Türkmenistan we Özbegistan ählumumy gün tertibiniň durnukly ösüş hem-de onuň düzüm bölekleri bolan energetika howpsuzlygy, halkara ulag-üstaşyr gatnawlaryny ösdürmek, ekologiýa we daşky gurşawy goramak ýaly möhüm ugurlary boýunça tagallalaryny birleşdirmegini dowam eder. Şeýle beýannama bilen Türkmenistanyň Prezidenti Gurbanguly Berdimuhamedow we Özbegistanyň Prezidenti Şawkat Mirziýoýew Aşgabatda geçirilen gepleşiklerden soň, köpçülikleýin habar beriş serişdeleriniň wekilleriniň öňünde çykyş etdiler. Durnukly energetika babatda gürrüň Türkmenistanyň we Özbegistanyň sebitdäki iri möçberli energetika taslamalaryny durmuşa geçirmäge gatnaşmagy barada barýar. Şol taslamalaryň hataryna, ilkinji nobatda, Türkmenistan-Özbegistan-Gazagystan-Hytaý gaz geçirijisiniň taslamasy degişlidir. Mundan başga-da, biz Türkmenistan-Özbegistan-Täjigistan-Owganystan-Pakistan ugry boýunça Merkezi Aziýadan Günorta Aziýa elektroenergiýany ibermek boýunça taslamanyň çäklerinde hyzmatdaşlygymyzy işjeňleşdirmäge taýýardyrys diýip, türkmen Lideri habar berdi. Döwlet Baştutanlary häzirki duşuşygyň türkmen-özbek özara gatnaşyklaryna ýokary hilli itergi berjekdigini nygtadylar. Döwletara gatnaşyklarynyň ýagdaýy ara alnyp maslahatlaşyldy, halkara meseleleriniň birnäçesi boýunça pikir alyşmalar geçirildi. Syýasy, söwda-ykdysady we medeni-ynsanperwer ulgamlarda türkmen-özbek hyzmatdaşlygyny kesgitleýän ikitaraplaýyn resminamalaryň toplumyna gol çekildi.