Halkara howa menziliniň meýdançasyna Täjigistan Respublikasynyň Prezidentiniň uçary gelip gondy. Milli Liderimiz Prezident Emomali Rahmony mähirli garşylady. Dostlukly ýurduň Baştutanyna gül desseleri gowşurylyp, duz-çörek hödür edildi.

Belent mertebeli täjik myhmany mähirli garşylanylandan soňra, howa menzilinde türkmen halkynyň Milli Lideri bilen Prezident Emomali Rahmonyň gysgaça ikiçäk duşuşygy geçirildi.

Milli Liderimiz Türkmenistanyň hemişelik Bitaraplygynyň 30 ýyllygy mynasybetli iri halkara foruma gatnaşmaga çakylygy kabul edip, Aşgabada gelendigi üçin Emomali Rahmona minnetdarlyk bildirdi.

Belent mertebeli myhman çakylyk üçin hoşallyk bildirip, Aşgabatda geçiriljek forumyň möhüm ähmiýetini nygtady hem-de onuň Garaşsyz Türkmenistanyň daşary syýasatyny giňden beýan etmek bilen, bütin dünýäde parahatçylygy, durnukly ösüşi üpjün etmek, ynanyşmak esasynda gatnaşyklary ösdürmek ugrunda alnyp barylýan işleri has-da dabaralandyrjakdygyny aýtdy. Bellenilişi ýaly, şu günler dünýä jemgyýetçiligi Türkmenistan bilen bilelikde şöhratly senäni — Halkara Bitaraplyk gününi we Garaşsyz Türkmenistanyň hemişelik Bitaraplygynyň 30 ýyllygyny belleýär. Aşgabat bolsa ajaýyp gözelligi bilen şanly waka bagyşlanan iri foruma we beýleki dabaralara gatnaşmak üçin türkmen paýtagtyna gelýän myhmanlary garşylaýar. Şol myhmanlaryň hatarynda bolmagyň özi üçin uly mertebedigini nygtap, täjik Lideri Aşgabatda geçiriljek forumyň işine üstünlik arzuw etdi.

Söhbetdeşligiň dowamynda türkmen-täjik gatnaşyklarynyň ösüşine degişli meselelere garalyp, ikitaraplaýyn hyzmatdaşlygyň özara gyzyklanma bildirilýän ugurlar boýunça geljekde-de üstünlikli ilerlediljekdigine pugta ynam bildirildi.