1543
Şu gün paýtagtymyzda Medeniýet hepdeliginiň dabaraly açylyşy boldy. Halk ruhubelentliginiň baýramynyň çäklerinde dürli medeni çäreler geçirilýär.
Ilkinji günüň ajaýyp wakalaryndan biri, «Türkmengaz» döwlet konserniniň medeni-işewürlik merkezinde geçirilen Aşgabadyň we Ahal welaýatynyň sungat ussatlarynyň baýramçylyk konserti boldy.
Döredijilik toparlary halkymyzyň däp-dessurlaryna esaslanyp iň gowy çykyşlary ýerine ýetirdiler.
Türkmen halk döredijiligi ata-babalaryň mirasyny, gymmatlyklaryny we paýhasyny özleşdirip, milli hazynanyň bir görnüşine öwrüldi. Gadymy döwürlerden bäri dutarda saz çalýan sazandalar we aýdym aýdýan bagşylar türkmen topragynda aýratyn hormata eýe bolupdyr. Ertekiler, rowaýatlar we dürli däp-dessurlar hem aýdym görnüşinde ýerine ýetirilýär.
Konsertde bagşy sazandalar, tans toparlary, meşhur aýdymçylar we ýurdumyzyň sungat işgärleri öz ussatlyklaryny görkezdiler.
Şeýle-de şu gün Medeniýet hepdeliginiň çäklerinde baýramçylyk konsertleri ýurdumyzyň ähli welaýatlarynda geçirildi. Ahal, Balkan, Daşoguz, Lebap we Mary welaýatlaryndaky «Türkmeniň ak öýi» binalarynda ata Watanymyzy wasp edýän milli tanslar görkezilip, ajaýyp aýdymlar ýaňlandy.
