Geçen hepde Türkmenistanyň halkara hyzmatdaşlygynyň barha artýan depginini, Gahryman Arkadagymyz tarapyndan öňe sürlüp, häzirki wagtda hormatly Prezidentimiziň baştutanlygynda üstünlikli amala aşyrylýan, Watanymyzyň rowaçlygyna, halkymyzyň ýaşaýyş-durmuş derejesini ýokarlandyrmaga gönükdirilen ykdysady strategiýanyň netijeli häsiýete eýedigini tassyklaýan möhüm wakalara baý boldy.

20-nji aprelde hormatly Prezidentimiz sanly ulgam arkaly iş maslahatyny geçirdi. Onda ýurdumyzyň oba hojalyk toplumynda we welaýatlarda alnyp barylýan işler bilen baglanyşykly meselelere garaldy. Şunda esasy üns möwsümleýin oba hojalyk işleriniň ileri tutulýan ugurlaryna, hususan-da, gowaça ekişini agrotehniki möhletlerde geçirmäge, bugdaýa we beýleki azyklyk ekinlere talabalaýyk ideg etmäge, önümçilige innowasion usullary ornaşdyrmaga, ýer-suw serişdelerini rejeli peýdalanmaga, tokaý zolaklarynda, öri we ekin meýdanlarynda ýangyn howpsuzlygy kadalaryny berjaý etmäge gönükdirildi.

22-nji aprelde hormatly Prezidentimiz Serdar Berdimuhamedow Gazagystan Respublikasyna amala aşyran iş saparynyň çäklerinde Sebitleýin ekologiýa sammitine we Araly halas etmegiň halkara gaznasyny esaslandyryjy döwletleriň Baştutanlarynyň Geňeşiniň nobatdaky mejlisine gatnaşdy.

Sammitiň öňüsyrasynda wekiliýet ýolbaşçylary “RES 2026 EXPO” halkara sergisi bilen tanyşdylar. Astana şäherinde Sebitleýin ekologiýa sammiti bilen utgaşyklylykda geçirilen bu sergi Merkezi Aziýanyň «ýaşyl» geljeginiň tehnologik gözden geçirilişine öwrüldi. Türkmenistanyň milli pawilýonynyň ekspozisiýasynda daşky gurşawy goramak ulgamynda döwlet syýasatynyň ileri tutulýan ugurlary, bu babatda amala aşyrylýan maksatnamalar we taslamalar tanyşdyryldy.

Hormatly Prezidentimiz «Durnukly geljek barada umumy garaýyş» mowzugynda guralan sammitiň umumy mejlisinde çykyş edip, durmuşyň ähli ugurlaryna ýaramaz täsirini ýetirýän howanyň üýtgemegi bilen bagly meseleleri bilelikde çözmek üçin howa tehnologiýalary boýunça sebit merkezini, Merkezi Aziýa ýurtlary üçin çölleşmä garşy göreşmek boýunça sebit merkezini döretmegi teklip etdi. Döwlet Baştutanymyz öňe sürülýän başlangyçlaryň netijeliligini ýokarlandyrmak maksady bilen, olary ilki bilermenler derejesinde, soňra bolsa ministrler derejesindäki maslahatlarda deslapdan ara alyp maslahatlaşmagyň we kämilleşdirmegiň, diňe umumy ylalaşyk gazanylandan soňra, bu meseleleri sammitleriň gün tertibine girizmegiň maksadalaýyk boljakdygyny belledi.

Arkadagly Gahryman Serdarymyz serhetüsti suw serişdelerini rejeli we adalatly peýdalanmak meseleleri boýunça Türkmenistanyň resmi garaýyşlaryny beýan etdi. Nygtalyşy ýaly, ýurdumyz suw meseleleri boýunça esasy konwensiýalaryň, beýleki halkara namalaryň berk berjaý edilmegi, serhetüsti derýalaryň ugrunda ýerleşýän ähli döwletleriň bähbitleriniň deň derejede göz öňünde tutulmagy, bu işe halkara guramalaryň, ilkinji nobatda, Birleşen Milletler Guramasynyň giňden gatnaşmagy esasynda çözülmeginiň tarapdary bolup çykyş edýär.

Türkmenistanyň BMG-niň howandarlygynda Merkezi Aziýa ýurtlarynda suwdan peýdalanmak meseleleri boýunça sebit geňeşini döretmek başlangyjy bilen çykyş edendigi aýdyldy. Bu geňeş suw ulgamynda tagallalary utgaşdyrýan netijeli düzüm bolup biler. Ýurdumyz Hazar deňzi sebitine girýän döwlet bolup, Hazar deňziniň ähli ekologik meseleleri babatda işjeň çykyş edýär. Şunlukda, şu ýylyň oktýabr aýynyň başynda Türkmenistanda nobatdaky ýokary derejeli duşuşyk geçiriler. Bu çäre Hazarýaka döwletleriň hyzmatdaşlygyny hil taýdan täze tapgyra çykarmaga mümkinçilik berer.

Sammitiň netijeleri boýunça «Merkezi Aziýada ekologiýa raýdaşlygy» atly ekologiýa we durnukly ösüş babatda sebitleýin hyzmatdaşlyk hakynda Merkezi Aziýa döwletleriniň Baştutanlarynyň Jarnamasy kabul edildi.

22-nji aprelde hormatly Prezidentimiz Araly halas etmegiň halkara gaznasyny (AHHG) esaslandyryjy döwletleriň Baştutanlarynyň Geňeşiniň nobatdaky mejlisine gatnaşdy. Döwlet Baştutanymyz sammitde çykyş etmek bilen, Aral deňziniň basseýni üçin durmuşy ähmiýeti bolan wezipeleriň ikinji derejä geçirilmegine ýol bermezligiň, sebitde halkara hyzmatdaşlyk hem-de utgaşdyryş gurallaryny gorap saklamagyň we ösdürmegiň zerurdygyna ünsi çekdi.

Arkadagly Gahryman Serdarymyz Türkmenistanyň 2017 — 2019-njy ýyllarda Araly halas etmegiň halkara gaznasynda başlyklyk eden döwründe gaznanyň amaly wezipelerine jogapkärçilikli we maksatnamalaýyn üns berendigini ýatlatdy. Ýakyn wagtda Aşgabatda Türkmenistanyň başlangyjy esasynda BMG-niň Merkezi Aziýada howanyň üýtgemegi bilen bagly tehnologiýalar boýunça sebit merkezi işläp başlar.

Döwlet Baştutanymyz Aral meselesini çölleşme, buzluklaryň eremegi, serhetüsti suw serişdelerini dolandyrmak we beýleki birnäçe möhüm ekologik wehimlerden aýra göz öňüne getirip bolmajakdygyny aýdyp, ekologik howpsuzlyk meselelerine sebitiň durmuş hem-de ykdysady abadançylygyny üpjün etmek boýunça umumy wezipäniň aýrylmaz bölegi hökmünde bitewülikde garamagyň zerurdygyny nygtady. Hormatly Prezidentimiz AHHG-nyň şertnama-hukuk binýadyny kämilleşdirmek we döwrebaplaşdyrmak boýunça işleri çaltlandyrmagy, geljekki bilelikdäki işiň täze wezipelerini kesgitlemegi teklip etdi. Şeýle hem dünýäde bolup geçýän üýtgeşmeleri, şol sanda geosyýasy we ykdysady häsiýetli ýagdaýlary göz öňünde tutup, Merkezi Aziýa ýurtlary tarapyndan BMG bilen AHHG-nyň hyzmatdaşlygy baradaky Baş Assambleýanyň täze Kararnamasyny bilelikde işläp taýýarlamak teklip edildi.

Mejlisiň netijeleri boýunça birnäçe resminama gol çekildi. Şolaryň hatarynda Araly halas etmegiň halkara gaznasyny esaslandyryjy döwletleriň Baştutanlarynyň Astana Beýannamasy; Araly halas etmegiň halkara gaznasynyň Prezidentini saýlamak hakynda AHHG-ny esaslandyryjy döwletleriň Baştutanlarynyň Çözgüdi; Gazagystan Respublikasynyň Araly halas etmegiň halkara gaznasynda başlyklyk etmeginiň netijeleri hakynda Araly halas etmegiň halkara gaznasyny esaslandyryjy döwletleriň Baştutanlarynyň Çözgüdi; 26-njy marty Aral deňziniň, Amyderýanyň we Syrderýanyň halkara güni diýip yglan etmek hakynda AHHG-ny esaslandyryjy döwletleriň Baştutanlarynyň Çözgüdi bar.

21-nji aprelde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Arkadag şäherine iş saparyny amala aşyryp, şäheriň gurluşygynyň ikinji tapgyrynda alnyp barylýan işler we gurulýan hem-de döwrebaplaşdyrylýan desgalaryň şekil taslamalary bilen tanyşdy, degişli ýolbaşçylaryň gatnaşmagynda iş maslahatyny geçirdi.

Daşary ýurt dillerini öwredýän ýöriteleşdirilen mekdebi döwrebaplaşdyrmagyň depginine, onuň tehniki taýdan enjamlaşdyrylyşyna hem-de dürli gurnaklaryň guralyşyna aýratyn üns berildi. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň goldaw bermeginde amala aşyrylýan taslama açyk we ýapyk görnüşli stadionlary, sportuň dürli görnüşleri bilen meşgullanmak üçin niýetlenen sport desgalaryny öz içine alýar. Mundan başga-da, mekdebiň ýanynda 320 orunlyk çagalar bagynyň bolmagy ony sowatly we hünärli ýaş nesli ulgamlaýyn esasda taýýarlamak boýunça bitewi topluma öwrer.

Gahryman Arkadagymyz «Arkadag» merkeziniň hem-de gaýtadan dikeldilýän energiýa çeşmesi esasynda işlejek Gün elektrik bekediniň taslamalary bilen içgin tanşyp, häzirki zaman binagärlik meýillerini we milli binagärlik däplerini nazarda tutup, her bir obýektiň binagärlik keşbiniň özboluşlylygy, olaryň innowasion-tehnologik çözgütler esasynda enjamlaşdyrylyşy babatda degişli düzedişleri girizdi.

Iş maslahatynyň dowamynda Milli Liderimiz lukmançylyk klasteriniň önümçilik toplumlarynyň we Ahalteke atlary şaýolunyň gurluşygynyň depginine hem-de hiline aýratyn ünsi çekdi we bu ugurda bar bolan ähli kemçilikleriň gysga möhletde aradan aýrylmalydygyny belledi. Şunuň bilen birlikde, maslahatda Türkmen bedewiniň milli baýramy mynasybetli çäreleriň maksatnamasyny taýýarlamak, şanly sene mynasybetli raýatlary täze jaýlara göçürip getirmek, oba hojalyk uniwersitetiniň binalar toplumynyň gurluşygyna degişli meseleler baradaky maglumatlar diňlenildi.

24-nji aprelde hormatly Prezidentimiz sanly ulgam arkaly Ministrler Kabinetiniň nobatdaky mejlisini geçirdi. Onda döwlet durmuşyna degişli birnäçe meselelere seredildi. Şolaryň hatarynda milli parlamentiň ýurdumyzyň kanunçylyk binýadyny döwrebaplaşdyrmak boýunça alyp barýan işleri bar. Häzirki wagtda “Türkmenistanyň Garaşsyzlygynyň 35 ýyllygyna bagyşlanyp geçirilen dabaraly harby ýörişe gatnaşyja” atly Türkmenistanyň ýubileý medalyny döretmek hakynda”, “Gozgalmaýan emläge bolan hukuklaryň döwlet belligine alynmagy hakynda” Türkmenistanyň Kanunlarynyň taslamalaryny taýýarlamak, Türkmenistanyň Gümrük kodeksine, başga-da käbir kanunçylyk namalaryna üýtgetmeler we goşmaçalar girizmek, döwletimiziň halkara resminamalara goşulmagyny hukuk taýdan goldamak boýunça degişli işler alnyp barylýar.

Döwlet Baştutanymyzyň garamagyna oba hojalyk önüm öndürijilerini höweslendirmek, Seýdiniň nebiti gaýtadan işleýän zawodynyň önümçilik desgalaryny döwrebaplaşdyrmak, oba hojalygyny mundan beýläk-de toplumlaýyn ösdürmek, Mary welaýatynyň Baýramaly şäherindäki dokma toplumynda ýerli çig mal serişdelerinden ýokary hilli ýüň ýüplügi öndürýän täze önümçiligi işe girizmek, aragatnaşyk pudagy üçin ýokary bilimli hünärmenleri taýýarlamak baradaky teklipler hödürlenildi. Türkmen bedewiniň milli baýramyna görülýän taýýarlyk işleri, şu ýylyň maýynda geçiriljek esasy çäreleriň we medeni-durmuş maksatly binalary açyp ulanmaga bermegiň Tertibi barada hasabat berildi.

Türkmenistanyň Aziýa — Ýuwaş umman sebitiniň ýurtlary bilen hyzmatdaşlygyny mundan beýläk-de ösdürmegiň çäklerinde, şeýle hem şol ýurtlarda döwletimiziň diplomatik wekilçiligini giňeltmek maksady bilen, Türkmenistanyň Hindistan Respublikasyndaky we Malaýziýadaky ilçilerini, degişlilikde, şol bir wagtda, Maldiwler Respublikasyna we Bruneý-Darussalam Döwletine ilçi hökmünde bellemek baradaky teklipler beýan edildi.

Mejlisiň dowamynda öňe sürlen teklipleri makullap, döwlet Baştutanymyz degişli ýolbaşçylara meýilleşdirilen wezipeleri durmuşa geçirmek boýunça zerur çäreleri görmegi tabşyrdy.

Hormatly Prezidentimiz Ýeňiş güni mynasybetli uruş weteranlaryna we uruş ýyllarynda ýurdumyzda zähmet çeken enelere ýadygärlik sowgatlary gowşurmagy tabşyrdy, şeýle-de mejlise gatnaşyjylary, mähriban halkymyzy Türkmen bedewiniň milli baýramy bilen tüýs ýürekden gutlady.

Geçen hepdede Mejlisde Argentina Respublikasynyň Türkmenistanda täze bellenilen Adatdan daşary we Doly ygtyýarly ilçisi Enrike Ignasio Ferrer Wieýradan ynanç haty kabul edildi. Duşuşygyň çäklerinde diplomat ýurdumyzyň parahatçylyk söýüjilikli daşary syýasaty hem-de ählumumy abadançylygy, durnukly ösüşi üpjün etmäge gönükdirilen möhüm halkara başlangyçlary bilen tanyşdyryldy. Şeýle-de oňa Mejlisiň düzümi, köpugurly işi barada maglumat berildi.

25-nji aprelde Aşgabat atçylyk sport toplumynda hormatly Prezidentimiz Serdar Berdimuhamedowyň gatnaşmagynda Türkmen bedewiniň milli baýramy mynasybetli dabaralar geçirildi.

Baýramçylyk çäreleriniň öňüsyrasynda Aşgabat atçylyk sport toplumynyň öňünde meşhur ahalteke bedewi Pyýadanyň heýkeliniň açylyş dabarasy boldy. Gözelligiň nusgasy bolan bu bedew Aşgabat şäherinde 1998-nji, 1999-njy, 2000-nji we 2001-nji ýyllarda geçirilen ahalteke atlarynyň gözellik sergileriniň ýeňijisi, 2008-2009-njy ýyllarda Özbegistan Respublikasynyň Daşkent şäherinde ahalteke atlarynyň arasynda geçirilen «Türküstanyň ýyldyzy» atly gözellik bäsleşiginiň baş baýragyna mynasyp boldy. Häzirki wagtda ýazky at çapyşygy möwsüminde üçýaşar atlaryň arasynda 1 müň 800 metr aralyga geçirilýän çapyşyklaryň ýeňijilerine onuň adyny göterýän «Pyýada» baýragy gowşurylýar.

Toplum milli medeniýetimiziň, türkmen däp-dessurlarynyň ruhuna ýugrulan ägirt uly sergi meýdançasyna öwrüldi. Türkmen topragynda kemala gelen behişdi bedewler bu ýerdäki dabaralaryň baş gahrymanlary boldy.

Atçylyk pudagyny ösdürmek barada edýän yzygiderli aladalaryna çäksiz minnetdarlygyň nyşany hökmünde döwlet Baştutanymyza her welaýatdan, paýtagtymyzdan, Arkadag şäherinden, harby we hukuk goraýjy edaralaryň adyndan ajaýyp bedewler sowgat berildi. Ýurdumyzyň ähli atşynaslarynyň adyndan hormatly Prezidentimize Arkahan, Gahryman Arkadagymyza bolsa Daghan atly bedew sowgat berildi. Döwlet Baştutanymyz türkmen halkynyň gadymdan gelýän asylly däplerine eýerip, Ogulabat enäniň örüp, miras goýan alajasyny Daghan atly bedewiň, mähriban käbesi Ogulgerek ejäniň ören alajasyny bolsa Arkahanyň boýnuna daňdy.

«Ýylyň iň owadan ahalteke bedewi» atly halkara gözellik bäsleşiginiň jemleýji tapgyrynda behişdi bedewlere sarpa goýýanlaryň köp sanlysy esasy nesil ugurlarynyň binýadyny goýan şöhratly bedewleriň häzirki nesilleriniň täsin gözelligine baha bermäge mümkinçilik aldylar. Owadan, syratly, ajaýyp atlaryň 10-synyň arasyndan Türkmenistanyň Prezidentiniň Ahalteke atçylyk toplumyna degişli mele reňkli Hankerwen atly bedew iň owadan at hökmünde ykrar edildi. Halkara gözellik bäsleşiginiň ýeňijisine hormatly Prezidentimiziň degişli Buýrugyna laýyklykda, ak reňkli «Toyota Fortuner» kysymly ýeňil awtoulagyň açary, göçme kubok hem-de diplom gowşuryldy.

Şeýle-de uzak aralyga atly ýöriş bäsleşiginiň hem-de bedewleriň päsgelçiliklerden böküp geçmek boýunça bäsleşiginiň, bedewleriň gaýtalanmajak tebigy gözelligini sungat eserlerinde çeper beýan etmek ugrunda yglan edilen döredijilik bäsleşiginiň ýeňijilerini sylaglamak dabarasy boldy.

Behişdi bedewlerimiziň şanyna guralan baýramçylyk çäreleri ýurdumyzyň ähli künjeklerinde geçirilen köp sanly sergileri, maslahatlary, bäsleşikleri, sungat ussatlarynyň konsertlerini öz içine aldy. Baýramçylygyň öňüsyrasynda S.A.Nyýazow adyndaky Türkmen oba hojalyk uniwersitetinde «Türkmen bedewi we dünýäniň seýisçilik sungaty» atly XVIII halkara ylmy maslahat geçirildi. Maslahatda çykyş edenler häzirki döwürde Gahryman Arkadagymyzyň hem-de hormatly Prezidentimiziň tagallalary esasynda müňýyllyklaryň jümmüşinden gözbaş alýan atçylyk pudagyna kuwwatly itergi berlendigini nygtadylar. Maslahatyň dowamynda Türkmen bedewiniň milli baýramy mynasybetli, ýurdumyzyň atçylyk pudagyny ösdürmekde aýratyn tapawutlanan atşynaslara «Türkmenistanyň at gazanan atşynasy» diýen hormatly ady dakmak hakynda Türkmenistanyň Prezidentiniň Permany okaldy.

Giňden bellenilen Türkmen bedewiniň milli baýramy jemgyýetimiziň agzybirligini hem-de bitewüligini, häzirki nesilleriň ata-babalarymyzyň belent ruhy gymmatlyklaryna üýtgewsiz ygrarlylygyny aýdyň görkezdi. «Garaşsyz, baky Bitarap Türkmenistan — bedew batly at-myradyň mekany» şygary astynda geçip, ýurdumyzyň mukaddes Garaşsyzlygynyň 35 ýyllygy bilen dabaralanýan 2026-njy ýylda halkymyzyň buýsanjyna, milli baýlygyna öwrülen ahalteke bedewi Watanymyzyň ägirt uly üstünlikleriniň we döredijilikli kuwwatynyň ajaýyp nyşanydyr.