Çuňňur hormatlanylýan Türkmenistanyň Prezidenti!

Sizi Berkarar döwletiň täze eýýamynyň Galkynyşy döwründe uly zähmet üstünlikleri bilen garşy alynýan Hasyl toýy mynasybetli Türkmenistanyň Halk Maslahatynyň adyndan tüýs ýürekden gutlaýaryn. Siziň janyňyzyň sag, ömrüňiziň uzak bolmagyny, halkymyzyň bagtyýar, bolelin durmuşda ýaşamagy ugrunda alyp barýan tutumly işleriňizde uly üstünlikleri arzuw edýärin.

Hormatly Prezidentimiz!

Siziň baştutanlygyňyzda «Pähim-paýhas ummany Magtymguly Pyragy» ýylynda eziz Diýarymyzda keramatly türkmen topragynyň eçilen rysgal-berekedini, oba hojalyk işgärleriniň zähmetsöýerligini alamatlandyrýan Hasyl toýy giňden bellenilýär. Bu şanly sene mynasybetli paýtagtymyz Aşgabatda we Arkadag şäherinde, ýurdumyzyň ähli welaýatlarynda bol hasyl ýetişdiren zähmet ussatlaryny sylaglamak dabaralary, dürli medeni-köpçülikleýin çäreler, maslahatlar we sergiler geçirilip, naz-nygmatly türkmen saçagy giňden ýazylýar.

Hormatly Arkadagly Gahryman Serdarymyz!

Ösüşleriň ýolundan bedew bady bilen ynamly öňe barýan eziz Watanymyzda milli ykdysadyýetimiziň ähli ulgamlaryny, şol sanda oba hojalyk pudagyny täze derejä çykarmaga aýratyn ähmiýet berilýär. Bu pudagyň girdejili ugurlaryň birine öwrülmegi üçin uly işler durmuşa geçirilip, iň täze tehnologiýalar, ylmyň we tehnikanyň soňky gazananlary, ösen döwletleriň öňdebaryjy tejribeleri giňden ornaşdyrylýar, kanunçylyk-hukuk binýady döwrüň talaplaryna laýyklykda kämilleşdirilýär. Oba zähmetkeşleriniň girdejileriniň artmagy üçin mümkinçilikleriň döredilmegi oba ilatynyň ýaşaýyş-durmuş derejesiniň ýokarlanmagyna oňyn täsirini ýetirýär. Siziň degişli Kararlaryňyza laýyklykda, oba hojalyk pudagyny ulgamlaýyn dolandyrmak we onuň işini kämilleşdirmek, ylmy esasda ösdürmek maksady bilen, däneçilik, ekerançylyk hem-de pagtaçylyk ylmy-barlag institutlary döredildi. Pagtanyň, bugdaýyň, şalynyň döwlet satyn alyş nyrhlarynyň ýokarlandyrylmagy daýhanlary täze zähmet üstünliklerine ruhlandyrdy. Bularyň ählisi ýurdumyzyň obasenagat toplumynda amala aşyrylýan özgertmeleri üstünlikli durmuşa geçirmäge, ony hil taýdan täze derejelere çykarmaga, oba hojalyk ekinleriniň hasyllylygyny artdyrmaga ýardam edýär.

Belent mertebeli Prezidentimiz!

Daýhan yhlasyndan kemala gelýän bol hasyl türkmen topragynyň berekedi, saçagymyzyň rysgalydyr. «Çekseň zähmet, ýagar rehnet» diýlişi ýaly, daýhanlaryň alyn deri ýere siňip, zere öwrülýär. Siziň «Änew — müňýyllyklardan gözbaş alýan medeniýet» atly kitabyňyzda bäş müň ýyl mundan ozal ösdürilip ýetişdirilen ak bugdaýyň däneleri hakynda gymmatly maglumatlar berilýär. Şöhratly ata-babalarymyzyň bu bereketli toprakda kemala getiren ekerançylyk däpleri häzirki döwürde täze mazmun bilen baýlaşdyrylýar. Türkmenistan diňe bir azyklyk däl, eýsem, tohumlyk bugdaýy ösdürip ýetişdirmekde hem uly üstünlikleri gazanýar.

Sarpasy belent Prezidentimiz!

Siziň başda durmagyňyzda ýurdumyzda azyk bolçulygyny döretmek maksady bilen, iň gowy dünýä tejribesiniň öwrenilmegine we ornaşdyrylmagyna, halkara hyzmatdaşlygyň giňeldilmegine, Birleşen Milletler Guramasy hem-de onuň ýöriteleşdirilen edaralary bilen netijeli gatnaşyklaryň ösdürilmegine aýratyn üns berilýär. Hususan-da, BMG-niň Azyk we oba hojalyk guramasy bilen hyzmatdaşlyk işjeň häsiýete eýe bolýar. Ýakynda paýtagtymyzda GDA-nyň Tohumçylyk meseleleri boýunça hökümetara geňeşiniň mejlisiniň, «Oba hojalyk ekinleriniň tohumçylygynda ýetilen sepgitler we öňde durýan wezipeler» atly halkara ylmy maslahatyň ýokary derejede geçirilmegi hem ýurdumyzda oba hojalyk pudagyny ösdürmäge örän çynlakaý çemeleşilýändigine şaýatlyk edýär.

Hormatly Arkadagly Gahryman Serdarymyz!

Sizi Hasyl toýy mynasybetli Türkmenistanyň Halk Maslahatynyň adyndan ýene-de bir gezek tüýs ýürekden gutlaýaryn. Siziň janyňyz sag, ömrüňiz uzak, il-ýurt bähbitli, umumadamzat ähmiýetli başlangyçlaryňyz mundan beýläk-de rowaç bolsun!

Sizi hormatlamak bilen,

Türkmen halkynyň Milli Lideri, Türkmenistanyň

Halk Maslahatynyň Başlygy,

Gahryman Arkadag

Gurbanguly BERDIMUHAMEDOW.