Yslamabatda Ykdysady Hyzmatdaşlyk Guramasyna (YHG) agza ýurtlaryň döwlet Baştutanlarynyň ýokary derejeli XIII Sammiti açyldy. Oňa Türkmenistanyň Prezidenti Gurbanguly Berdimuhamedow gatnaşýar. Döwlet we hökümet Baştutanlarynyň, YHG agza ýurtlaryň ýokary wezipeli wekilleriniň we halkara düzümleriniň gatnaşmagynda geçirilýän bu duşuşyk, geçilen ýola baha bermek we seljermek geljek üçin möhüm ugurlary kesgitlemek nukdaýnazaryndan Guramanyň işiniň möhüm bölegi bolar. Forum “Serena” myhmanhanasynda geçýär. Mejlisiň başlanmagynyň öňüsyrasynda oňa gatnaşýanlaryň bilelikde surata düşmeginiň resmi dabarasy boldy. Sammitde hormatly Prezidentimiz Gurbanguly Berdimuhamedow hem çykyş eder. Türkmenistanyň YHG bilen özara hereket etmeginiň ileri tutulýan ugurlarynyň hatarynda – sebitde howpsuzlygy üpjün etmegiň, şol sanda energetika, ekologiýa, ulag ulgamynda hyzmatdaşlygyň meseleleri bar. Bu ugurlar hemmesi boýunça Türkmenistan möhüm başlangyçlar bilen çykyş edýär. Döwlet Baştutanymyz tarapyndan kesgitlenen sebit we yklym derejesinde halkara ulag geçelgelerini döretmek boýunça başlangyçlar häzirki wagtda aýratyn möhüm häsiýete eýe bolýar. Ählumumy energetika howpsuzlygyny üpjün etmek üçin amatly halkara ýagdaýlaryny döretmek Türkmenistanyň daşary syýasatynyň örän wajyp bölegi bolup durýar. 2008-nji we 2013-nji ýyllarda Birleşen Milletler Guramasynyň Baş Assambleýasy Türkmenistan tarapyndan teklip edilen dünýä bazarlaryna energogöterijileri ygtybarly we durnukly ibermek boýunça Rezolýusiýanyň taslamalaryny biragyzdan kabul etdi. Diwersifikasiýalaşdyrmak strategiýasyny yzygiderli amala aşyrmak bilen Türkmenistan soňky ýyllarda öz hyzmatdaşlary bilen bilelikde gündogar we günorta ugurlary boýunça birnäçe iri turbageçiriji taslamalary amala aşyrdy. Ýene bir iri energetika taslamasy – Türkmenistan-Owganystan-Pakistan –Hindistan (TOPH) durmuşa geçirilip başlandy. YHG Sammitiniň netijeleri boýunça metbugat konferensiýasy geçiriler.