Türkmenistanyň Magtymguly adyndaky Ýaşlar guramasynyň Merkezi geňeşiniň ýanyndaky «Arkadagly Ýaşlar» žurnaly 2026-njy ýyldaky 3-nji sany çap edildi.

Neşiriň baş makalasy «Beýik dostlugyň täze gözýetimleri» diýlip atlandyrylýar. Ol Gahryman Arkadagymyzyň Hytaý Halk Respublikasyna dostluk saparynyň ýaşlaryň ykbalyny galkyndyryjy aýratynlyklaryna bagyşlanýar. Gurbanguly Berdimuhamedow adyndaky Howandarlyga mätäç çagalara hemaýat bermek boýunça haýyr-sahawat gaznasynyň bäş ýylyň dowamynda bitiren haýyrly işleri hakyndaky makala hem okyjylarda gyzyklanma döreder.

Ýaşlar neşiriniň täze sanynda iňlis dilinde paýlaşylan ilkinji makala mart aýynda bellenilen Halkara zenanlar gününe bagyşlanypdyr. «Ýaşyl dünýäniň ýaraşygy» atly çykyş bolsa ýazky bag ekiş möwsüminiň başlanmagyna bagyşlanýar.

Baharyň ilkinji aýynda ýurdumyzda asylly däbe öwrülen «Talyp gözeli» bäsleşigi hem geçirildi. Bu bäsleşigiň geçirilişi we ýeňijileri barada neşir ýörite makalada gürrüň berýär.

Döwlet edaralarynda emeli aň tehnologiýasynyň ornuna bagyşlanan çykyş döwrebap wezipeden söz açýandygy bilen gyzyklydyr. Täsirli makalalaryň ýene birinde halkara giňişlikde meýletinçi-terjimeçilik işiniň ähmiýetine üns çekilýär.

Neşiriň şu sanyndaky täsirli makalalaryň ýene birinde Magtymguly Pyragynyň döredijiligindäki tebigata bolan söýgi käbir hytaý şahyrlary bilen deňeşdirilýär. Türkmenistanyň halk artisti Atageldi Garýagdyýewiň döredijilik ýoly baradaky makala «Millilige gulluk etmeli» diýip atlandyrylypdyr. Şahyr Çary Ýegenmyradowyň döredijilik dünýäsinden söhbet açýan «Pursatlar» atly makala hem okyjyny özüne çekse gerek.

Žurnalda ýerleşdirilen «Hyýallaryň ganatynda» atly makala Gurbannazar Ezizowa bagyşlanypdyr. Bagtlylyk hakyndaky çykyşy iňlis dilinde okap bilersiňiz. Rus dilindäki makalada bolsa şygryýetiň jadylaýjy güýji barada gürrüň edilýär.

Däp bolşy ýaly, žurnal aprel aýynyň täleýnamasyny hem paýlaşýar. Neşiriň ahyrky sahypalarynda ahalteke bedewleri, emeli aň baradaky çykyşlar hem täsirli bolupdyr. Öý bikeleri şu gezek semeniniň taýýarlanylyşy baradaky maglumatlary hem okap bilerler. Şeýle-de «Ýaş waspçy» bäsleşiginiň täze ýeňijisi barada maglumat berilýär.