769
Şu gün “Awaza-2023” atly halkara tans we folklor festiwalynyň çäklerinde “Folklor döredijiliginiň we halk tansynyň dessurlary” atly halkara ylmy-amaly maslahat geçirildi. “Daýanç” sagaldyş we dynç alyş merkeziniň mejlisler zalynda bolan halkara maslahatyna festiwalyň myhmanlary we türkmen tarapynyň wekilleri gatnaşdylar.
Halkara ylmy-amaly maslahatyna gatnaşyjylar ilki bilen merkeziň eýwanynda ýaýbaňlandyrylan sergini synladylar. Onda ýurdumyzyň amaly-haşam sungatynyň gymmatlyklary, türkmen tebigatynyň ajaýyplygyny beýan edýän surat eserleri we dürli kitaplar görkezildi. Maslahatyň öňüsyrasynda guralan sergä gatnaşyjylar gymmatlyklar bilen tanşyp, festiwalyň çäklerinde guralýan her bir çäräniň ýokary guramaçylyk derejesinde geçirilýändigini nygtadylar. Bu bolsa döredijilik toparlarynyň festiwalyň ähli ugurlaryna işjeň gatnaşmagyny şertlendirýär.
Maslahatyň dowamynda hormatly Prezidentimiziň başlangyjy boýunça geçirilýän halkara çäresiniň milli medeniýeti ösdürmekde ähmiýetlidigi bellenildi. Şeýle hem maslahata gatnayşyjylar türkmen topragynda mähirli kabul edilendikleri we halkara festiwalynyň ýokary guramaçylyk derejesinde geçirilýändigi üçin Gahryman Arkadagymyza hem-de Arkadagly Serdarymyza tüýs ýürekden hoşallyk sözlerini aýtdylar.
Soňra “Awaza-2023” atly halkara tans we folklor festiwaly bu çärä gatnaşýan daşary ýurtly tans hem-de folklor toparlarynyň konserti bilen dowam etdi. Hazar deňziniň kenaryndaky interaktiw suw çüwdürimli seýilgähinde ýaýbaňlandyrylan joşgunly çykyşlarda dost-doganlygyň, halkara hyzmatdaşlygynda möhüm orun eýeleýän medeni-ynsanperwer gatnaşyklaryň waspy ýetirildi.
