

Mundan başga-da, daşary ýurt puluna BAE-niň, Germaniýanyň, Gyrgyzystanyň telekeçilerine ýorgan-düşek daşlyklarynyň toplumlary, jinsi önümleri, nah mata we nah ýüplük ýerlenildi. Geleşikleriň jemi bahasy ABŞ-nyň 33 million 683 müň dollaryndan gowrak boldy.

Ýurdumyzyň işewürleri içerki bazar üçin jemi bahasy 175 million 405 müň manada deň bolan polipropileni we nebit önümleriniň galyndylaryny (“Türkmennebit” döwlet konserni), şeýle hem portlandsementi, float aýnasyny, tüýjümek önümleri we buýan köküniň erginini satyn aldylar.