Çuňňur hormatlanylýan Türkmenistanyň Prezidenti!

Sizi ata Watanymyzyň hemişelik Bitaraplygynyň 30 ýyllyk baýramyna barýan günlerimizde Birleşen Milletler Guramasynyň Nýu-Ýorkdaky ştab-kwartirasyndan gelip gowşan hoş habar — Birleşen Milletler Guramasynyň Baş Assambleýasynyň 79-njy sessiýasynyň 63-nji plenar mejlisinde «BMG-niň deňze çykalgasy bolmadyk ösüp barýan döwletler boýunça üçünji maslahatyny geçirmegiň tertibine goşmaça maglumat» atly Kararnamanyň biragyzdan kabul edilmegi mynasybetli Türkmenistanyň Halk Maslahatynyň adyndan tüýs ýürekden gutlaýaryn. Siziň janyňyzyň sag, ömrüňiziň uzak bolmagyny, hoşniýetlilik, parahatçylyk söýüjilik ýörelgelerine esaslanýan daşary syýasatyňyzyň mundan beýläk hem üstünliklere beslenmegini arzuw edýärin.

Hormatly Prezidentimiz!

Berkarar döwletiň täze eýýamynyň Galkynyşy döwründe ýurdumyzyň parahatçylyk söýüjilik, hoşniýetli goňşuçylyk, dost-doganlyk ýörelgelerine esaslanýan halkara başlangyçlary dünýä jemgyýetçiligi tarapyndan giň goldawa eýe bolýar. Türkmenistanyň başlangyjy boýunça BMG-niň Baş Assambleýasy tarapyndan 2025-nji ýylyň «Halkara parahatçylyk we ynanyşmak ýyly» diýlip yglan edilmegi, hemişelik Bitaraplygymyzyň 30 ýyllygy mynasybetli çäreleriň milli derejeden has giň gerime eýe bolmagy — Milletler Bileleşiginiň çäklerinde uly dabaralara beslenmegi hem muňa aýdyň şaýatlyk edýär. Siziň parasatly baştutanlygyňyzda döwletimiziň daşary syýasatynyň üstünliklere beslenmegi, halkara guramalar we dostlukly ýurtlar bilen alnyp barylýan özara gatnaşyklar ýurdumyzyň dünýä jemgyýetçiligindäki ornuny has-da berkidýär. Dürli döwletler bilen gazanylan ylalaşyklar, amala aşyrylýan bilelikdäki taslamalar Türkmenistanyň daşary syýasy ugrunyň, halkara parahatçylygy, howpsuzlygy hem-de durnukly ösüşi üpjün etmäge ýardam bermäge gönükdirilen başlangyçlarynyň netijeli häsiýete eýedigine şaýatlyk edýär.

Belent mertebeli Prezidentimiz!

Türkmenistanda parahatçylygyň, hoşniýetliligiň, dostlukly gatnaşyklaryň dabaralanýan ýylynda kabul edilen täze Kararnama bilen Baş Assambleýa tarapyndan Birleşen Milletler Guramasynyň deňze çykalgasy bolmadyk ösüp barýan döwletler boýunça üçünji maslahatyny 2025-nji ýylyň 5 — 8-nji awgusty aralygynda «Awaza» milli syýahatçylyk zolagynda geçirmegiň kesgitlenilmegi hem ýurdumyz tarapyndan öňe sürülýän başlangyçlaryň halkara derejede goldanylýandygynyň aýdyň güwäsidir.

Täze taryhy döwürde geçirilýän halkara we sebit ähmiýetli duşuşyklardyr maslahatlar Türkmenistanyň dünýä döwletleri, halkara guramalar bilen gatnaşyklaryny mazmun taýdan has-da baýlaşdyrýar. 2022-nji ýylda Awazada halkara hem-de sebitara guramalaryň gatnaşmagynda deňze çykalgasy bolmadyk ösüp barýan döwletleriň ulag ministrleriniň halkara maslahatynyň geçirilmegi, onuň dowamynda durnukly üstaşyr ulag geçelgelerini döretmek ýaly möhüm meseleleriň ara alnyp maslahatlaşylmagy ýurdumyzyň halkara gatnaşyklarda parahatçylyk we ynanyşmak ýörelgelerini berkarar etmek boýunça başlangyçlaryna ýokary baha berilýändigini görkezýär.

Hormatly Arkadagly Gahryman Serdarymyz!

Sizi Birleşen Milletler Guramasynyň Baş Assambleýasynyň 79-njy sessiýasynyň 63-nji plenar mejlisiniň dowamynda «BMG-niň deňze çykalgasy bolmadyk ösüp barýan döwletler boýunça üçünji maslahatyny geçirmegiň tertibine goşmaça maglumat» atly Kararnamanyň biragyzdan kabul edilmegi mynasybetli Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli başlangyçlaryňyz mundan beýläk-de rowaç bolsun!

Sizi hormatlamak bilen,

Türkmen halkynyň Milli Lideri,
Türkmenistanyň Halk Maslahatynyň Başlygy,
Gahryman Arkadag Gurbanguly BERDIMUHAMEDOW.