“Galkynyş” gaz käniniň 265 belgili ulanyş guýusynda birnäçe çuňluklardan tebigy täze gazyň akymy alnyp başlandy. 

Bir gije-gündiziň dowamynda 2 million kub metr çykymy bolan guýunyň önümçilik mukdarynyň yzygiderli ýokarlanjakdygy gürrüňsizdir. Munuň özi ýurdumyzyň çäklerinde bar bolan “mawy ýangyja” baý känleriň işiniň häzirki döwrüň talabyna laýyk derejede alnyp barylýandygynyň nobatdaky beýanydyr. 

Häzirki döwürde Gahryman Arkadagymyzyň ýurdumyzyň ýangyç-energetika toplumyny mundan beýläk-de özgertmek boýunça başyny başlan giň möçberli işleriniň Arkadagly Gahryman Serdarymyzyň ýolbaşçylygynda üstünlikli durmuşa geçirilmegi netijesinde ýangyç-energetika toplumynyň düzümleri sazlaşykly ösdürilýär. Bu bolsa milli ykdysadyýetimiziň binýatlyk pudagynyň ösüşiň täze derejesine çykandygyny görkezýär. 

Milli ykdysadyýetimiziň ähli ugurlarynda, şol sanda nebitgaz pudagynda amala aşyrylýan işler, gazanylýan üstünlikler ýurdumyzyň ykdysady taýdan kuwwatlanmagynda aýratyn ähmiýetlidir. Nebitgaz senagatynyň ägirt uly mümkinçilikleriniň işjeň peýdalanylmagy, pudaga häzirki zamanyň ösen tejribesiniň we täzeçil tehnologiýalaryň ornaşdyrylmagy bu ugurda alnyp barylýan işleriň netijeli häsiýete eýe bolmagyny şertlendirýär. 

Türkmenistanyň tebigy gazyň gorlary boýunça dünýäde öňdäki orunlaryň birini eýeländigi halkara derejesinde ykrar edildi. Munuň özi hormatly Prezidentimiziň ýolbaşçylygynda netijeli durmuşa geçirilýän energetika syýasatynyň ýurdumyzyň ýangyç-energetika toplumynyň köpugurly esasda ösdürilmeginde, mähriban Watanymyzyň dünýäniň energetika bazarynda eýeleýän ornunyň pugtalanmagynda aýratyn ähmiýetlidir. 

Bu ugurda amala aşyrylýan täze düzümleýin taslamalar toplumyň ähli düzümleriniň sazlaşykly ösdürilmegine gönükdirilendir. Şunuň bilen baglylykda, tebigy gazyň gorlary boýunça dünýäde öňdäki orunlaryň birini eýeleýän ýurdumyzyň känlerinden alynýan “mawy ýangyjyň” möçberlerini artdyrmak, ony köpugurly esasda dünýä bazarlaryna çykarmak babatda ähmiýetli taslamalaryň durmuşa geçirilýändigini bellemek ýakymly.

Dünýä ýüzünde gorlary boýunça “supergigant” dereje berilýän hem-de tehniki görkezijileri babatda “unikal” hasaplanýan “Galkynyş” gaz käni, bu gün mawy ýangyjyň iň ygtybarly çeşmesi bolup hyzmat edýär. Bu ýerde 265 belgili gaz guýusynda buraw işleriniň 4 müň 485 metr çuňlukda üstünlikli ýerine ýetirilmegi hem-de ýer astynda 4417-4281 metr we 4266-4226 metr aralyklardaky gatlaklarda senagat ähmiýetli täze gaz akymy alyndy.

Bu işleriň milli hünärmenleriň tagallasy bilen amal bolandygyny, şunda ýaş nebitgazçylaryň hem goşandynyň bolandygyny bellemek ýakymly. Gaz guýularyny burawlamakda, olaryň gurluşygy bilen doly tamamlap, ulanyşa girizmekde häzirki zamanyň sanly tehnologiýalary işjeň peýdalanyldy. Munuň özi ýangyç-energetika toplumynyň ähli düzümleriniň öňünde goýlan wezipeleriň üstünlikli ýerine ýetirilýändiginiň nobatdaky subutnamasydyr.

Ýurdumyzyň nebitgaz senagatyny hem-de tebigy gazyň dünýä bazaryna iberilýän ugurlaryny diwersifikasiýa ýoly bilen ösdürmek boýunça uly işler amala aşyrylýar. Döwlet energetika strategiýasyna laýyklykda, ýurdumyzyň uglewodorod kuwwaty we onuň mümkinçilikleri milli ykdysadyýetimiziň kuwwatlanmagyna, halkymyzyň ýaşaýyş-durmuş derejesiniň ýokarlanmagyna we sebitiň ýurtlarynyň halklarynyň bähbidine gönükdirilýär. 

Şeýle hem ýurdumyzda tebigy gaza hem-de nebite baý täze ýataklary özleşdirmek, uglewodorod serişdeleriniň çykarylyşyny artdyrmak, nebit guýularyny düýpli abatlamak boýunça möhüm işleriň durmuşa geçirilýändigini bellemek gerek.