Türkmenistanyň Prezidenti Serdar Berdimuhamedow Samarkantda geçirilýän «Merkezi Aziýa — Ýewropa Bileleşigi» görnüşindäki birinji sammitiniň mejlisinde eden çykyşynda sebitde üpjünçilik taslamalar toplumyna Ýewropa Bileleşiginiň maýa goýum taýdan täsirli gatnaşmagynyň geoykdysady we täjirçilik taýdan düýpli girdeji getirjekdigine hem-de Merkezi Aziýada ýewropa işewürliginiň uzak möhletli ornuny berkitmäge we giňeltmäge ýardam berjekdigine ynam bildirdi.

Ýewropa bilen söwdany has-da giňeltmek maksady bilen döwlet Baştutanymyz biziň ýurdumyzyň maýadarlara doly amatly şertleri döretmäge taýýardygyny we ýewropa kompaniýalaryny türkmen bazarynda işlemäge çagyrýandygyny nygtady. Munuň bilen baglylykda, harytlary iberijileri we alyjylary goldamagyň maksatnamasyny taýýarlamak mümkinçiligine seretmek Ýewropa Bileleşigine teklip edildi.

«Häzirki wagtda ykdysady taýdan hyzmatdaşlyk etmek üçin onuň netijelilige we hakyky mümkinçilige laýyk gelmegi zerur diýip hasaplaýarys. Biziň sebitimiz ýewropaly kompaniýalara senagatda, ulag we kommunikasiýa ulgamlarynda häzirki zaman iri önümçilikleri döretmek, ylmy-tehnologik klasterleriň, hyzmatlar merkezleriniň taslamalaryna maýa goýumlaryny goýmak üçin amatly ýer bolup biler» diýip, hormatly Prezidentimiz Serdar Berdimuhamedow aýtdy.