12-nji oktýabrda Magtymguly adyndaky milli sazly drama teatrynda Türkmenistanyň we Mongoliýanyň artistleriniň bilelikdäki konserti geçirildi. Bu çäre Prezident Uhnaagiýn Hurelsuhyň ýurdumyza döwlet saparynyň çäklerinde guraldy.

Medeniýetleri özara baýlaşdyrmaga we Türkmenistanyň dünýäniň medeni giňişligine goşulyşmagyna gönükdirilen halkara ynsanperwer hyzmatdaşlyk syýasaty hyzmatdaş döwletlere ýurdumyzda öz milli medeniýeti bilen tanyşdyrmaga mümkinçilik döretmegi hem göz öňünde tutýar. Munuň şeýledigini Türkmenistanda geçirilýän Medeniýet günleri, şol sanda golaýda guralan Gazagystanyň Medeniýet günleri hem aýdyň tassyklaýar. Şu günki dostluk konserti bolsa iki halkyň ruhy taýdan ýakynlaşmagy üçin ýollary açmak bilen, ikitaraplaýyn gatnaşyklaryň täze derejä çykarylýandygynyň aýdyň beýanyna öwrüldi. Türkmen-mongol hyzmatdaşlygyny mundan beýläk-de ösdürmekde möhüm ädim bolan bu döredijilik çäresini geçirmek üçin dostlukly döwletiň medeniýet we sungat ussatlaryndan ybarat wekiliýet ýurdumyza geldi. Çäräniň açylyş dabarasyna ugurdaş edaralaryň, köpçülikleýin habar beriş serişdeleriniň ýolbaşçylarydyr wekilleri, ýurdumyzyň döredijilik işgärleri, ýokary okuw mekdepleriniň professor-mugallymlary, talyplar gatnaşdylar.

Çykyş edenleriň nygtaýyşlary ýaly, Aşgabatda bilelikdäki konsertiň geçirilmegi ikitaraplaýyn gatnaşyklary işjeňleşdirmäge, döredijilik intelligensiýasynyň wekilleriniň hünär gatnaşyklaryny ösdürmäge, birek-biregiň taryhyna, ruhy mirasyna halklarymyzyň gyzyklanmalaryny artdyrmaga ýardam eder. Dabara gatnaşyjylar parahatçylyk söýüjilik, özara bähbitli hyzmatdaşlyk syýasatyny alyp barýandygy, döwletara medeni gatnaşyklaryň geriminiň giňeldilýändigi üçin hormatly Prezidentimize hoşallyk bildirdiler.

Türkmenistanyň we Mongoliýanyň sungat ussatlarynyň konsert maksatnamasyna aýdymlar, folklor-tans çykyşlary girizildi. Sahnadaky ýokary ruhy joşgun sungatyň çäginiň ýokdugyny ýene-de bir gezek tassyklady. Çykyşlardan ruhy lezzet alan tomaşaçylaryň umumy pikirine görä, şeýle çäreler halklaryň arasyndaky gatnaşyklara oňyn täsirini ýetirmek bilen, milli mirasa we häzirki zaman sungatynyň gazananlaryna özara gyzyklanmalaryň artmagyna goşmaça itergi berýär.

Şeýlelikde, aýdym-sazyň we dostlugyň baýramyna öwrülen şu gezekki döredijilik çäresi iki halkyň medeniýetlerini özara baýlaşdyrmak, bu ulgamda hyzmatdaşlygy giňeltmek üçin täze mümkinçilikleri açdy.