Şu gün paýtagtymyzdaky «Ýyldyz» myhmanhanasynda GDA gatnaşyjy döwletleriň Zähmet, iş üpjünçilik we ilaty durmuş taýdan goramak boýunça maslahat beriş geňeşiniň 37-nji mejlisi geçirildi. Utgaşykly görnüşde geçirilen duşuşyga ygtyýarly guramalaryň wekilleri we Arkalaşyga agza ýurtlardan — Azerbaýjan Respublikasyndan, Ermenistan Respublikasyndan, Belarus Respublikasyndan, Gazagystan Respublikasyndan, Gyrgyz Respublikasyndan, Russiýa Federasiýasyndan, Täjigistan Respublikasyndan, Türkmenistandan we Özbegistan Respublikasyndan bilermenler, GDA gatnaşyjy döwletleriň Parlamentara Assambleýasynyň, Döwletara statistika komitetiniň, Ýewraziýa ykdysady komissiýasynyň, «Garaşsyz Döwletleriň weteranlar (pensionerler) jemgyýetçilik guramalarynyň arkalaşygy» halkara bileleşiginiň utgaşdyryjy geňeşiniň hem-de GDA-nyň Ýerine ýetiriji komitetiniň wekilleri gatnaşdylar.

Çykyşlarda bellenilişi ýaly, maslahat beriş geňeşi iş alyp barýan 30 ýylynyň dowamynda Arkalaşyga agza döwletleriň durmuş ugurly syýasatlarynyň üstünlikli durmuşa geçirilmegine ýardam bermek bilen, jemgyýetçilik we zähmet pudagynda köptaraplaýyn hyzmatdaşlygyň berkidilmegine, umumy zähmet bazarynyň döredilmegine, ugurdaş infrastrukturanyň ösdürilmegine möhüm goşant goşdy.

GDA-nyň assosirlenen agzasy bolan Bitarap Türkmenistan dürli ugurlarda Arkalaşyk bilen işjeň hyzmatdaşlyk edýär we netijeli hyzmatdaşlygyň ösdürilmegine saldamly goşant goşmagy maksat edinýär. Türkmen tarapynyň geçirilýän çärelerdir duşuşyklara, şol sanda iň ýokary derejedäki mejlislere işjeň gatnaşmagy muny aýdyňlygy bilen subut edýär.

Ýeri gelende bellesek, türkmen halkynyň Milli Lideri Gurbanguly Berdimuhamedowyň 2017-nji ýylyň oktýabrynda geçirilen GDA-nyň sammitinde öňe süren başlangyjy esasynda Arkalaşyga gatnaşyjy döwletleriň strategik ykdysady hyzmatdaşlygy hakynda Jarnama işlenip taýýarlanyldy. Bu resminama 2019-njy ýylyň oktýabrynda Aşgabatda geçirilen GDA-nyň döwlet Baştutanlarynyň Geňeşiniň mejlisinde biragyzdan kabul edildi we däp bolan söwda-ykdysady gatnaşyklaryň mundan beýläk-de ösdürilmegi üçin ygtybarly binýat boldy.

Zähmet, iş üpjünçilik we ilaty durmuş taýdan goramak boýunça maslahat beriş geňeşiniň mejlisiniň gün tertibine möhüm meseleleriň birnäçesi girizildi. Bu çäre taraplaryň köpugurly özara gatnaşyklary mundan beýläk-de pugtalandyrmaga ygrarlydygyny nobatdaky gezek tassyklady. Hususan-da, geňeşiň geçen ýylyň sentýabrynda Russiýa Federasiýasynyň Soçi şäherinde geçirilen 36-njy mejlisinde kabul edilen çözgütleriň ýerine ýetirilişi, GDA agza döwletleriň 2022 — 2024-nji ýyllarda durmuş-zähmet pudagynda hyzmatdaşlygynyň netijeleri hem-de geljek üçin göz öňünde tutulýan wezipeler, Arkalaşyga gatnaşyjy ýurtlarda durmuş-zähmet pudagyndaky ýagdaýlar barada maglumatlar diňlenildi.

Mejlisiň dowamynda Türkmenistanyň durmuş ugurly syýasaty amala aşyrmakda gazanan üstünlikleri we ösüşleri tanyşdyryldy. Bu syýasat adamy jemgyýetiň we döwletiň iň ýokary gymmatlygy diýip yglan edýän Türkmenistanyň Konstitusiýasynyň esasy düzgünlerine berk eýermek esasynda alnyp barylýar. Maslahat beriş geňeşiniň agzalary görülýän çäreleriň utgaşdyrylýandygyny, uzak möhletli, üstünlikli hyzmatdaşlygy pugtalandyrmak üçin berk hukuk binýadynyň we syýasy erkiň bardygyny kanagatlanma bilen bellediler. Munuň özi täze bilelikdäki taslamalary durmuşa geçirmek üçin amatly mümkinçilikleri döredýär.

Duşuşyga gatnaşyjylar şu günki mejlisiň dowamynda beýan edilen ähli başlangyçlaryň, olar boýunça kabul edilen çözgütleriň GDA agza döwletleriň durmuş-zähmet pudagynda utgaşdyrylan syýasatyň amala aşyrylmagyna goşant goşjakdygyna, Arkalaşygyň giňişliginde işjeň integrasiýa we özara bähbitli hyzmatdaşlygyň uzak möhletleýin, ulgamlaýyn esasda has-da giňeldilmegine güýçli itergi berjekdigine ynam bildirdiler. Şunuň bilen baglylykda, toplanan oňyn tejribäni yzygiderli alyşmagyň, GDA-nyň beýleki pudaklaýyn hyzmatdaşlyk guramalary bilen özara gyzyklanma bildirilýän meseleler boýunça ýakyn aragatnaşyk saklamagyň möhümdigi aýratyn nygtaldy.

Garaşsyz Döwletleriň Arkalaşygyna gatnaşyjy döwletleriň Zähmet, iş üpjünçilik we ilaty durmuş taýdan goramak boýunça maslahat beriş geňeşiniň 37-nji mejlisi ertir öz işini dowam eder. Ýörite taýýarlanan medeni maksatnamanyň çäklerinde daşary ýurtly myhmanlar ak mermerli paýtagtymyzyň muzeýleri we gözel ýerleri bilen tanşarlar.