Türkmenistanyň we Russiýa Federasiýasynyň Gahrymany, kosmos işi boýunça «Roskosmos» döwlet korporasiýasynyň tälimçi-kosmonawt-synagçysy, kosmonawtlar toparynyň serkerdesi, häzirki wagtda Halkara kosmos stansiýasynda bolýan Oleg Kononenko wideoýüzlenmesinde Türkmenistanyň Prezidenti Serdar Berdimuhamedowy doglan güni bilen gutlady. Wideogutlagda, hususan-da, şeýle diýilýär:

«Siziň Alyhezretiňiz, 

çuňňur hormatlanylýan 

Serdar Gurbangulyýewiç!

Men, «Roskosmosyň» kosmonawty, Russiýanyň we Türkmenistanyň Gahrymany Oleg Kononenko. Doglan günüňiz mynasybetli Halkara kosmos stansiýasynyň bortundan tüýs ýürekden gutlaglarymy kabul etmegiňizi haýyş edýärin.

Sizi şahsy tanamak, hemişe Siziň aladaňyzy we ünsüňizi duýup durmak, işime berýän ýokary bahaňyz meniň üçin uly hormatdyr.

Doglan günüňizde kosmos pudagynyň ösdürilmegine ýardam bermek üçin ähli tagallalarymy edýändigime we etjekdigime Sizi ynandyrmak isleýärin. Kosmos uçuşyna men ýanym bilen Siziň suratyňyzy, Türkmenistanyň baýdagyny we Siziň kakaňyz, çuňňur hormatlanylýan türkmen halkynyň Milli Lideri Gurbanguly Mälikgulyýewiç Berdimuhamedowyň başlangyjy bilen gurlan Arkadag şäherine bagyşlanan kitaby aldym. Bu şäheriň açylmagy Türkmenistanyň tehnologik babatda ösüş derejesini tutuş dünýä äşgär etdi. Bu gymmatlyklar kosmosda meniň Türkmenistanyň we onuň halkynyň ykbaly bilen üýtgewsiz bitewüdigimi, aýrylmaz arabaglanyşygymy alamatlandyrar.

Hormatly Serdar Gurbangulyýewiç, häzirki wagtda Siziň baştutanlygyňyzda ykdysadyýetde, durmuş ulgamynda, daşary syýasatda, ylymda, medeniýetde, bilimde, sportda uly üstünlikleri gazanýan bu ajaýyp ýurtda doglandygyma diýseň buýsanýaryn.

Çuňňur hormatlanylýan jenap Prezident, Size berk jan saglyk, maşgala abadançylygyny, rowaçlyk, möhüm we jogapkärli işiňizde täze üstünlikleri arzuw edýärin! Doglan günüňiz gutly bolsun!».