Baş sahypa
\
Syýasat habarlary
\
­Türkmenistanda Gresiýa Respublikasynyň Adatdan daşary we Doly ygtyýarly ilçisi işe başlady
Syýasat habarlary
­Türkmenistanda Gresiýa Respublikasynyň Adatdan daşary we Doly ygtyýarly ilçisi işe başlady
Çap edildi 03.12.2024
1019

Şu gün hormatly Prezidentimiz Serdar Berdimuhamedowyň tabşyrygy boýunça Mejlisiň Başlygy D.Gulmanowa Gresiýa Respublikasynyň Türkmenistanda täze bellenen Adatdan daşary we Doly ygtyýarly ilçisi hanym Ýekaterini Ksagorariden ynanç hatyny kabul etdi.

Milli parlamentiň ýolbaşçysy döwlet Baştutanymyzyň adyndan diplomaty täze jogapkärli wezipä bellenilmegi bilen gutlap, oňa iki ýurduň arasyndaky däp bolan gatnaşyklary we hyzmatdaşlygy pugtalandyrmak boýunça asylly işinde üstünlikleri arzuw etdi.

Dostlukly ýurduň doly ygtyýarly wekili türkmen topragynda mähirli kabul edilendigi we myhmansöýerlik üçin hoşallyk bildirip, Gresiýa Respublikasynyň Prezidenti hanym Katerina Sakellaropulunyň hormatly Prezidentimiz Serdar Berdimuhamedowa iberen mähirli salamyny hem-de bagtyýarlyk, abadançylyk baradaky iň gowy arzuwlaryny beýan etdi.

Duşuşygyň barşynda Mejlisiň Başlygy diplomaty Türkmenistanyň içeri we daşary syýasatynyň esasy ugurlary bilen tanyşdyrdy. Bellenilişi ýaly, Ýewropa döwletleri bilen özara bähbitli hyzmatdaşlygy ösdürmek Türkmenistanyň alyp barýan parahatçylyk söýüjilikli daşary syýasatynyň ileri tutulýan ugurlarynyň biridir. Bu hyzmatdaşlyk ikitaraplaýyn we köptaraplaýyn görnüşde, şol sanda “Türkmenistan — Ýewropa Bileleşigi” dialogynyň, iri halkara guramalaryň, hususan-da, BMG-niň çäklerinde durmuşa geçirilýär.

Şeýle hem täze ilçä türkmen halkynyň Milli Lideri, Türkmenistanyň Halk Maslahatynyň Başlygy Gahryman Arkadagymyzyň başlangyçlary esasynda, hormatly Prezidentimiziň baştutanlygynda täze taryhy döwürde türkmen halkynyň bagtyýarlygynyň we abadançylygynyň bähbidine amala aşyrylýan düýpli özgertmeler barada maglumat berildi. Berkarar döwletiň täze eýýamynyň Galkynyşy döwründe durmuşa geçirilýän giň gerimli taslamalaryň ählisi hut şu maksatlara ýetmäge gönükdirilendir. Munuň özi diňe bir Türkmenistanda däl, eýsem, tutuş Merkezi Aziýa sebitinde-de durnukly ösüşiň gazanylmagynda uly ähmiýete eýedir.

Türkmen-grek hyzmatdaşlygynyň ileri tutulýan ugurlary boýunça pikir alyşmalaryň dowamynda syýasy-diplomatik, söwda-ykdysady, medeni-ynsanperwer ulgamlarda özara gatnaşyklary işjeňleşdirmäge iki tarapyň hem gyzyklanma bildirýändigi bellenildi.

Mejlisiň demokratik özgertmeleriň üstünlikli durmuşa geçirilmegine goşant goşmak babatda alyp barýan köpugurly işi ara alnyp maslahatlaşylan aýratyn mowzuklaryň biri boldy. Şunuň bilen baglylykda, parlamentara gatnaşyklary işjeňleşdirmegiň mümkinçiliklerine garaldy. Nygtalyşy ýaly, munuň özi döwletara dialogyň ähli esasy ugurlarda işjeňleşdirilmegine gönüden-göni ýardam berer.

Gresiýa Respublikasynyň Türkmenistandaky Adatdan daşary we Doly ygtyýarly ilçisi hanym Ýekaterini Ksagorari mähirli kabul edilendigi hem-de netijeli duşuşyk üçin hoşallyk bildirip, däp bolan dostlukly gatnaşyklary mundan beýläk-de ösdürmäge goşant goşjakdygyna, iki ýurduň we olaryň halklarynyň bähbitlerine doly laýyk gelýän hyzmatdaşlygyň hemmetaraplaýyn giňeldilmegine gönükdirilen işleri dowam etdirjekdigine ynandyrdy.

***

Onuň Alyhezreti, 

Türkmenistanyň Prezidenti

jenap Serdar Berdimuhamedowa

Siziň Alyhezretiňiz!

Ýurtlarymyzyň arasyndaky dostluk we özara düşünişmek ýörelgelerine esaslanýan gatnaşyklary pugtalandyrmak maksady bilen, hanym Ýekaterini Ksagorarini Gresiýa Respublikasynyň Türkmenistandaky Adatdan daşary we Doly ygtyýarly ilçisi wezipesine bellemek kararyna geldim. Onuň ukyp-başarnyklary we yhlasy özüne ynanylan jogapkärli wezipäni Siziň makullamagyňyza, şeýle hem meniň ynamymy ödemäge mynasyp derejede ýerine ýetirjekdigine ynam döredýär. Şunuň bilen baglylykda, hanym Ýekaterini Ksagorariniň meniň adymdan ähli beýan etjeklerine, hususan-da, Siziň Alyhezretiňize bagtyýarlyk, Türkmenistanyň halkyna bolsa rowaçlyk, abadançylyk baradaky arzuwlarymy ýetirende, oňa doly ynanmagyňyzy haýyş edýärin.

Katerina Sakellaropulu,

Gresiýa Respublikasynyň Prezidenti.

Soňky habarlar
08.06
Türkmenistanyň Prezidenti Serdar BERDIMUHAMEDOW: — Biziň esasy wezipämiz halkymyzyň ýaşaýyş-durmuş derejesini has-da gowulandyrmakdan ybaratdyr
08.06
Hormatly Prezidentimiziň adyna gelen hatlar
08.06
Türkmenistanda Gurban baýramy bellenilýär
06.06
Hormatly Prezidentimiziň adyna gelen hatlar
06.06
Garaşsyz, hemişelik Bitarap Türkmenistanyň halkyna
06.06
Türkmenistanyň Prezidenti hormatly Serdar Berdimuhamedowa
06.06
Türkmenistanyň Prezidenti hormatly Serdar Berdimuhamedowa
05.06
Türkmenistanyň Döwlet howpsuzlyk geňeşiniň mejlisi
05.06
Türkmenistanyň Prezidenti bilen Eýran Yslam Respublikasynyň Prezidentiniň arasynda telefon arkaly söhbetdeşlik
05.06
Hormatly Prezidentimiziň adyna gelen hatlar
top-arrow