Şu gün Daşoguz welaýatynyň Enäniň we çaganyň saglygyny goraýyş merkezine Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň serişdelerine satyn alnan, Germaniýa Federatiw Respublikasynyň lukmançylyk enjamlaryny öndürýän meşhur “B.Braun” kompaniýasynyň iki sany “Dialog+” kysymly gemodializ enjamy sowgat berildi.

Bu waka halkymyzyň, ilkinji nobatda, ýaşajyk raýatlarymyzyň saglygy we abadançylygy hakyndaky aladanyň döwlet syýasatynyň ileri tutulýan ugurlarynyň biri bolup durýandygynyň nobatdaky güwäsi boldy. Bu babatda Gahryman Arkadagymyzyň başyny başlan özgertmeler strategiýasy häzirki wagtda hormatly Prezidentimiz tarapyndan yzygiderli durmuşa geçirilýär. Şunuň bilen baglylykda, milli saglygy goraýyş ulgamynyň işini mundan beýläk-de kämilleşdirmäge, onuň düzüminiň toplumlaýyn döwrebaplaşdyrylmagyna, innowasion tehnologiýalaryň, iň gowy dünýä tejribesiniň ornaşdyrylmagyna, lukmançylyk ylmynyň ösdürilmegine, ýokary derejeli hünärmenleriň taýýarlanylmagyna, daşary ýurtly hyzmatdaşlar, ugurdaş öňdebaryjy merkezler bilen netijeli gatnaşyklaryň giňeldilmegine aýratyn ähmiýet berilýär. Abraýly halkara düzümler, şol sanda BMG-niň Çagalar gaznasy, Bütindünýä Saglygy Goraýyş Guramasy bilen hyzmatdaşlyk hem oňyn ösüş häsiýetine eýedir.

Türkmenistanda ilata hödürlenilýän lukmançylyk hyzmatlarynyň ýokary derejesini üpjün etmäge, jemgyýetde sagdyn durmuş ýörelgeleriniň ornaşdyrylmagyna amatly şertleri döretmäge gönükdirilen “Saglyk” Döwlet maksatnamasy, 2021 — 2025-nji ýyllar üçin “Sagdyn ene — sagdyn çaga — sagdyn geljek” atly Milli strategiýa we beýleki milli maksatnamalardyr taslamalar üstünlikli durmuşa geçirilýär.

Gahryman Arkadagymyzyň başlangyjy boýunça 2021-nji ýylyň martynda döredilen Howandarlyga mätäç çagalara hemaýat bermek boýunça haýyr-sahawat gaznasy lukmançylyk edaralaryna we näsag çagalara hemmetaraplaýyn hemaýat etmek arkaly bu ugurda uly işleri durmuşa geçirýär. Bu gazna Mejlisiň kararyna laýyklykda, türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň ady dakyldy.

Milli Liderimiziň asylly başlangyçlary we tagallalary türkmen jemgyýetiniň köpasyrlyk parasatly däp-dessurlarynyň, ruhy-ahlak ýörelgeleriniň mynasyp dowam etdirilýändiginiň güwäsidir. Gazna döredilen wagtyndan bäri öňde goýlan maksatlary hem-de wezipeleri amala aşyrmak ugrunda giň gerimli işleri alyp barýar. 2021-nji ýylyň tomsunda ýurdumyzyň welaýatlarynyň etrap we şäher hassahanalarynyň çagalar bölümlerine döwrebap enjamlar bilen üpjün edilen “Tiz kömek” awtoulaglary, Mary welaýat çagalar hassahanasyna “Savina” kysymly emeli dem beriş enjamy sowgat hökmünde gowşuryldy. Raýatlardan we ýuridik şahslardan gaznanyň bank hasabyna gelip gowuşýan serişdeleriň howandarlyga mätäç çagalara paýtagtymyzyň we welaýatlaryň lukmançylyk edaralarynda dürli operasiýalary geçirmek üçin bölünip berilmegi, bejergi çykdajylarynyň tölenilmegi, ýöriteleşdirilen mekdeplerde, mekdep-internatlarda terbiýelenýän, bilim alýan ýaş türkmenistanlylar üçin degişli lukmançylyk enjamlarynyň satyn alynmagy asylly däbe öwrüldi.

Mälim bolşy ýaly, haýyr-sahawat gaznasynyň ştab-kwartirasy Arkadag şäherinde gurlan Gurbanguly Berdimuhamedow adyndaky çagalar sagaldyş-dikeldiş merkeziniň edara binasynda ýerleşýär. Bu köpugurly toplumda çagalaryň saglygyny dikeltmekleri we berkitmekleri, terbiýelenmegi, bilim almagy, dynç almagy, wagtyny peýdaly geçirmegi üçin ähli zerur şertler göz öňünde tutulandyr.

Milli saglygy goraýyş ulgamyny ösdürmegiň strategiýasyny durmuşa geçirmekde keselleriň öňüni almak, sagdyn durmuş ýörelgelerini wagyz etmek bilen bir hatarda, anyklaýyş we öz wagtynda dogry bejeriş işine hem aýratyn ähmiýet berilýär. Diýarymyzyň lukmançylyk edaralarynyň ählisinde ornaşdyrylýan döwrebap ýöriteleşdirilen enjamlar bu maksatlara hyzmat edýär. Germaniýanyň «B. Braun» kompaniýasynyň iň täze önümleriniň biri bolan gemodializ — “emeli böwrek” enjamlary bedenden daşardaky şertlerde gany arassalamaga niýetlenip, ol häzirki wagtda mälim bolan dializ usuly arkaly bejerginiň islendik görnüşini geçirmäge mümkinçilik berýär. Ol dowamly böwrek ýetmezçiligi keselinden ejir çekýän hassalaryň has netijeli bejerilmegini üpjün edip, olaryň durmuş derejesini gowulandyrmaga şert döredýär.

Şu ýyl Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň adyndan şeýle enjamlar Mary welaýat Enäniň we çaganyň saglygyny goraýyş merkezine, Ahal welaýatynyň Bäherden etrap hassahanasyna, Aşgabat şäherindäki Enäniň we çaganyň saglygyny goraýyş ylmy-kliniki merkezine, Lebap welaýat köpugurly hassahanasyna, Balkan welaýatynyň Magtymguly etrap hassahanasyna sowgat berildi.

Şanly waka mynasybetli guralan dabaraly çärä gatnaşyjylar halkymyzyň saglygyny berkitmek, bagtyýar ýaşaýşyny üpjün etmek, ýaş nesli sazlaşykly ösdürmek wezipelerine berýän yzygiderli ünsi üçin türkmen halkynyň Milli Liderine we döwlet Baştutanymyza tüýs ýürekden hoşallyk bildirdiler hem-de iň gowy arzuwlaryny beýan etdiler.

***

Şu gün Daşoguz şäherinde täze 4 gatly ýaşaýyş jaýlarynyň 8-si açylyp ulanmaga berildi. Bagtyýar maşgalalara dabaraly ýagdaýda ýaşaýjylar üçin ähli amatly şertler göz öňünde tutulan öýleriň açarlary gowşuryldy.

Halkymyzyň abadan ýaşaýşyny üpjün etmek, ýaşaýyş durmuş şertlerini we hilini yzygiderli gowulandyrmak hormatly Prezidentimiziň baştutanlygynda durmuşa geçirilýän döwlet syýasatynyň esasy ugry hökmünde kesgitlenendir. Gahryman Arkadagymyzyň başyny başlan we häzirki wagtda Arkadagly Gahryman Serdarymyz tarapyndan amala aşyrylýan toplumlaýyn özgertmeleriň netijesinde, Diýarymyzda ýaşaýyş jaýlarynyň gurluşygy giň gerimli häsiýete eýe boldy. Döwrüň talaplaryny hasaba almak bilen, ýurdumyzda köp gatly, amatly öýleriň gurluşygy dowam etdirilip, şäherlerimizde ähli zerur düzümleri bolan täze ýaşaýyş toplumlary kemala getirilýär. Munuň özi ilatyň şahsy isleglerine we talaplaryna laýyk gelýän oňaýly ýaşaýyş jaýlaryny saýlap almaga mümkinçilik berýär. Elýeterli ýaşaýyş jaý goruny döretmek, ýaşaýyş jaýlaryny uzak möhletleýin karzlaşdyrmak ulgamyny ösdürmek, paýly gurluşygyň taslamalaryny durmuşa geçirmek bu ugurdaky döwlet syýasatynyň esasy wezipeleriniň hatarynda çykyş edýär. Şunuň bilen baglylykda, durmuş maksatly desgalaryň gurluşygynda hususy düzümiň kärhanalarynyň netijeli işleri alyp barýandygyny bellemek gerek.

Täze dört gatly jaýlaryň dördüsi umumylykda 80 öýli bolup, olar welaýat merkeziniň S.Türkmenbaşy şaýolunyň we Alp Arslan köçesiniň kesişýän künjeginde bina edildi. Olaryň gurluşygy Daşoguz şäher häkimliginiň buýurmasy boýunça “Derkar” hojalyk jemgyýetiniň hünärmenleri tarapyndan amala aşyryldy. Giň öýlerde balkonlar hem bolup, beýleki kömekçi otaglar göz öňünde tutulypdyr. Jaýlaryň ýerzemin gatlarynyň dükanlara bölünip berilmegi ýaşaýjylar üçin goşmaça ýeňillikleri döredýär.

Dört gatly jaýlaryň ýene dördüsiniň her birinde 16 öý bolup, olar ýurdumyzyň demirgazyk sebitiniň dolandyryş merkeziniň Gülüstan şäherçesinde gurlup ulanmaga berildi. Desgalaryň buýrujysy hökmünde şäher häkimligi, potratçysy bolup Daşoguz “Demirbetonönümleri” kärhanasy çykyş etdi. Kömekçi potratçy hökmünde bolsa “Ak bagt” we “Nurly badalga” ýerli hususy kärhanalary çekildi. Täze gurlan binalar Daşoguz şäherinden Görogly etrabyna uzaýan awtomobil ýolunyň ugrunda ýerleşýär. Her biri üç we dört otagdan ybarat ýokary amatlykly öýlerde ýaşamak üçin ähli oňaýly şertler döredilipdir. Täze jaýlar şäheriň binagärlik keşbi bilen sazlaşykly utgaşýar. Olaryň gurluşygynda ýokary hilli, häzirki zaman gurluşyk we timarlaýyş serişdeleri peýdalanyldy. Jaýlaryň töwerekleri abadanlaşdyryldy, ekologik talaplar göz öňünde tutulyp, ýaşyl zolaklar emele getirildi.

Açylyş dabaralaryna Mejlisiň deputatlary, welaýat we şäher häkimlikleriniň, jemgyýetçilik guramalarynyň wekilleri, hormatly ýaşulular, ýaşlar gatnaşdylar. Bu gün demirgazyk sebitiň bagtyýar maşgalalary üçin ýatdan çykmajak waka öwrüldi. Olar uly şatlyk-şowhun bilen jaý toýlaryny toýladylar. Asylly däbe görä, täze binalaryň gurluşygynda tapawutlanyp zähmet çeken işçi-hünärmenlere hormatly Prezidentimiziň adyndan gymmat bahaly sowgatlar gowşuryldy.

Ýygnananlar halkymyzyň abadan durmuşy we Watanymyzyň gülläp ösmegi ugrundaky hemmetaraplaýyn aladalary üçin döwlet Baştutanymyza, türkmen halkynyň Milli Liderine tüýs ýürekden hoşallyk bildirip, ähli asylly başlangyçlarynda üstünlikleri arzuw etdiler.