Şu gün «Awaza» milli syýahatçylyk zolagynda «Türkmenistanyň gurluşyk, senagat, himiýa, energetika pudaklarynyň ösüşi» atly halkara sergi we maslahat öz işine başlady. Senagat we gurluşyk önümçiligi ministrliginiň guraýan giň gerimli sergisi gurluşyk, senagat önümçiligi, energetika, himiýa senagaty, ýol gurluşygy pudaklarynda ýurdumyzyň gazananlary, dünýä belli kompaniýalaryň ýöriteleşdirilen enjamlary, öňdebaryjy tehnologiýalary bilen tanyşdyrmagy maksat edinýär.

Serginiň açylyş dabarasyna Mejlisiň Başlygy, Hökümet agzalary, Türkmenistandaky diplomatik wekilhanalaryň we halkara guramalaryň ýolbaşçylarydyr işgärleri, jemgyýetçilik guramalarynyň, köpçülikleýin habar beriş serişdeleriniň wekilleri gatnaşdylar. Döredijilik toparlarynyň aýdym-sazly çykyşlary giň sergi zalynda ýaýbaňlandyrylan ajaýyp baýramçylyk gurşawyna aýratyn öwüşgin çaýdy.

Serginiň açylyş dabarasynda hormatly Prezidentimiziň foruma gatnaşyjylara iberen Gutlagy okaldy. Döwlet Baştutanymyz Garaşsyz Türkmenistanyň hemişelik Bitaraplygynyň 30 ýyllyk baýramynyň öňüsyrasynda guralýan halkara serginiň we maslahatyň ýurdumyzyň senagat kuwwatyny artdyrmakda, gurluşyk, senagat toplumynyň pudaklarynyň milli ykdysadyýetimizi diwersifikasiýa ýoly bilen ösdürmek, dünýä bazarlarynda uly islegden peýdalanýan harytlaryň täze önümçiligini döretmek we bar bolanlarynyň kuwwatyny artdyrmak boýunça ileri tutulýan maksatnamalary durmuşa geçirmekde uly ähmiýetini belläp, Awazada geçirilýän bu möhüm çäräniň Berkarar döwletiň täze eýýamynyň Galkynyşy döwründe sebitleri senagatlaşdyrmaga we durmuş-ykdysady taýdan has-da ösdürmäge, toplumyň pudaklaryna häzirki zaman tehnologiýalaryny ornaşdyrmaga, sanly ykdysadyýet konsepsiýasyny işjeň durmuşa geçirmäge ýardam etjekdigine berk ynam bildirdi.

“Türkmenistan gurýan ýurtdur, kuwwatly döwletdir. Ýurdumyzda amala aşyrylýan gurluşyklar Garaşsyz Watanymyzyň dünýäde kuwwatly hem-de ähli ugurlar boýunça ösýän döwletdigini aýdyň görkezýär. Häzirki döwürde Diýarymyzyň sebitlerinde häzirki zamanyň ösen isleglerine laýyk gelýän kämil durmuş düzümleri kemala gelýär. Binagärlik keşbinde döwrümiziň döredijilik ruhuny jemleýän täze nusgalyk şäherleriň, şäherçeleriň, döwrebap obalaryň ençemesi döredildi, häzirki zaman bilim edaralary, sport desgalary, ýaşaýyş jaýlary, seýilgähler, kaşaň myhmanhanalar, sport-sagaldyş, lukmançylyk merkezleri, şypahanalar, ýokary tizlikli awtomobil ýollary, iri senagat-önümçilik toplumlary hem-de beýleki binalardyr desgalar guruldy. Olaryň ençemesiniň gurluşygy giň gerimde alnyp barylýar. Bu bolsa ýurdumyzda adam hakynda edilýän aladanyň ýokary derejä göterilýändiginiň, Gahryman Arkadagymyzyň «Döwlet adam üçindir!» diýen ýörelgesiniň rowaçlanýandygynyň aýdyň nyşanydyr” diýlip, hormatly Prezidentimiziň Gutlagynda nygtalýar. Döwlet Baştutanymyzyň Gutlagy uly üns bilen diňlenildi. Soňra foruma gatnaşyjylar serginiň ekspozisiýasy bilen tanyşdylar.

Türkmen halkynyň Milli Lideri Gahryman Arkadagymyzyň başlangyçlary, hormatly Prezidentimiziň taýsyz tagallalary bilen ýurdumyz ösüşiň we döwrebaplaşdyrmagyň täze döwrüne gadam basdy. Gurluşyk-senagat toplumy ykdysady ösüşiň esasy hereketlendiriji güýji hökmünde çykyş edip, milli ykdysadyýetimiziň okgunly senagatlaşdyrylmagyny üpjün edýär. Hormatly Prezidentimiziň öňdengörüjilikli syýasaty netijesinde toplum daşary ýurtlardan getirilýän harytlaryň ornuny tutýan we eksport ugurly önümleriň önümçiligini ösdürmek boýunça öňde goýlan wezipeleri üstünlikli ýerine ýetirýär. Ýurdumyzda dünýä standartlaryna laýyk gelýän döwrebap, ýokary tehnologiýaly infrastrukturany döretmek babatda giň möçberli işler durmuşa geçirilýär. Täze ýaşaýyş toplumlary, senagat kärhanalary, medeni-durmuş maksatly desgalar, halkara ulag-logistika merkezleri gurulýar. “Akylly” şäher konsepsiýasy esasynda gurlan, durnukly ösüş ýörelgelerini, öňdebaryjy sanly tehnologiýalary özünde jemleýän Arkadag şäheri bu giň möçberli özgertmeleriň aýdyň nyşanydyr.

Täze sement zawodlarynyň, kerpiç, demirbeton gurnamalaryny, aýna we beýleki gurluşyk serişdelerini öndürýän önümçilikleriň gurulmagy Diýarymyzda ýaýbaňlandyrylan giň möçberli gurluşyklary esasy serişdeler bilen doly üpjün etmäge mümkinçilik berýär. Şunda önümçiligiň ekologik taýdan arassa bolmagyna, ýerli çig mal binýadyna daýanmagyna aýratyn üns berilýär. Şunuň bilen birlikde, tebigy gazyň baý gorlaryny çuňňur gaýtadan işlemäge gönükdirilen himiýa senagaty okgunly ösdürilýär. Döwrebap gazhimiýa toplumlarynyň gurulmagy polimerlerden başlap, oba hojalyk dökünlerine çenli dünýä bazarlarynda uly isleg bildirilýän himiýa önümleriniň giň görnüşlerini öndürmäge ýardam berýär. Bu strategiýa ýurdumyzyň ykdysady garaşsyzlygy bilen bir hatarda, ygtybarly hyzmatdaş hökmünde Türkmenistanyň halkara bazarlaryndaky ornuny hem pugtalandyrýar.

Gurluşyk-senagat toplumynyň ösüşi netijeli halkara hyzmatdaşlyk bilen berk baglanyşyklydyr. Türkmenistan işewürlik hem-de maýa goýumlar üçin amatly şertleri döredip, olaryň hukuk goraglylygyny kepillendirýär. Dünýäniň iri kompaniýalary türkmen bazaryna strategik taýdan ähmiýetli we geljegi uly meýdança hökmünde garaýarlar.

...Sergi meýdançasynda ýurdumyzyň ministrlikleriniň, döwlet konsernleriniň, şol sanda Senagat we gurluşyk önümçiligi, Energetika, Gurluşyk we binagärlik ministrlikleriniň, «Türkmenhimiýa» döwlet konserniniň, Awtomobil ýollarynyň gurluşygyny dolandyrmak baradaky döwlet agentliginiň, ýerli we daşary ýurt kompaniýalarynyň özboluşly dizaýnly diwarlyklary ýerleşdirilipdir. «Akylly» şäher konsepsiýasy esasynda gurlan Arkadag şäheriniň sergi bölümi bu ýere gelýänleriň aýratyn ünsüni çekýär. Sergi diwarlygynda ýurdumyzyň «ýaşyl» gurluşyk ulgamynda ýeten belent sepgitleri beýan edilýär. Arkadag şäherinde milli binagärligiň iň gowy däpleri şäher gurluşygynyň we dizaýnyň häzirki zaman meýilleri bilen sazlaşykly utgaşýar.

Dabaraly açylan wagtyndan bäri geçen döwrüň dowamynda Arkadag şäheri “akylly” şähergurluşyk maksatnamasy ulgamynda ýokary görkezijilerini, innowasion mümkinçiliklerini, ekologik derejesini tassyklaýan abraýly halkara güwänamalar hem-de baýraklar bilen sylaglanyldy. Geçen ýyl bu şäher Koreýa Respublikasynda geçirilen “World Smart City Expo” halkara sergisinde “Iň tapawutlanan “akylly” şäher”, “Daşary ýurt “akylly” şäheri”, “World Smart City Expo 2024” halkara sergisine goşan uly goşandy üçin” atly baýraklara mynasyp boldy. Mundan başga-da, oňa Wena şäherinde ýerleşýän Ýewropanyň Hil barlaglary boýunça jemgyýetiniň hil babatda “Hil saýlawy — 2024” nyşany bolan “Diamond” derejesi berildi. Munuň özi Arkadag şäheriniň diňe bir sebitde däl, eýsem, bütin dünýäde-de ykrar edilen “akylly” şäher hökmünde abraýynyň barha artýandygyna şaýatlyk edýär. Bu ýerde ekologiýa ýaly möhüm ugra hem aýratyn üns berildi. Şunuň bilen baglylykda, desgalaryň gurluşygynda ekologik taýdan arassa gurluşyk serişdeleri ulanyldy. Arkadag şäheriniň “Ýewropada Howpsuzlyk we Hyzmatdaşlyk Guramasynyň sebitinde durnukly, “ýaşyl”, howa üçin oňaýly we innowasion çözgütli şäherleri ösdürmek” taslamasyna goşulýandygy baradaky güwänamanyň, Hytaýyň Hançžou Dýanszi uniwersitetiniň bu şäheriň ekologik taýdan arassalygyny alamatlandyrýan Üstünlik güwänamasynyň gowşurylmagy hem munuň şeýledigini aýdyň görkezýär.

“Arkadag Medisina Klasteri Menejment” kärhanasynyň öndürýän saglygy goraýyş maksatly önümleri sergä gatnaşyjylarda uly gyzyklanma döretdi. Mälim bolşy ýaly, gysga wagtda kärhananyň önümçilik zynjyry, tehnologiýasy kesgitlenilip, ýörite haryt nyşany döredildi hem-de degişli sertifikatlaşdyrma işleri geçirildi. Kärhananyň öndürýän pamyk taýajyklary, dokalmadyk matadan bir gezeklik agyz-burun örtükleri, başgaplary, halatlary, aýakgap örtükleri we beýleki serişdeleri ýurdumyzyň saglygy goraýyş edaralarynda giňden ulanylýar. “Arkadag Medisina Klasteri Menejment” kärhanasy häzirki wagtda çagalar üçin zerur witaminler bilen baýlaşdyrylan çaga iýmitiniň dürli görnüşini öndürýär. Daşyndan getirilýän harytlary ýurdumyzda öndürmek boýunça giň gerimli işleriň netijesi bolan bu önümler ýokary hil derejesi, ekologik taýdan arassalygy bilen tapawutlanýar. Kärhana geljekde önümçilik hataryny mundan beýläk-de artdyrmagy maksat edinýär.

«Türkmenhimiýa» döwlet konserniniň diwarlygynda bäsdeşlige ukyply, eksport ugurly harytlar tanyşdyrylýar. Eksportyň binýady hökmünde gazhimiýa pudagynyň mümkinçiliklerine aýratyn üns çekilýär. Awtomobil ýollarynyň gurluşygyny dolandyrmak baradaky döwlet agentliginiň pawilýonynda döwrebap, ýokary tizlikli awtomobil ýollaryny, milli we sebit ähmiýetli ulag-ýol infrastrukturasyny gurmak boýunça taslamalar ýerleşdirilipdir. Energetika ministrliginiň sergi bölüminde innowasiýalar we tehnologiýalar, hususan-da, Türkmenistanyň gaýtadan dikeldilýän energiýa çeşmelerini, şol sanda Gün, ýel energiýasyny milli energetika ulgamyna ornaşdyrmak boýunça durmuşa geçirýän anyk işleri beýanyny tapýar.

Türkmenistanyň Senagatçylar we telekeçiler birleşmesiniň agzalary halkara hil standartlaryna laýyk gelýän gurluşyk serişdelerini öndürýän kärhanalary döretmäge, senagat, durmuş-medeni maksatly dürli desgalaryň gurluşyklaryna işjeň gatnaşýarlar. Olar döwlete dahylly bolmadyk pudagyň gurluşyk ulgamyndaky kuwwatyny we mümkinçiliklerini görkezdiler. Senagat we gurluşyk önümçiligi ministrligi bilen bilelikde döredilen «Aýdyň gijeler» hojalyk jemgyýetiniň önümleri ýurdumyzda giňden meşhurdyr. Bu hojalyk jemgyýeti öňdebaryjy kompaniýalar bilen hyzmatdaşlygy ýola goýup, elektron enjamlary öndürmekde dünýäniň öňdebaryjy tejribesini özleşdirip, daşary ýurtlardan getirilýän harytlaryň ornuny tutýan önümleriň, şol sanda kompýuterleriň, monobloklaryň, smartfonlaryň, routerleriň, smart-telewizorlaryň, sowadyjylaryň we beýlekileriň önümçiligini ýola goýdy. Umuman, ekologik taýdan arassa, ýokary tehnologiýaly, şol bir wagtyň özünde ýokary hilli önümleriň önümçiligi, olaryň halkara ülňülere doly laýyk gelmegi ýurdumyzyň gurluşyk we senagat pudagynyň daşary ýurtlardaky uly abraýyny üpjün edýär.

Sergä gatnaşýan daşary ýurtlaryň işewür toparlarynyň wekilçilikli düzümi iň gowy dünýä tejribelerini, öňdebaryjy tehnologiýalary çekmäge uly ähmiýet berýän Türkmenistanyň okgunly ösýän bazaryna gyzyklanmalaryň barha artýandygyna şaýatlyk edýär. Şolaryň hatarynda ýurdumyzyň ozaldan gelýän hyzmatdaşlary hem bar.

Soňra forum «Türkmenistanyň gurluşyk, senagat, himiýa, energetika pudaklarynda durnukly ösüşe ugrukdyrylýan maýa goýumlar we özara bähbitli hyzmatdaşlygy ösdürmegiň geljegi» atly plenar mejlis bilen öz işini dowam etdi. Mejlise ýurdumyzyň gurluşyk we senagat toplumynyň, dünýäniň öňdebaryjy ugurdaş kompaniýalarynyň ýolbaşçylary gatnaşdylar.

Türkmen tarapynyň wekilleri çykyşlarynda milli ykdysadyýetimiziň esasy pudaklaryny ösdürmegiň mümkinçilikleri barada durup geçdiler. Bellenilişi ýaly, häzirki döwürde ýurdumyzda senagaty ösdürmek, toplumyň pudaklaryna maýa goýumlary gönükdirmek esasynda täze, dünýäniň öňdebaryjy kompaniýalarynyň innowasion tehnologiýalary bilen enjamlaşdyrylan döwrebap kärhanalary gurmak, ozal hereket edýänlerini döwrebaplaşdyrmak, daşary ýurtlardan getirilýän harytlaryň ornuny tutýan önümçilikleri döretmek we eksport mümkinçiliklerini ýokarlandyrmak, önümçilige sanly ykdysadyýeti ornaşdyrmak wezipeleri üstünlikli amala aşyrylýar. Ýurdumyzy senagatlaşdyrmak, ýerli çig malyň esasynda ýola goýlan önümçilikleriň gerimini giňeltmek Gahryman Arkadagymyz tarapyndan başy başlanyp, hormatly Prezidentimiziň baştutanlygynda üstünlikli durmuşa geçirilýän döwlet syýasatynyň möhüm ugurlarynyň biridir. Şunda öndürilýän önümleriň bäsdeşlige ukyplylygyny ýokarlandyrmaga, önümçiligiň ylmy-tehniki binýadyny pugtalandyrmaga uly ähmiýet berilýär. Bu işleriň oňyn netijeleri bolsa täze önümçilik toplumlarynyň döremegine, importyň ornuny tutýan harytlaryň öndürilişiniň möçberini artdyrmaga ýardam berýär.

Gurluşyk we senagat toplumyna gönükdirilýän maýa goýumlara uzak möhletleýin ykdysady ösüşi üpjün etmek, halkymyzyň ýaşaýyş-durmuş derejesini ýokarlandyrmak üçin binýat hökmünde garalýar. Şunuň bilen baglylykda, Türkmenistanda daşary ýurtlaryň işewürleri, hususan-da, ýokary tehnologiýaly we innowasion taslamalar üçin amatly maýa goýum ýagdaýynyň hem-de zerur şertleriň döredilendigi bellenildi. Türkmenistan halkara söwdany, sebitiň ýurtlarynyň arasyndaky hyzmatdaşlygy giňeltmäge gönükdirilen infrastruktura taslamalaryny durmuşa geçirip, Beýik Ýüpek ýolunyň çatrygyndaky möhüm üstaşyr ulag merkezi hökmünde eýeleýän ornuny pugtalandyrýar. Ýurdumyzda amala aşyrylýan ähli iri taslamalar diňe bir ykdysadyýeti ösdürmäge däl, eýsem, halkymyzyň ýaşaýyş-durmuş derejesini hem ýokarlandyrmaga gönükdirilendir.

Plenar mejlis halkara işewürlik jemgyýetçiliginiň türkmen bazaryna barha artýan gyzyklanmasyny görkezdi. «Çalyk Holding», «Rönesans Holding» ýaly iri gurluşyk kompaniýalary ýurdumyzda iri infrastruktura taslamalaryny durmuşa geçirmekde gazanan köpýyllyk tejribeleri bilen tanyşdyrdylar. Olar gurluşygyň, logistikanyň, infrastrukturanyň sebit merkezi hökmünde Türkmenistanyň strategik ähmiýetini nygtap, ýurdumyz bilen hyzmatdaşlygyň ýokary derejesini bellediler. Işewürler çykyşlarynda Türkmenistanyň hemişelik Bitaraplygynyň 30 ýyllygynyň giňden dabaralandyrylýan ýylynda şeýle ýokary derejeli foruma gatnaşmaga döredilen mümkinçilik üçin Gahryman Arkadagymyza we hormatly Prezidentimize tüýs ýürekden hoşallyklaryny beýan edip, bu forumyň “Awaza” milli syýahatçylyk zolagynda geçirilmeginiň uly ähmiýetine ünsi çekdiler.

Nygtalyşy ýaly, häzirki wagtda Türkmenistan ykdysadyýetiň ähli pudaklarynda uly ösüşleri gazanýar. Dürli taslamalar durmuşa geçirilýär. Munuň özi Türkmenistanda amatly maýa goýum ýagdaýynyň döredilýändiginiň aýdyň güwäsidir. Çykyş edenler daşary ýurt kompaniýalaryna netijeli işlemäge döredilýän mümkinçilikler üçin Milli Liderimize hem-de döwlet Baştutanymyza hoşallyklaryny beýan etdiler.

«Mitsubishi Heavy Industries, Ltd.», «China Energy International Group Co., Ltd.» ýaly iri senagat we tehnologiýa kompaniýalarynyň ýolbaşçylary türkmen ykdysadyýetiniň, hususan-da, onuň energetika, senagat ulgamlaryndaky ägirt uly mümkinçiliklerine ýokary baha berdiler hem-de milli maksatnamalary durmuşa geçirmek üçin tehnologik hyzmatdaşlygy giňeltmäge taýýardyklaryny beýan etdiler. «Mitsubishi Heavy Industries, Ltd.» kompaniýasynyň Baş ýerine ýetiriji direktory Eisaku Ito ýolbaşçylyk edýän kompaniýasyna Türkmenistanyň ykdysady ösüşine goşant goşmaga döredilen mümkinçilik üçin Gahryman Arkadagymyza we hormatly Prezidentimize tüýs ýürekden hoşallyk bildirip, tebigy gazyň ägirt uly gorlaryna eýe bolan Türkmenistanyň gazhimiýa senagatyny ösdürmek babatda uly kuwwatynyň bardygyny nygtady. Şeýle hem ol kompaniýanyň Türkmenistanda durmuşa geçirýän taslamalaryna ünsi çekip, Balkan welaýatynda karbamid öndürmek boýunça täze toplumda kömürturşy gazyny ýygnap almak boýunça täze tehnologiýanyň ornaşdyryljakdygyny aýtdy. Munuň özi Merkezi Aziýada şeýle tehnologiýa ornaşdyrylan ilkinji toplum bolar.

Halkara forumyň plenar mejlisiniň ahyrynda Gurluşyk we senagat toplumynyň işgärleriniň güni mynasybetli Türkmenistanyň gurluşyk we senagat toplumynyň ösüş strategiýasynyň çäklerinde ýurdumyzda gurluşyk işlerini alyp barmakda, gurluşyga innowasion hem-de «akylly» infrastruktura çözgütlerini ornaşdyrmakda durmuşa geçirilýän döredijilikli we netijeli işler üçin ilkinji «akylly» şäher bolan Arkadag şäherine ýokary baha berilýändigi baradaky Şahadatnama we ýörite nyşan gowşuryldy. Munuň özi Gahryman Arkadagymyzyň yhlasyndan, hormatly Prezidentimiziň tagallalaryndan binýat bolan, sebitde deňi-taýy bolmadyk Arkadag şäheriniň gazanýan üstünlikleriniň ýene-de bir aýdyň güwäsidir. Halkymyzyň şöhratly taryhynyň gözbaş alýan gadymy topragynda bina edilen bu şäher durmuş ulgamyna öňdebaryjy sanly, maglumat-kommunikasiýa we «ýaşyl» tehnologiýalar ornaşdyrylan «akylly» şäher taslamasynyň ajaýyp nusgasydyr. Bu ýerde milli binagärligiň iň gowy däpleri şäher gurluşygynyň, dizaýnyň häzirki zaman meýilleri bilen sazlaşykly utgaşýar. Ähli babatda, şol sanda tebigata aýawly çemeleşmekde halkara ölçeglere laýyk gelýän degişli düzümler ýaşaýjylar üçin amatly şertleri üpjün edýär. Arkadag şäheriniň halkara derejeli köp sanly sylaglara mynasyp bolmagy hem munuň şeýledigine şaýatlyk edýär.

Günüň ikinji ýarymynda maslahat «Ýaşyl» energetika geçmegiň ähmiýeti we himiýa senagatynyň ösüşiniň täze ugurlary» atly mowzuklaýyn mejlis bilen dowam etdi. Bu ugur Durnukly ösüş maksatlary bilen baglanyşykly ählumumy gün tertibiniň iň möhüm meseleleriniň biri bolup durýar. Türkmen tarapynyň wekilleriniň çykyşlarynda “ýaşyl” ykdysadyýete we pes uglerodly ösüşe geçmegiň Türkmenistanyň strategik ugurlarynyň biri bolup durýandygy bellenildi. Munuň özi daşky gurşawa ýetirilýän täsiri peseltmäge gönükdirilen giň möçberli milli taslamalarda beýanyny tapýar. Ykdysadyýeti diwersifikasiýalaşdyrmagyň esasy ugurlarynyň biri hökmünde himiýa senagatyny innowasion taýdan ösdürmek meselesine aýratyn üns çekildi. Uglewodorod çig malyny çuňňur gaýtadan işlemek arkaly ýokary goşulan bahaly önümleriň dürli görnüşlerini öndürmäge ukyply döwrebap, ýokary netijeli, ekologik taýdan arassa önümçilikleri döretmegiň möhümdigi nygtaldy.

Çykyşlarda “ýaşyl” energetikanyň dünýä ykdysadyýetine ýetirýän peýdaly täsirleri barada durlup geçildi. Bu pudak täze iş orunlaryny döretmäge, gazylyp alynýan uglewodorod serişdelerine garaşlylygy azaltmaga, innowasiýalary ösdürmäge, olary ornaşdyrmaga uly goşant goşýar. Şunuň bilen baglylykda, gaýtadan dikeldilýän energiýanyň mümkinçiliklerini ulanmak, metan zyňyndylaryny azaltmak, ilatyň ekologiýa baradaky düşünjesini artdyrmak ýaly başlangyçlaryň Türkmenistanyň döwlet syýasatynyň ileri tutulýan ugurlarynyň biri bolup durýandygy aýdyldy. Mejlisiň dowamynda ýokary netijeli we howpsuz oba hojalyk dökünlerini öndürmek arkaly azyk howpsuzlygyny üpjün etmekde himiýa senagatynyň wajyp orny ara alnyp maslahatlaşyldy.

Mejlis halkara bilermenler, öňdebaryjy korporasiýalaryň wekilleri bilen pikir alyşmak üçin netijeli meýdança boldy. «Sumitomo Corporation Central Eurasia LLC», «Kawasaki Heavy Industries, Ltd.» kompaniýalarynyň wekilleri Türkmenistanyň energetika hem-de himiýa senagaty pudaklaryna daşky gurşawa zyňyndylary azaltmaga gönükdirilen täze tehnologiýalary ornaşdyrmagyň mümkinçilikleri barada öz garaýyşlaryny beýan etdiler. «S&P Global Platts», «Fertecon» ýaly öňdebaryjy agentlikleriň bilermenleri minerallaryň, dökünleriň we ammiagyň dünýä bazarynyň häzirki ýagdaýy barada seljerme maglumatlaryny berdiler. Olaryň çykyşlary Türkmenistanyň bu bazarlardaky strategik ornuny, himiýa senagatyndaky ýokary mümkinçiliklerini tassyklady.

«Türkmenistanyň gurluşyk, senagat, himiýa, energetika pudaklarynyň ösüşi» atly maslahatyň ilkinji güni B2G formatyndaky ikitaraplaýyn duşuşyklar bilen tamamlandy. Iri halkara kompaniýalaryň we ýurdumyzyň döwlet düzümleriniň ýolbaşçylarynyň arasynda geçirilen bu gepleşikler geljekki ylalaşyklar üçin berk binýady goýdy. Duşuşyga gatnaşyjylar bilelikdäki taslamalary durmuşa geçirmegiň anyk şertlerini we maýa goýum mümkinçiliklerini ara alyp maslahatlaşdylar.

Forumyň çäklerinde Türkmenistanyň Senagat we gurluşyk önümçiligi ministrligi bilen «Horn Glass Industries AG» kompaniýasynyň (Germaniýa Federatiw Respublikasy) arasynda senagat we gurluşyk önümçiligi pudagynda hyzmatdaşlyk etmek barada özara düşünişmek hakynda Ähtnama, Türkmenistanyň Senagat we gurluşyk önümçiligi ministrligi bilen «KHD Humboldt Wedag International AG» (Germaniýa Federatiw Respublikasy) kompaniýasynyň arasynda senagat we gurluşyk önümçiligi pudagynda hyzmatdaşlyk etmek barada özara düşünişmek hakynda Ähtnama, Türkmenistanyň Senagat we gurluşyk önümçiligi ministrligi bilen «Zippe Industrieanlagen GmbH» (Germaniýa Federatiw Respublikasy) kompaniýasynyň arasynda senagat we gurluşyk önümçiligi pudagynda hyzmatdaşlyk etmek barada özara düşünişmek hakynda Ähtnama, «Türkmenhimiýa» döwlet konserni bilen «WUHUAN Engineering Co., Ltd.» kompaniýasynyň (Hytaý Halk Respublikasy) arasynda Türkmenistanyň himiýa pudagyny ösdürmek taslamalary boýunça hyzmatdaşlyk barada özara düşünişmek hakynda Ähtnama, «Türkmenhimiýa» döwlet konserni bilen «China CAMC Engineering Co., Ltd.» kompaniýasynyň (Hytaý Halk Respublikasy) arasynda Türkmenistanyň himiýa pudagyny ösdürmek ugrunda hyzmatdaşlyga gyzyklanmalary barada özara düşünişmek hakynda Ähtnama, «Türkmenhimiýa» döwlet konserni bilen «Kawasaki Heavy Industries, Ltd.» kompaniýasynyň (Ýaponiýa) arasynda bug-gazan utilizator enjamyny getirmek we çalşyrmak işlerini ýerine ýetirmek boýunça özara düşünişmek hakynda Ähtnama, Türkmenistanyň Energetika ministrligi bilen «Invatix Solutions FZ-LLC» kompaniýasynyň (Birleşen Arap Emirlikleri) arasynda özara düşünişmek hakynda Ähtnama, Türkmenistanyň Energetika ministrligi bilen «Sumitomo Corporation» kompaniýasynyň (Ýaponiýa) arasynda howa elektrik geçirijilerinde buzuň emele gelmeginiň öňüni almak üçin enjamlary üpjün etmek taslamasy boýunça Çarçuwaly ylalaşyga gol çekildi.

4-nji noýabrda maslahat öz işini gurluşyk, senagat, himiýa, energetika pudaklaryny ösdürmegiň ugurlaryna we bu babatda hyzmatdaşlygyň meselelerine bagyşlanan mowzuklaýyn mejlisler bilen dowam eder.