Onuň Alyhezreti,
türkmen halkynyň Milli Lideri,
Türkmenistanyň Halk Maslahatynyň Başlygy
jenap Gurbanguly BERDIMUHAMEDOWA

Hormatly Gurbanguly Mälikgulyýewiç!

2024-nji ýylyň 10-11-nji oktýabrynda doganlyk Türkmenistana resmi saparymyň dowamynda maňa we Gazagystanyň wekiliýetine bildirilen myhmansöýerlik üçin Size uly hormat bilen hoşallygymy beýan etmek isleýärin.

Köpasyrlyk dostluk, hoşniýetli goňşuçylyk, özara goldaw bermek ruhundaky strategik hyzmatdaşlygymyzy mundan beýläk-de pugtalandyrmagy we giňeltmegi maksat edinýändigimizi tassyklan bu saparyň netijelerine ýokary baha berýärin. Esasy ugurlar boýunça gazanylan möhüm ylalaşyklar, gol çekilen ikitaraplaýyn resminamalar biziň ýurtlarymyzyň arasyndaky özara bähbitli hyzmatdaşlygy mundan beýläk-de ösdürmek üçin täze mümkinçilikleri açdy.

Görnükli şahyr hem-de filosof Abaý Kunanbaýew baradaky hakydanyň ebedileşdirilendigi üçin gazak halky Size hoşallyk bildirýär. Siziň goldaw bermegiňizde Aşgabatda açylan ýadygärlik gazak-türkmen dostlugynyň aýdyň nyşany bolup durýar. Pursatdan peýdalanyp, Sizi beýik türkmen şahyry Magtymguly Pyragynyň doglan gününiň 300 ýyllygyna bagyşlanan giň gerimli halkara forumyň üstünlikli geçirilmegi bilen gutlaýaryn. Forum akyldar şahyra çuňňur hormatyň aýdyň nyşany, şeýle hem doganlyk türki halklaryň umumy medeni mirasyny kemala getirmekde möhüm ädim boldy. Bu şanly sene mynasybetli ýubileý medaly bilen sylaglanmagym meniň üçin uly hormatdyr. Bu sylagy beýik türkmen şahyrynyň baý edebi mirasyny ýaýmakda we şöhratlandyrmakda Gazagystanyň goşandyna berlen ýokary baha hökmünde kabul edýärin.

Hormatly Gurbanguly Mälikgulyýewiç, köpugurly döwletara gatnaşyklarymyzy giňeltmegiň bähbidine Siziň bilen ýakyndan hyzmatdaşlygy dowam etdirmäge berk ygrarlydygymy tassyklamak bilen, doganlyk Türkmenistanyň abadançylygynyň we ösüşiniň bähbidine alyp barýan jogapkärli işiňizde Size täze üstünlikleri arzuw edýärin!

Hormatlamak bilen,

Kasym-Žomart TOKAÝEW,
Gazagystan Respublikasynyň Prezidenti.