Sizi Özbegistanyň ýokary döwlet sylagyna — «Ýokary derejeli dostluk» («Oliý Daražali Dustlik» ordenine mynasyp bolmagyňyz bilen tüýs ýürekden gutlaýaryn.

Siziň döwlet, syýasy we jemgyýetçilik tejribäňiz, ýiti pähim-paýhasyňyz, çuňňur ylmy garaýyşlaryňyz, öňdengörüjiligiňiz, halkymyzyň eşretli, abadan we bagtyýar durmuşda ýaşamagyny üpjün etmekde, berkarar döwletimiziň abraý-mertebesini Ýer ýüzünde belende galdyrmakda bitiren taryhy işleriňiz bilen Garaşsyz, hemişelik Bitarap Watanymyz belent sepgitlere çykdy. Halkymyzyň Arkadagy, Milli Liderimiz bolan Siziň döwletli tutumlaryňyz, taryhy başlangyçlaryňyz rowaçlanyp, türkmen halkyny bagtyýarlyga ýetirdi.

Berkarar döwletimizi has-da gülledip ösdürmek, dostlukly döwletler bilen halkara gatnaşyklary pugtalandyrmak we täze derejä çykarmak ugrunda Siziň alyp barýan taryhy ähmiýetli işleriňize bagtyýar raýatlarymyz tüýs ýürekden guwanýarlar. Bu taryhy işler milletimizde buýsanç hem minnetdarlyk duýgusyny artdyrýar.

Hormatly Milli Liderimiz!

Halkara parahatçylyk we ynanyşmak ýylynda Merkezi Aziýanyň doganlyk ýurtlary bilen netijeli we köpugurly hyzmatdaşlygy ösdürmek boýunça tutumly işler amala aşyrylýar. Garaşsyz, hemişelik Bitarap ýurdumyzyň ýakyn hyzmatdaşlarynyň biri hem Özbegistan Respublikasydyr. Häzirki döwürde türkmen-özbek gatnaşyklary köpugurly strategik hyzmatdaşlyk derejesine çykdy. Bu hyzmatdaşlyk ugurlaryň örän giň toplumy boýunça ösdürilýär. Onuň esasy aýratynlyklarynyň biri-de iki ýurduň halkara giňişlikde ýakyndan syýasy-diplomatik özara hyzmatdaşlygy bolup durýar.

Özbegistan Respublikasy Türkmenistanyň bitarap daşary syýasat ugruny, Ýer ýüzünde parahatçylygy, howpsuzlygy berkitmäge, durnukly ösüşi üpjün etmäge gönükdirilen başlangyçlaryny pugta we üýtgewsiz goldaýar. Biziň ýurdumyz hem, öz nobatynda, doganlyk Özbegistanyň halkara ähmiýetli tekliplerine hemişe hormat bilen garaýar we olary dünýäde öňe sürmäge işjeň gatnaşýar.

Gahryman Arkadagymyz!

Halkara parahatçylyk we ynanyşmak ýylynyň giň gerimli çärelere beslenýän şu günlerinde hem Siz sebitleýin hyzmatdaşlygyň, birek-birege ynamyň, özara bähbitli hyzmatdaşlygyň we ylalaşygyň pugtalanmagy, bütin dünýäde durnuklylygyň berkemegi ugrunda ägirt uly işleri durmuşa geçirýärsiňiz. Doganlyk Özbegistan Respublikasyna dostlukly saparyňyzyň dowamynda Siziň Özbegistanyň ýokary döwlet sylagyna — «Ýokary derejeli dostluk» ordenine mynasyp bolmagyňyz hem bu ugurdaky beýik işleriňiziň mynasyp ykrar edilmegidir.

Siz Türkmenistanyň we Özbegistan Respublikasynyň arasynda dostlugy, hoşniýetli goňşuçylygy, strategik hyzmatdaşlygy has-da berkitmek, döwletara gatnaşyklary hemmetaraplaýyn ösdürmek ugrunda köp taryhy işleri amala aşyrdyňyz we aşyrýarsyňyz. Siz söwda, senagat, ulag, energetika, oba hojalygy, ylym, bilim, sport we ynsanperwer ugurlarda köpugurly hem-de uzak möhletleýin hyzmatdaşlygy yzygiderli giňeltmäge ägirt uly goşant goşduňyz. Şeýle hem doganlyk halklarymyzyň has-da ýakynlaşmagyna we jebisliginiň üpjün edilmegine, taryhy, milli gymmatlyklaryň, däpleriň baýlaşdyrylmagyna, medeniýet we sungat ulgamynda gatnaşyklaryň ösdürilmegine gönükdirilen asylly işleri bitirdiňiz.

Hormatly Milli Liderimiz!

Sizi türkmen-özbek hyzmatdaşlygyny mundan beýläk-de ösdürmekde we täze derejä çykarmakda bitiren ägirt uly hyzmatlaryňyz üçin Özbegistanyň ýokary döwlet sylagyna — «Ýokary derejeli dostluk» ordenine mynasyp bolmagyňyz bilen ýene-de bir gezek tüýs ýürekden gutlaýaryn. Size berk jan saglyk, uzak ömür, il-ýurt bähbitli işleriňizde mundan beýläk-de uly üstünlikleri arzuw edýärin.

Türkmenistanyň Prezidenti
Serdar BERDIMUHAMEDOW.